Iehova Ena Namo Ita Tohotohoa
1 Dina ena diho mai hairaina ta eiava aniani namona ta ita moalelaia murinai ita ura Iehova, namo ibounai ena Badina ita tanikiu henia, ani? Iena namo dainai ita ura ia ita tohotohoa. (Sal. 119:66, 68; Efe. 5:1) Edena dala ai namo karana ita hahedinaraia diba?
2 Abidadama Lasi Taudia Dekenai: Iehova ena namo ita tohotohoa dalana ta be, iseda tomadiho tamona lasi taudia ita lalodia bada. (Gal. 6:10) Dala namodia ai namo karana ita hahedinaraia ese edia laloa dalana, Iehova ena Witnes taudia bona ita harorolaia herevana dekenai, ia hamaoromaoroa diba.
3 Hegeregere, hospital dekenai painia tadikaka matamata ta be hahine burukana ta badinai ia helai bona ia naria noho, toana be idia mai gorere taudia momo amo unai hahine be ia gorere bada. Unai tadikaka ena nega ia ginidae doketa itaia totona neganai, ia ese iena gabuna ai unai hahine ia siaia. Gabeai maketi ai idia hedavari lou, bona unai hahine ese unai tadikaka ia itaia neganai ia moale bada. Ena be guna ia ura lasi sivarai namona ia kamonaia, to ia gwau hari ia diba Iehova ena Witnes taudia be edia dekena taudia idia lalokau henia momokani. Unai hahine ida Baibel stadi idia hamatamaia.
4 Iseda Tadikaka Dekenai: Ita sibona ita henia eda tomadiho tamona taudia ita durua totona neganai, ita ese Iehova ena namo ita tohotohoa danu. Dika negadiai, iseda tadikaka idia durua taudia ginigunadia ta be ita. Bema motuka amo haida ita durua hebou dekenai idia lao, gorere taudia ita vadivadi henia, bona kongregesen ai ita diba namonamo lasi taudia ita laloa bada neganai, unai namo karana ita hahedinaraia danu.—2 Kor. 6:11-13; Heb. 13:16.
5 Iehova ena namo ia hahedinaraia dalana ta be, ia gini hegaegae noho ‘kara dika ia gwauatao’ totona. (Sal. 86:5) Iena kara ita tohotohoa totona, ma haida edia dika ita gwauatao neganai ita hahedinaraia diba, namo karana ita ura henia. (Efe. 4:32) Unai ese ita ia durua iseda tadikaka ita bamoa neganai, iseda “kara be namo, bona mai ena moale danu.”—Sal. 133:1-3.
6 Namona be Iehova ena namo bada karana dainai ia ita hanamoa bona mai moale ida ita diaridiari. Bona namona be unai ese ita ia doria ita karaia karadia ibounai dekenai Iehova ena namo ita tohotohoa totona.—Sal. 145:7; Ier. 31:12.