Namona be Iseda Tomadiho Gabuna Ena Toana Ia Namo
1 Tanobada hegegemadai Iehova ena Witnes taudia edia kongregesen iboudiai be 94,000 mai kahana. Kongregesen momo be Kingdom Hall ta dekenai idia hebou Baibel idia stadilaia bona Keristani taudia idia bamoa totona, danu Kingdom Hall be tomadiho goevana ena gabu badana.
2 Hanaihanai Hagoevaia Ena Sediual Hegaegaelaia: Kingdom Hall hagoevaia bona hanamoa gaukaradia be iseda hesiai gaukara helagana ena kahana badana ta. Hesiai Gaukara bukana ena rau 61-2 ai ia gwau: “Namona be tadikaka be mai edia moale danu Kingdom Hall ena haginia bona naria monina idia henia, bona edia nega bona goada danu idia henia idia hagoevaia totona, bona ena toana ia namo bona idia hanamoa loulou totona. Kingdom Hall ena lalona bona ena murina toana ese Iehova ena orea ena namo ia hahedinaraia goevagoeva be namo.” Pura ta ta ai Kingdom Hall ita gaukaralaia momo dainai, hanaihanai ita hagoevaia bona hanamoa be gau badana. Nega momo Kingdom Hall dekenai ia (idia) hebou kongregesen amo volantia taudia idia abia, unai gaukara idia karaia totona. Baibel negadia hegeregerena, hari inai negai Iehova ena hesiai taudia ese iseda tomadiho gabuna idia “hanamoa” namonamo be namo.—2 Siv. 34:10.
3 Namona be pura ta ta ena Kingdom Hall hagoevaia ena sediual be notisbod ai ia noho. Buka stadi grup ibounai ese Kingdom Hall do idia hagoevaia, lista ta idia badinaia be namo. Idia hegeregere tadikaka bona taihu ibounai ese pura ta ta ai Kingdom Hall hagoevaia bona ena toana ia namo ena hahenamo idia durua diba. Tama sina edia hakaua henunai natudia ese unai gaukara idia karaia diba, unai amo idia hadibadia unai hahenamo idia laloa bada totona. To kongregesen momo ese Kingdom Hall tamona idia gaukaralaia neganai, gaukara hebou namonamo karana be mai anina bada, unai amo haida sibona be hanaihanai Kingdom Hall do idia hagoevaia lasi.
4 Kingdom Hall hagoevaia gaukara ena lista ta ia noho be namo, reana stoarum dekenai idia atoa be namo. Namona be unai lista dekenai pura ta ta ena gaukara idauidau ia herevalaia, idia haida be foloa daroa, luva hagoevaia, buka bona magasin edia kaunta ena kahu kokia, momoru negea, foloa mopua, bona mei rumana hagoevaia karana. To gaukara haida be hanaihanai do ita karaia lasi, hegeregere au amo idia karaia kohudia polisi karana, bona sea, keten, lamepa bona fani hagoevaia karana. Kemikol iboudiai be natudia ese do idia abia lasi gabuna ai umui atoa be namo, bona namona be kemikol edia ladana torea hedinarai goevagoeva. Namona be kemikol ta ta gaukaralaia dalana kwadogina umui torea hedinarai.
5 Kingdom Hall dekenai seifti be mai anina bada. (Deu. 22:8) Unai dainai, rau 4 ai ia noho mauana dekenai be lista ta ia noho, bona ia herevalaia gaudia haida ita sekea loulou be mai anina bada, aksiden idia vara lasi totona.
6 Kingdom Hall Hanamoa Gaukarana: Elda oreana ena maduna be Kingdom Hall hanamoa gaukarana ia naria. Nega momo elda ta eiava hesiai tauna ta idia abia hidi, gaukara ia hakaua totona. Dina ta ta ai Kingdom Hall dekenai idia karaia gaukarana ia naria, ia itaia ia goeva, gau ta ia dika lasi bona hagoevaia kohudia idia noho. Gau badana be Kingdom Hall lalonai eiava murimurinai aksiden havaraia gauna ta ia noho lasi. Kongregesen rua eiava momo be Kingdom Hall tamona idia gaukaralaia hebou neganai, elda oreana be Kingdom Hall naria komiti ta ia abia hidi, Kingdom Hall bona ena tano naria namonamo gaukaradia idia haria totona. Unai komiti be elda oreana ena hakaua henunai ia gaukara.
