Diba Oi Henia!

¹ Ita abia haroro bona hadibaia taudia halaoa haheganina hagugurua totona ma haida dekenai diba ita henia be gau badana. (Mat. 24:14; 28:​19, 20) Turadia huanai danu diba henia karana be ia auka. Unai dainai, ita diba lasi taudia dekenai sivarai namona ita hadibaia totona dahaka ese ita ia durua diba?

² Idia Diba Lasi Tauna amo Turana ai Oi Lao: Haroro gaukara lalonai oi davaria taudia edia hemami oi laloa. Hari inai tanobada ia dika dainai, ita hoa lasi haida ese idia diba lasi taudia dekenai idia gari. Unai ese diba henia dalana ia koua diba. Oi davaria taudia edia gari mamina be edena bamona oi kokia diba? Hereva ta ita do gwauraia lasi neganai, diba ita henia dalana ta be iseda hemataurai toana. Ita karaia dabua namodia bona eda kara namo ese gari idia kokia.​—1 Tim. 2:​9, 10.

³ Diba henia karana ia durua gauna ma ta be ita lalo-maino bona ita gado namo henidia. Unai ese ma haida edia lalona ia hanamoa bona do idia ura kamonai. Unai dainai ita hegaegae namonamo be gau badana. Bema do ita herevalaia gauna ita diba namonamo, do ita lalo-maino. Bona unai lalo-maino ita hahedinaraia neganai ma haida ia veria ita gwauraia sivaraina idia ura henia totona. Hahine ta be Witnes ta ena vadivadi ia herevalaia neganai, ia gwau: “Ena kiri toana amo lau laloatao gauna be ena lalo-maino. Egu lalona ia veria.” Unai amo dala ia kehoa, unai hahine ese sivarai namona ia kamonai totona.

⁴ Lalona Veria Karadia: Namona be mai momokani ida ma haida edia namo ita tahua. (Fili. 2:4) Unai ita karaia dalana ta be herevahereva lalonai ita sibona ita hereva lasi. Oibe, diba henia totona ita herevahereva neganai ita kamonai namonamo be mai anina bada. Kamonai taudia ita hagoadaia edia lalohadai idia gwauraia bona mai eda ura ida edia hereva ita kamonai neganai, idia lalo-parara edia namo ita tahua. Unai dainai, kamonai taudia idia hereva neganai, karaharaga dala oi tahua lasi oi hegaegaelaia haroro herevana oi henia totona. Idia oi hanamoa bema mai momokani ida unai oi karaia diba, bona idia herevalaia gauna oi herevalaia danu. Bema edia hereva ese idia laloa bada gauna ta ia hahedinaraia, emu haroro herevana oi haidaua unai umui herevalaia totona.

⁵ Manau bona lalo-namo ese diba henia karana idia hanamoa. (Aon. 11:2; Kara 20:19) Taunimanima ese Iesu idia ura henia badina ia be “dagedage lasi bona manau tauna.” (Mat. 11:29) Danu, sibona ia abia isi tauna be taunimanima ese idia dadaraia. Unai dainai, ena be ita diba momokani hereva momokani ita abia, to ita aonega bona dala aukana dekenai eda lalohadai ita gwauraia lasi.

⁶ Bema kamonai tauna ena hereva ia hahedinaraia ia abia dae hadibaia herevadia be Baibel amo lasi be edena bamona? Iseda maduna be ena lalohadai ita hamaoromaoroa, a? Oibe, do ita hamaoromaoroa be namo, to nega ginigunana ita herevahereva lalonai unai ita karaia toho lasi. Nega momo ia namo bema ita bona kamonai tauna ese ita laloa bada gaudia ita herevalaia bona gabeai, reana ia abia dae be auka Baibel ena hadibaia herevadia do ita herevalaia. Unai totona do ita haheauka bona aonega be namo. Paulo ese Areo Ororona ena hahemaoro taudia oreana ia haroro henia neganai, unai kara dekenai haheitalai namona ia hahedinaraia.​—Kara 17:​18, 22-31.

⁷ To diba ita henia namonamo totona ita ia durua gauna badana be sibona ena namo ia tahua lasi lalokauna. Namona be Iesu bamona taunimanima ita hebogahisi henia, badina “idia manokamanoka, bona idia lao idau gabu idau gabu dekenai, mamoe idia naria lasi bamona.” (Mat. 9:36) Unai ese ita ia hagoadaia, idia dekenai sivarai namona ita hadibaia bona mauri ena dala dekenai idia ita durua. Ita harorolaia sivaraina be lalokau sivaraina, unai dainai lalokau dalanai ita harorolaia noho be namo. Unai ita karaia neganai, Iehova Dirava bona Iesu Keriso edia kara ita tohotohoa​—idia be guba bona tanobada edia Diba Henia Taudia Hereadaedia.