Gado Ibounai amo Taunimanima Ia Haboua
1 Dirava ena Hereva be ia guguru noho! “Gado idauidau ibounai besedia dekena amo,” taunimanima ese tomadiho momokani idia abia dae. (Sek. 8:23) Edena dala ai Iehova ena Witnes taudia ese ‘iduhu idauidau, kopina idauidau, bona gado idauidau’ taudia idia durua Iehova vairanai idia goeva, bona “hisihisi badana” amo idia roho mauri totona?—Apok. 7:9, 14, NW.
2 Dirava Ena Orea Ia Haere: Hakaua Oreana ese dala ia karaia gado 380 bamona ai Baibel idia herevalaia bukadia idia hahanaia totona, unai amo tanobada hegegemadai taunimanima ibounai ese sivarai namona ena namo idia lalo-pararalaia goevagoeva diba. Gado idauidau ai buka hegaegaelaia bona halasia be gaukara badana. Papua New Guinea bona gabu ma haida dekenai, unai idia karaia totona gado idia hahanaia namonamo taudia idia abia bona idia durudia, iseda buka be unai gabu ena gado dekenai idia hahanaia totona. Idia hahanaia bukadia be idia printaia bona kongregesen idauidau dekenai idia siaia lao. To, taunimanima dekenai Baibel ena hahemauri sivaraina idia laohaia Basileia pablisa ta ta ese anina bada gaukara idia karaia.
3 Maduna Idia Abia Dae: Papua New Guinea dekenai, hari kongregesen 52 bona grup maragidia 35 ese gado badadia toi, English, Hiri Motu bona New Guinea Pidgin ai haroro gaukara idia karaia. Iseda tadikaka bona taihu momo be unai gado toi idia herevalaia namonamo, eiava idia diba sisina. Oi hegeregere gado idauna ia herevalaia kongregesen dekenai oi lao, badina unuseniai painia taudia, elda taudia, eiava hesiai taudia be idia momo lasi, a? Bema oibe, namona be emu sekit naria tauna ida unai oi herevalaia.
4 Iseda teritori lalonai ita gaukara goada English gado, Hiri Motu gado, eiava New Guinea Pidgin gado sibona idia herevalaia taudia dekenai sivarai namona ita harorolaia totona, a? (Kol. 1:25) Bema unai gado toi amo tamona sibona ita diba, gado ma rua ita dibaia be namo, unai amo auka lasi herevana ta oi gwauraia diba, hegeregere: “Namo. Inai be sivarai namona oi totona. [Bena unai gado dekenai ia noho pepapepana ta eiava buklet ta oi henia.] Bamahuta.” Iehova ese unai bamona hamatamaia dala kwadogidia ia hanamoa diba!
5 Basileia ena sivarai ese noho daladia idauidau bona gado idauidau taudia ibounai edia lalona ia veria. Unai dainai idia kehoa daladia ita gaukaralaia taunimanima dekenai unai sivarai ita harorolaia totona. Inai tano dekenai, taunimanima momo ese Iehova ena ladana idia do kamonai lasi eiava Baibel idia do diba lasi, to Dirava ena Hereva amo hereva momokani do idia abia dae.—Roma 15:21.