7 Kingdom Hall sekea namonamo gaukarana be lagani ta ta ai idia karaia. Bema Kingdom Hall gauna ta ia dika bona idia hanamoa haraga be namo, elda taudia be dala do idia hegaegaelaia. Kongregesen maragidia ai, namona be sekit naria tauna ia itaia Kingdom Hall sekea namonamo gaukarana idia karaia bona gau ta ia dika neganai idia hanamoa. Bema Kingdom Hall gauna ta ia dika bona idia hanamoa be namo, reana pablisa edia heduru idia noia. Bema Kingdom Hall gauna ta ia dika, namona be ibounai idia hegaegae unai idia hanamoa haraga totona.
8 Bema elda taudia idia laloa Kingdom Hall hanamoa totona lalohadai haida bona heduru idia abia be namo, brens opesi ai ia noho Kingdom Hall Haginia Dipatmen idia rini henia diba. Reana idia ura inai gaudia idia hanamoa, hegeregere dimairi ese au idia ania noho, guhi be mai ena matu, eiava paipa bona mei rumana ena hekwakwanai. Kingdom Hall bona ia gini gabuna ai idia karaia gaukaradia be volantia taudia ese idia karaia. Idia be sibona edia ura idia dadaraia bona idia gaukara goadagoada dainai, edia lalokau karana ia hedinarai bona moni momo ita negea lasi. Nega haida, kongregesen amo idia abia volantia tauna ese gaukara haida ia karaia be auka, badina ia be gaukara aukana eiava badana. Bema unai bamona, brens opesi ai ia noho Kingdom Hall Haginia Dipatmen ena heduru idia noia, edena dala ai unai hekwakwanai idia hanaia diba totona.
9 Kongregesen Ena Moni Gaukaralaia Namonamo: Kongregesen momo ese Kingdom Hall tamona idia gaukaralaia neganai, Kingdom Hall naria komiti be seke ena akaun ta ia naria bona hua ta ta ena akaun ripoti be elda ena orea ta ta dekenai ia henia. Elda taudia ese kongregesen ena moni gaukaralaia maoromaoro ena maduna idia huaia.
10 Hanamoa Bona Haginia Lou Gaukarana: Bema Kingdom Hall naria komiti ia laloa Kingdom Hall ena gau badana ta ia dika dainai idia hanamoa lou be gau badana, namona be unai komiti ese elda oreana dekenai unai idia gwauraia hedinarai, elda oreana ese abia hidi idia karaia totona. Bema idia davaria unai Kingdom Hall do idia hanamoa eiava haginia lou be namo eiava unai Kingdom Hall ai idia hebou lasi kongregesen ma haida edia heduru idia abia be namo, elda taudia ese brens opesi ai ia noho Kingdom Hall Haginia Dipatmen idia rini henia be namo.
11 Kingdom Hall ai ita hebou be hahenamo hereadaena bona unai ita laloa bada! Ita ura lasi eda hebou karana ita rakatania kava eiava laloa maragi. Ita ibounai ese eda Kingdom Hall naria namonamo gaukarana ita durua bada diba, bena unuseniai ita hebou karana amo goada do ita abia. Unai ese tomadiho goevana ia habadaia bona Iehova ena ladana ia hanamoa. Namona be eda lalona ita hadaia eda tomadiho gabuna ena toana ia namo totona.
[Study Questions]
1. Dahaka dainai Kingdom Hall idia haginia?
2. Dahaka dainai Kingdom Hall ita hagoevaia bona ena toana ia namo be gau badana?
3. Kingdom Hall hagoevaia karana be edena bamona idia hegaegaelaia, bona daika ese unai gaukara ia durua diba?
4. Dahaka ita karaia diba be namo, unai amo kongregesen ia diba Kingdom Hall idia hagoevaia neganai dahaka idia karaia diba?
