Hebou Lao Henia Hanaihanai Karana—Atoa Guna
1 Keristani ruma bese be kongregesen heboudia lao henia hanaihanai karana idia atoa guna. To hari inai negai, eda mauri lalonai ita karaia gaukaradia ese hekwakwanai idia havaraia diba. Papua New Guinea ai, taunimanima edia noho gabudia hegeregerena, unai bamona hekwakwanai be idauidau. Ruma gaukaradia, moni gaukara, uma aniani hadoa gaukara, maketi, haoda, eiava sikuli gaukaradia ese Iehova tomadiho henia totona ita atoa negana idia henaoa matamaia, a? Gau idauidau dekenai Iehova ena lalohadai ita abia be namo, unai ese ita do ia durua mai anina bada gaudia ita atoa guna totona.—1 Sam. 24:6; 26:11.
2 Israela tauna ta be Sabati dinana ai lahi au ia gogoa neganai, ia hahedinaraia mai ena ura ida Iehova ena lalohadai ia laloa lasi. Reana ia laloa unai bamona ia karaia iena ruma bese durua totona eiava ia be gau maragina sibona. To, Iehova ese ia hahemaoro henia karana amo ia hahedinaraia, tomadiho negana lalonai gaukara idaudia karaia karana be kerere badana.—Num. 15:32-36.
3 Hekwakwanai Hanaia Dalana: Taunimanima momo ese hebou idia lao henia totona, moni gaukara, uma gaukara, maketi bona mauri durua gaukaradia idia rakatania be ia auka. Haida ese unai hekwakwanai idia hanaia, badina edia bosi idia hereva henia, gaukara turadia ida edia gaukara negadia idia senisia, moni gaukara idauna ma ta idia tahua, eiava edia mauri lalonai gau momo idia tahua lasi. Haida be edia lalona idia hadaia, hebou dinadia ai uma aniani hadoa gaukara, maketi eiava haoda gaukara idia karaia lasi totona, unai amo nega bada ia noho hebou idia lao henia totona. Momokani, tomadiho momokani totona unai bamona idia karaia neganai Iehova ia moale.—Heb. 13:16.
4 Kongregesen haida edia hebou be hanuaboi dekenai idia karaia neganai, nega haida sikuli gaukaradia be hekwakwanai ia havaraia diba. Kekeni matamata ta ia gwau: “Hebou vairanai, egu sikuli gaukara haida lau karaia, bona ruma dekenai lau giroa lou neganai, gaukara oredia lau karaia.”
5 Ruma bese idia palani namonamo bona gaukara hebou neganai, ruma gaukara momo idia haorea bena idia hegaegae diba, nega korikori ai hebou dekenai idia ginidae totona. (Aon. 20:18) Danu, natuna maragidia idia hadibaia diba dabua idia hahedokilaia bona idia hegaegae nega korikori ai hebou dekenai idia lao totona. Ruma bese haida be PMV idia davaria totona be auka eiava do idia raka ela bona Kingdom Hall be daudau dainai, nega badana ai ruma idia rakatania be namo. Tama sina edia haheitalai amo natudia idia hadibaia diba, hebou iboudiai be mai anina bada.—Aon. 20:7.
6 Inai nega dikana ai hekwakwanai idauidau idia bada idia lao lalonai, kongregesen heboudia lao henia hanaihanai karana be gau badana. Namona be gau ibounai dekenai Iehova ena lalohadai ita abia bona hebou lao henia hanaihanai karana ita atoa guna.—Heb. 10:24, 25.