Painia Gaukara—Lau Karaia Diba, A?
1 Mai guriguri ida oi laloa vadaeni bema painia gaukara oi karaia diba, a? Iehova ita gwauhamata henia vadaeni dainai, namona be ita laloa bema Basileia ena sivarai namona harorolaia gaukarana ita habadaia diba.
2 Painia Gaukara Lau Karaia Diba, A?: Haere be oiemu noho dalana bona Baibel ese oi dekenai ia gwauraia maduna idauidau hegeregerena. Edia maduna be bada momokani lasi tadikaka bona taihu momo ese edia tahua gaudia idia haidaua painia gaukara idia karaia diba totona. Emu mauri dekenai gau haida oi haidaua diba, painia gaukara oi karaia totona, a?
3 Satani be iena tanobada dikana ia gaukaralaia, anina lasi gaudia amo iseda mauri ia hahonua bona sibona eda namo ita tahua totona. Bema iseda lalona ita hadaia ita be tanobada ena lasi totona, Iehova ese ita do ia durua bena Basileia ita atoa guna bona ita vairanai idia noho tiokratik hesiai gaukara iboudiai ita karaia diba. Bema emu noho dalana oi haidaua diba painia gaukara oi karaia totona, namona be unai oi karaia, ani?
4 Moni Dalanai Do Lau Hegeregere, A?: Momokani, Papua New Guinea dekenai, bona tano momo ai, idia hanaia laganidia lalonai mauri durua gaudia abia totona moni gaukara ena hora pura ta ta iboudiai be idia bada daekau. To, momo be lagani momo lalonai idia painia, bona Iehova ese idia ia durua noho. Painia gaukara dekenai ita kwalimu totona, abidadama bona sibona eda ura dadaraia karana be gau badadia. (Mat. 17:20) Salamo 34:10 ese ita ia hamaoroa “Lohiabada idia kamonai henia taudia, be gau namona ta idia dabu lasi.” Namona be painia gaukara idia hamatamaia taudia idia diba momokani Iehova ese idia do ia durua. Gabu ibounai dekenai kamonai painia taudia totona unai ia karaia noho! (Sal. 37:25) To momokani, 2 Tesalonika 3:8, 10 bona 1 Timoteo 5:8 edia hakaua herevadia hegeregerena, painia taudia idia laloa lasi namona be ma haida ese moni dalanai idia do idia naria.
5 Namona be painia gaukara idia lalohadailaia taudia ta ta be Iesu ena hereva idia badinaia, ia gwau: ‘Guna oi helai diho, bona davana oi laloa.’ (Luka 14:28) Unai kara ese aonega ia hahedinaraia. Lagani momo lalonai idia painia vadaeni taudia oi hereva henia. Idia oi nanadaia Iehova be edena bamona idia ia durua. Emu sekit naria tauna be painia gaukara ia manadalaia tauna, bona ful-taim hesiai gaukara lalonai oi kwalimu totona mai moale ida heduru herevadia do ia gwauraia.
6 Bema tau ta be sibona ena mauri Iehova ena imana dekenai ia atoa lasi, reana Iesu ena gwauhamata Mataio 6:33 dekenai ena anina korikori do ia mamia lasi. Tano ta dekenai, kamonai painia ta ia gwau: “Lau bona egu bamona be painia gabuna matamatana dekenai ai ginidae neganai, ai be mai emai uma aniani haida bona bata sisina sibona, bona moni be lasi. Hanuaboi ai unai aniani ai ania ore, bena ai gwau, ‘Kerukeru totona aniani be lasi.’ Unai ai gurigurilaia bena ai mahuta. Daba ai, unai gabu ena Witnes taihuna ta ia mai, ia gwau, ‘Iehova lau noia painia taudia do ia siaia mai. Hari dina lau be umui do lau bamoa diba, to lauegu ruma be gunika ai dainai, dina tubua ai umui ida do lau aniani, unai dainai inai aniani lau mailaia ita ibounai totona.’ Unai aniani be boromakau ena vamu bona uma aniani momo herea.” Ita hoa lasi Iesu ese ita ia hagoadaia ‘eda noho mauri dekenai ita laloa momo lasi’! Bena ma ia gwau: “Umui daika be ena laloa hekwarahi dekena amo iena mauri ena nega sisina do ia halataia diba, a?”—Mat. 6:25, 27.
7 Bema oi abia dae momokani nega dokona ai ita noho bona inai tanobada dikana ena nega ia ore gwauraia, unai ese lauma dalanai oi do ia hagoadaia bena gau haida do oi rakatania, nega namodia ibounai sivarai namona oi harorolaia totona. Bema oiemu moni abia bona gaukaralaia dalana oi laloa lou bona Iehova ena imana dekenai unai oi atoa, reana do oi davaria iena ful-taim hesiai gaukara oi karaia diba. Ena be oi painia totona kohu haida do oi abia diba lasi, to Iehova ena hahenamo badana do oi moalelaia.—Sal. 145:16.
This is a partial repeat of article in km 7/98 taken from km-E 2/78 “Pioneer Service—Is It for You?”