Tiokratik Haroro Sikuli Ena Riviu
Inai henanadai be Tiokratik Haroro Sikuli dekenai do ita herevalaia, August 25, 2003 ia matamaia purana ai. Sikuli naria tauna ese miniti 30 lalonai riviu do ia karaia, unai gaudia be July 7 ia lao August 25, 2003 wiki herevadia dekenai. [Itaia: Bema henanadai edia dokona ai buka ta idia torea lasi, sibona emu tahua karana oi karaia be namo haere oi davaria totona.—Haroro Sikuli bukana, rau 36-7 itaia.]
HEREVA NAMONAMO KARANA
1. Haroro gaukara lalonai, kamonai taudia ita itaia ena namo haida be dahaka? [2, be rau 125 par. 1-2; rau 125 maua] Moale bona hemataurai dalanai kamonai tauna ena matana oi itaia neganai, unai ese ia dekenai emu kara korikori do ia hahedinaraia bona edia lalona do ia namo. Danu ta ena matana oi itaia dainai, reana oi ia durua dahaka oi karaia be namo do oi diba.
2. Bema haroro gaukara oi karaia gwauraia neganai oi gari, dahaka ese oi ia durua diba? [4, be rau 128 par. 4-5] Hegaegae namonamo karana bona Iehova guriguri henia goadagoada karana sibona lasi, to danu Iehova ena hebogahisi bada oi laloa, ia ese taunimanima ia boiria Paradaiso lalonai mauri hanaihanai do idia moalelaia totona; ma haida durua bada gaudia oi laloa. Namona be oi laloatao taunimanima be ura kwalimu taudia bona oi gwauraia hereva idia abia dae eiava dadaraia diba. Iseda gaukara be ita haroro sibona. (Mat. 24:14; Kara 4:29)
3. Platfom amo hereva oi henia neganai, dahaka ese oi ia durua diba, sibona emu hereva dalanai oi herevahereva totona? [5, be rau 129 par. 2; rau 129 maua] Hereva ta ta oi laloa lasi to lalohadai badadia oi laloa amo sibona emu hereva dalanai do oi herevahereva. Bema tau ta ena hereva be ena kwarana amo ia henia toho eiava bema hereva momo ia torea, ena hereva henia dalana do ia auka bamona.
4. Levitiko 16:4, 24, 26, 28; Ioane 13:10; bona Apokalupo 19:8 edia hakaua herevadia dainai iseda toana be edena bamona be namo, bona dahaka dainai unai be mai anina bada? [7, be rau 131 par. 3; rau 131 maua] Tomadiho gabuna dekenai ita lao eiava haroro gaukara ita karaia neganai, Baibel ese ita ia hagoadaia iseda tauanina bona dabua do idia goeva. Ma haida ese unai idia itaia neganai ita abia dae Keristani hadibaia herevadia bona ita badinaia mauri dalana ese edia lalona ia veria diba.
5. Manau bona laloa maoromaoro tauna ena toana oi gwauraia hedinarai. (1 Tim. 2:9, 10) [8, be rau. 132 par. 1] Ia manau tauna ia ura lasi ma haida ia hahekwakwanaia bona edia lalona ia veria lasi ia idia laloa totona. Laloa maoromaoro tauna be ia aonega bona abia hidi namona ia karaia. Ia ese Dirava ena taravatu ia matauraia bona ia ura ena mauri lalonai Baibel ena hakaua herevadia ia badinaia.
HEREVA NAMBA 1
6. Ena be Keristani taudia be mai haheauka ida idia gwauatao heheni, to idia huanai dahaka idia haheaukalaia diba lasi? (Kol. 3:13) [3, w01 7/15 rau 22 par. 6-7] Keristani taudia be kara dika idia abia dae lasi bona kerere idia itaia diba. (Gal. 6:1)
7. Momokani eiava Koikoi: Ordinal namba ena anina be namba korikorina. Gwauraia hedinarai. [4, si rau 6 par. 24-5] Koikoi. “Ordinal” namba ese ia hahedinaraia kara ta ia vara neganai, ia be hegeregere 1st, 2nd, eiava 3rd, to ia be namba korikorina lasi. Hegeregere, 21st “century” oi herevalaia neganai, anina be 21 “century” ibounai idia ore vadaeni lasi. To “cardinal” namba be idau, ia be namba korikorina.
8. Dirava ena Hereva ita duahia karana ena badina goevana be dahaka, bona dahaka dainai unai be mai anina bada? [5, be rau 24 par. 1] Iehova lalokau henia be iena Hereva ita duahia karana ena badina goevana. ‘Mai eda lalona ibounai’ ida Iehova ita lalokau henia dainai, mai goada ibounai ida iseda lalona ita gaukaralaia Dirava ita diba totona. (Mat. 22:37)
9. Aonega tauna ese edena dala ai ‘ena diba ia habadaia noho’? (Aon. 10:14) [6, w01 7/15 rau 27 par. 5-6] Ta ese ena lalona be ia do ia hagoadaia Dirava ena diba amo ia honu be namo, unai diba be “Buka Helaga ibounai” lalonai idia noho. (2 Tim. 3:16, 17) Baibel amo ita abia dibana be hanaihanai ita lalohadailaia amo iseda kudouna dekenai ia vareai be gau badana.
