Anina Namona Idia Havaraia Totona Iseda Buka Hariharilaia
1 Iseda haroro gaukara lalonai anina namona idia havaraia totona iseda buka ita hariharilaia lalonai, namona be oi diba ruma tauna ia ura momokani ia kamonai eiava lasi. Edena dala amo unai bamona ura do ia hahedinaraia? Mai ena ura ida oi danu ia herevahereva karana ese ena ura ia hahedinaraia. Eiava emu hereva ia hakala henia, henanadai edia haere ia henia, bona lalohadai ta ia gwauraia ese ena ura ia hahedinaraia. Mai hemataurai ida dekena tauna namona bamona oi ia hereva henia neganai, ia hahedinaraia ena kara be namo. Baibel oi duahia neganai, ia badinaia karana ese ia hahedinaraia Dirava ena Hereva ia matauraia. Haere namona ia henia neganai ia hahedinaraia ia ura kamonai. Bema unai bamona dala idauidau amo ia hahedinaraia ia ura momokani ia kamonai, reana ia abia buka do ia gaukaralaia namonamo. Ita laloa namonamo be gau badana, unai amo do ita diba bema ruma tauna ia ura momokani ia kamonai bona ia ese davana lasi gauna ia ura abia kava sibona lasi. Oi laloatao, buka edia davana idia henia diba be buka idia abia ena badina lasi, to sivarai namona idia ura henia momokani dainai buka do idia abia diba.
2 Bema oi diba ruma tauna ia ura momokani ia kamonai dainai buka oi henia, reana ita hahedinaraia edena bamona tanobada ibounai gaukarana be volantia dalanai ita durua, taunimanima be mauri hanaihanai ena dala idia dibaia totona. Unai be volantia kontribusen amo ita karaia. Bena unai tau eiava hahine oi nanadaia bema ia ura kontribusen maragina amo iseda tanobada ibounai gaukarana do ia durua. Bema ta ia ura unai bamona kontribusen ia henia, mai moale ida ita abia dae. Namona be pablisa ta ta ese envelop ta idia abia loaloa, bona idia makaia ia be taunimanima ese idia henia kontribusen totona. Bena hebou gabena dekenai Kingdom Hall dekenai tanobada ibounai gaukarana totona idia makaia kontribusen mauana lalonai idia udaia. Pablisa eiava painia ta ese ma gau ta totona unai kontribusen monina ia gaukaralaia be maoro lasi. Unai kontribusen monina be pablisa tauna ese Kingdom Hall dekenai buka ia abia neganai ia henia kontribusen monina ena davana karaia totona lasi. Unai neganai pablisa ese ia henia monina be ena kontribusen tanobada ibounai gaukarana durua totona. Haroro gaukara ai taunimanima ese kontribusen idia henia neganai ita idia abidadama henia, idia diba unai moni be Iehova ena taunimanima edia tanobada ibounai gaukarana habadaia totona do ita henia momokani.
3 Iseda hadibaia gaukarana durua totona kontribusen idia ura henia taudia iboudiai ese unai idia henia diba, to herevana kontribusen idia henia eiava lasi bema idia ura momokani idia kamonai bona buka idia duahia, buka do idia abia diba.
This article is unique to PNG.