5. Edena dala ai seifti be mai anina bada? Bona dahaka gaudia ita sekea loulou be namo? (Rau 4 ai maua itaia.)
6. Kingdom Hall hanamoa gaukarana be edena bamona idia haria?
7. (a) Kingdom Hall ena toana ia namo totona, lagani ta ta ai dahaka idia karaia be namo? (b) Dahaka gaukara haida be mai anina bada? (Rau 5 ai maua itaia.)
8. Kingdom Hall hanamoa karana dekenai, edena negai elda taudia ese brens opesi idia rini henia be namo?
9. Kongregesen ena moni idia gaukaralaia namonamo totona, dahaka idia karaia?
10. Bema Kingdom Hall idia hanamoa eiava haginia lou be namo, dahaka idia karaia be namo?
11. Edena bamona ita hahedinaraia diba Kingdom Hall ai ita hebou hahenamona ita laloa bada?
[Box on page 5]
Kingdom Hall Bona Ena Tano Naria Namonamo
◻ Murimuri kahana: Guhi, haba, peni, uindo, bona Kingdom Hall ena saini edia toana idia namo, a?
◻ Tano: Tano ena toana ia namo, a? Raka gabudia, magu, bona motuka atoa gabuna edia toana idia namo, a?
◻ Lalona kahana: Keten, helai gaudia, lamepa gaudia bona ranu paipa, haba bona iduara edia peni, buka bona magasin edia kabodi bona hebou daiutu edia toana idia namo, a?
◻ Kohu: Lamepa, saun gaudia bona fani idia gaukara namonamo, a?
◻ Mei rumana: Idia goeva bona gaukara namonamo, a?
◻ Kongregesen ena pepa idauidau: Kingdom Hall biaguna bona tano idia herevalaia pepadia be vaia brens opesi dekenai idia dogoatao. Bema kongregesen ese unai pepa edia kopi haida idia dogoatao, kongregesen ena faila dekenai idia atodia be namo. Namona be kongregesen ese nega korikori ai lagani ta ta ai gavamani ena takisi, Kingdom Hall ena tano totona, idia henia bona edia rekodi ibounai be kongregesen ena faila dekenai idia dogoatao.
[Box on page 4]
Seifti Ena Lista
◻ Bema lahi habodoa gaudia (fire extinguishers) be Kingdom Hall ai idia noho, namona be abia haraga gabunai idia noho bona lagani ta ta ai sekea.
◻ Namona be iduara bona vadavada idia namo, diari ia noho bona hanreil idia dika lasi be namo.
◻ Namona be stoarum bona mei rumana idia goeva, gau ibounai idia atoa namonamo bona lahi ese ia gabua haraga diba gaudia, ta ena kohu, bona momoru idia noho lasi.
◻ Namona be hanaihanai guhi bona gata sekea namonamo bona hagoevaia.
◻ Bema namo, raka gabudia bona motuka atoa gabuna dekenai diari ia noho be namo. Namo lasi ta ia dedi eiava moru.
◻ Namona be paua hadokoa gaudia (circuit breakers), waea, fani edia swits bona paua gaudia ma haida be hanaihanai sekea bona hanamoa bema idia dika.
◻ Paipa ena matu amo ranu ia diho kava neganai hanamoa haraga, unai amo timba idia dika eiava bodaga lasi.
◻ Namona be timba bona du sekea hanaihanai, dimairi ese idia ania bena idia hadikaia garina.
◻ Kingdom Hall be raskol momo gabuna dekenai ia gini noho bona Kingdom Hall ai ta ia noho lasi neganai, namona be gimaia namonamo dalana umui laloa bada. Kingdom Hall dekenai moni umui rakatania lasi be namo. Kingdom Hall ai dava bada saun gaudia gimaia namonamo totona, gau badana be dina ena hebou ibounai ia ore murinai Kingdom Hall amo umui kokia bona gimaia gabuna ta ai umui atoa.
This articel is repeated in km 4/10