10. Dahaka dainai Iobu ia manadalaia kara namodia ita laloa bada? (Iobu 1:1, 8; 2:3) [7, w01 8/1 rau 20 par. 4] Iobu ia manadalaia kara namodia dainai “ia be kerere ta lasi, bona kara maoromaoro tauna.” Ena kara korikori, eiava ia manadalaia karana, be ena ruma bese lalonai ia be hahelaga tauna bamona, iena natudia totona boubou gaudia ia henia. (Iobu 1:5) Iobu ena ruma bese be Iehova tomadiho henia lalonai mai anina bada karadia idia laloa bada.
WIKI TA TA ENA BAIBEL DUAHIDUAHI
11. Kamonai Idau Bese taudia be mauri abia totona kopina idia utua be anina lasi. Unai kara dekenai hakaua oreana be edena dala ai idia ‘lalo-tamona’? (Kara 15:25) Gau ginigunana be, Petero ia gwau Dirava ese kopina idia utua lasi kamonai Idau Bese taudia dekenai lauma helaga ia henia, ia be Korenelio bona ena ruma bese taudia edia kara idia haidaua karana ia herevalaia unai. (Kara 15:7-9) Bena, Banaba bona Paulo be abidadama taudia ai idia lao idau bese taudia huanai idia karaia karadia idia herevalaia. (Kara 15:12) Dokonai, Iamesi be Amosa 9:11, 12 ia herevalaia. (Kara 15:13, 16) Unai dainai, unai hamomokania gaudia bona lauma helaga amo idia vara herevadia dainai, idia ibounai ese abia hidi maorona idia karaia. [1, w91 3/1 rau 10-11 par. 14-15]
12. Iehova ese Mose ena Taravatu be ia kokia vadaeni, to dahaka dainai hakaua oreana idia ura Paulo ese Mose ena Taravatu haida ia badinaia? (Kara 21:20-26) [2, it-1-E rau 481 par. 3; it-2-E rau 1163 par. 6–rau 1164 par. 1] Iudea dekenai, Mose ena Taravatu be unai tano ena taravatu. Unai taravatu ia gwauraia kastom haida be Keristani hakaua herevadia idia utua lasi eiava Keristani hadibaia herevadia dadaraia karana ia havaraia lasi, Keristani taudia ginigunadia idia laloa unai be namo bona Iuda taudia edia kastom idia badinaia, unai amo haida idia hahisia kava lasi.
13. Dahaka samania koikoi herevadia be aposetolo Paulo dekenai idia gwauraia, unai dainai hari inai negai Iehova ena Witnes taudia dekenai idia gwauraia herevadia ita laloa lou? (Kara 24:5, 6) [3, w01 12/15 rau 22 par. 7–rau 23 par. 2] Paulo ena inai taudia ese ia idia samania, idia gwau gavamani hamorua karadia idia karaia noho dainai taunimanima huanai heiriheiri ia havaraia. Danu idia gwau ia be hehuni oreana ia gunalaia tauna, badina Keristani taudia edia abidadama be Iuda taudia edia amo ia idau. Danu, ia idia samania idia gwau dubu ena ariara dekenai vareai taravatuna ia hadikaia.
14. Paulo be Basileia ia harorolaia tauna dainai, ena be lagani rua lalonai dibura dekenai ia noho, to edena dala ai haheitalai namona ia hahedinaraia? (Kara 28:30, 31) Ena be Paulo ena gaukara idia taravatua, to dala idauidau ai “mai goada danu” haroro bona hadibaia gaukara ia karaia. Dibura amo ia ese Efeso taudia, Filipi taudia, Klose taudia, Heberu Keristani taudia , bona danu Filemona taudia dekenai Dirava ena siahu amo ia torea revarevadia ia siaia. [4, w91 3/1 rau 25 par. 20; Rbi8-E rau 13]
15. Dahaka dainai “gavamani ena hereva idia kamonai henia lasi taudia be Dirava danu idia kamonai henia lasi,” bona unai dainai Keristani taudia be edena bamona idia kara be namo? (Roma 13:1, 2) [8, w00 8/1 rau 4 par. 5] Dirava ese taunimanima edia politikol gavamanidia dekenai nega sisina ia henia do idia lohia totona bona Dirava ena palani lalonai idia be mai edia gaukara. Keristani taudia ese mai edia ura ida siahu taudia idia kamonai henia bema unai ese Dirava ena ura idia dekenai ia hadikaia lasi.