Kongregesen Ena Lauma Dalana Hagoadaia Karana
1 Iehova ena orea be Dirava ena taunimanima ibounai ia hadibaia loulou, lauma dalanai idia tubu be namo. Unai dainai, elda taudia ta ta ese mai edia ura bada ida edia sediual idia haidaua be gau badana, unai amo idia ta ta be mamoe orea naria gaukarana idia karaia, mamoe orea taudia ta ta idia durua bona lalokau dalanai unai heduru idia henia totona. Vaia, buka stadi naria tauna be do ia hekwarahi iena grup lalonai idia noho taudia ia durudia totona, to ia be elda bona mamoe naria tauna dainai, namona be kongregesen taudia ibounai do ia laloa bada danu.—Kara 20:28; 1 Pet. 5:2, 3.
2 Naria taudia ese mamoe vadivadina idia karaia neganai, namona be pablisa ese haroro ai ia karaia gauna sibona idia laloa bada lasi, to gau badana be tadikaka be Iehova idia laloa bada noho, tadikaka ta ta dekenai edia lalokau idia habadaia noho, bona idia itaia edia haroro bona hebou idia lao henia karana idia moalelaia. Namo lasi ta ia laloa gau ta ia hakererea dainai elda ta ese ena ruma ia vadivadi henia. Paulo ia gwau, tadikaka ia vadivadi henia badina ia ura ‘edia noho ia itaia, idia be edena bamona.’ (Kara 15:36) Oibe, elda be lalokau mamoe naria taudia dainai, idia ura diba oi be edena bamona. Idia ura lauma dalanai heduru idia henia, reana unai ese oi do ia durua bona hagoadaia.
3 Naria taudia be mamoe vadivadina totona tadikaka bona taihu edia ruma dekenai idia lao neganai, turana namona ta eiava edia varavara korikorina ta do idia vadivadi henia bamona idia karaia. Lalokau dainai idia ura oi idia itaia bona idia moalelaia bada gaudia—Iehova ena hereva lalonai idia noho gau namodia bona ena lalokau ita dekenai—be oi ida idia herevalaia totona. Paulo ese ena tadikaka ia vadivadi henia neganai, iena tahua gauna be lauma ena harihari gaudia haida ia henia amo goada idia abia, bona reana do idia hagoadaia heheni totona. (Roma 1:11, 12) Ena anina be nega umui atoa Baibel ena kahana ta (reana Tiokratik Haroro Sikuli ena pura totona idia makaia Baibel duahiduahi) eiava magasin ena kahana ta umui duahia hebou totona, unai ese do ia hagoadadia bona durudia bada.
4 Bema gau haida eiava henanadai ta oi lalo-hekwarahilaia, laloaboio lasi kongregesen ai elda taudia idia noho oi idia durua totona. Bema gau haida ese oiemu namo lauma dalanai idia hadikaia noho, idia dekenai unai gaudia oi herevalaia haraga. Nega haida elda taudia be mamoe vadivadina idia karaia neganai, ma haida maumauraia herevana eiava udu mauri herevana do idia kamonai. Baibel amo aonega sisiba namona ese do ia durudia, unai hekwakwanai idia hamaoromaoroa totona. Namona be mamoe vadivadina lalonai ta oi sisiba henia auka lasi, to ta ena lalona oi hagoadaia.
5 Edena negai unai mamoe naria gaukara idia karaia diba? Namona be elda taudia ta ta ese pablisa taudia edia ruma idia vadivadi henia diba negana namona idia abia hidi. Reana haroro gaukara murinai, idia haida ese unai bamona vadivadina idia karaia diba. Elda taudia ta ta edia noho dalana be idauidau, to tadikaka idia laloa bada bona lalokau henia dainai, herevana edia gaukara be momo to nega do idia abia hidi mamoe orea lalonai idia noho taudia ibounai idia vadivadi henia totona. Unai dainai, nega ta ta ai elda taudia ese oi dekenai heduru do idia henia. Nega haida reana elda taudia ese Kingdom Hall ai, haroro ai umui gaukara hebou neganai eiava nega idaudia ma haida ai mamoe vadivadi do idia karaia, oi dekenai heduru idia henia totona. Danu, sekit naria tauna ese kongregesen ia vadivadi henia neganai, namona be ia hekwarahi mamoe vadivadina haida ia karaia totona.
6 Inai lalokau dalana Iehova amo ita laloa bada be namo, bona unai vadivadi ta ese do ia havaraia hahenamodia ita moalelaia. Naria taudia ese nega tamona sibona ai pablisa ta idia vadivadi henia neganai, reana pablisa ena lauma dalana do ia hagoadaia sisina, to edia vadivadi loulou karana ese anina namona do ia havaraia. Pablisa taudia ta ta edia lauma dalana idia hanamoa noho neganai, kongregesen ibounai edia noho lauma dalanai do ia namo noho.
This article is unique to PNG.