Iseda Goeva Karana amo Iehova Ita Hanamoa
1 Israela besena be idau, badina taravatu ese ia haganidia lauma dalana ai bona tauanina dalana ai do idia goeva. (Lev. 11:35, 36; 15:1-11; Isa. 52:11) Unai goeva karana ese Dirava ena ladana ia hanamoa bona Israela taudia be gorere momo idia davaria lasi.
2 Hari inai negai danu, goeva karana be Iehova ena orea taudia edia kara ta. To ita ta ta dekenai unai be ia momokani, a? Bema iseda kohu ita atoa namonamo bona iseda tauanina ia goeva karana ita laloa bada, unai ese ia hahedinaraia Iehova ena taravatu ita laloa bada.
3 Bema ita gwau tanobada be paradaiso ai do ita halaoa, to iseda ruma ena toana ia dika bona rei ita utua lasi eiava ava dikadia ita kokia lasi, unai ese ita harorolaia Basileia sivaraina do ia hadikaia diba. Bema iseda ruma ena kohu ita atoa namonamo lasi eiava iseda goeva lasi karadia dainai bonana dikadia idia noho, ita gwau diba ‘gabeai Dirava ena Basileia henunai, nega matamatana lalonai,’ goeva kara do ita karaia, a?—om rau 130-1.
4 Bema ita be mai eda motuka ta haroro gaukara totona ita gaukaralaia, ena lalona bona murimurina kahana idia goeva, unai amo ena toana dainai taunimanima ese iseda gaukara do idia gwauraia dika lasi, a? Iseda dabua, haroro baege, bona tauanina ena toana be edena bamona? Edia toana idia goeva dainai hemarai idia havaraia lasi, a? Iseda tauanina bona iseda dabua idia goeva noho totona, namona be dina ta ta ai ita digu bona iseda dabua ita huria.—w89 12/1 rau 17-19.
5 Bema tadikaka ta ia naria namonamo lasi bona ena ruma ena toana be ia dika dainai taunimanima ese kongregesen idia gwauraia dika be edena bamona? Reana ia buruka eiava ia gorere dainai mai lalokau danu ita durua be namo. Bema ia ita durua unai be hebogahisi karana. Reana ta be mai ena hekwakwanai unai bamona, bona ia diba lasi unai be hekwakwanai gauna; hebogahisi dalanai ia idia sisiba henia neganai, reana ena kara do ia hamaoromaoroa. Nega ibounai goeva karana idia laloa bada lasi taudia be idia hegeregere lasi kongregesen dekenai hesiai dagi idia abia totona. Momokani, namo lasi elda taudia ese ma haida idia doria unai kara dekenai edia taravatu idia badinaia totona.
6 Oiemu Kingdom Hall oi itaia. Helai gaudia, foloa bona haba idia goeva, a? Mei rumadia idia goeva, a? Bema hanaihanai ita itaia foloa ia miro eiava haba ena peni ia kokia, reana ita manadalaia bona gabeai ita laloa unai be ia dika lasi. To, vadivadi taudia be nega ginigunana idia vareai bona idia itaia neganai, reana idia moale lasi. Namona be ita goada karaia iseda Kingdom Hall ena toana ia namo totona, uda gaudia amo idia karaia eiava hanua dekenai idia noho Kingdom Hall danu unai bamona idia karaia. Unai dainai Kingdom Hall hagoevaia eiava hanamoa negana ai, namona be mai iseda ura ida iseda kahana ita karaia.
7 Ena be ita hereva lasi, to iseda tauanina, ruma, motuka, bona Kingdom Hall idia goeva neganai, Dirava ena ladana ita hanamoa diba. Iseda haheitalai namona dainai, haida do ita hahekwakwanaia lasi, to ia hahedinaraia iseda tomadiho be ia goeva bona ia maoromaoro.—1 Kor. 10:31, 32; Iam. 1:27.
This is a repeat of article in km 8/98 and 4/94 taken from km-E 4/94 “Cleanliness Honors God.”