Oi Dekenai Lalo-Parara Do Ia Henia Bona Ia Hagoadaia Vidio Ta!
Unai be April 1951. Guna idia gwauraia Soviet Union dekenai, Iehova ena Witnes taudia momo—ruma bese ibounai—idia haboudia, motuka dekenai idia udadia, bona Siberia dekenai idia siaidia lao. Dahaka dainai Soviet ena gavamani goadana ia ura idia ia hadikaia? Iseda tadikaka be edena bamona idia roho mauri bona idia goada idia lao, ena be lagani momo lalonai hisihisi idia davaria? Vidio ladana, Faithful Under Trials—Jehovah’s Witnesses in the Soviet Union lalonai haere do oi davaria. Unai vidio oi itaia, bona iena hereva ese oi do ia hagoadaia Iehova dekenai emu abidadama oi dogoatao, herevana dahaka ia vara!
Inai henanadai oi haerelaidia diba, a? (1) Russia dekenai, Iehova ena Witnes taudia be edena negai gwaumaoro idia abia? (2) Tanobada Tuarina Iharuana vairanai bona murinai, edena dala ai Soviet Union dekenai Witnes ruma besedia idia momo idia lao? (3) Idia abia dae gaudia be edena dala ai Lenin ena lalohadai ida ia hegeregere lasi? (4) Operation North be dahaka, bona ia amo Stalin ia ura dahaka ia hagugurua? (5) Witnes taudia be tano ma ta dekenai idia siaia dainai dahaka idia karaia diba, bona dahaka idia hamaoroa idia karaia totona unai amo tano ma ta dekenai do idia siaidia lasi? (6) Iseda tadikaka bona taihu be trein amo Siberia dekenai idia lao neganai, edena dala ai ta ta idia hagoadaia, unai dainai idia dogoatao taudia idia hoa? (7) Siberia dekenai Witnes taudia be edena bamona hisihisi idia haheaukalaia? (8) Iehova ena taunimanima ese lauma dalanai edena heduru gauna idia laloa bada, bona dahaka dainai? (9) Dahaka dainai iseda tadikaka be buka bona magasin abia totona mase garina idia gari lasi, bona ena be gavamani ena gaukara taudia idia hekwarahi bada iseda tadikaka ese unai buka idia abia lasi totona, to edena dala ai iseda tadikaka idia kwalimu? (10) Khrushchev be edena dala ai Dirava ena taunimanima ia dagedage henia? (11) Gavamani ena gaukara taudia be edena dala ai Witnes natudia edia abidadama idia hadikaia toho? (12) Iseda tadikaka be dagedage idia davaria dainai, dahaka lalo-parara matamatana idia abia? (Lagani 2002 Yearbook, rau 203-4) (13) Edena dala ai Dirava ena orea hadikaia ore karana be dagedage taudia edia ura hegeregerena ia vara lasi? (Lagani 2002 Yearbook, rau 220-1) (14) Soviet Union dekenai idia noho Witnes taudia ese idia laloa gaudia be edena bamona gabeai idia vara momokani? (15) Dahaka ese iseda tadikaka ia durua hisihisi idia haheaukalaia totona, bona edena dala ai unai vidio ena laulau dokona ese Ieremia 1:19 ena hereva ia hamomokania? (16) Ta ese hahetoho lalonai abidadama ia hahedinaraia ena sivarai momokanina ta ese oi ia hagoadaia be mani oi gwauraia.