Kahana 1—Baibel Stadi Namodia Karaia
Baibel Stadi be Dahaka?
1 Tanobada hegegemadai, hua ta ta ai, Dirava ena taunimanima ese Baibel stadi milioni 6 bamona idia karaia. Hadibaia dala namodia ita gaukaralaia amo, ita ese unai Baibel stadi taudia ita durua diba idia goada idia lao ela bona idia gwauhamata bona bapatiso idia abia totona, bona idia hegeregere taunimanima ma haida idia hadibaia totona. (2 Tim. 2:2, Buka Helağa) Oi ura emu stiuden tauna danu be unai bamona ia goada ia lao be namo, a? Inai Iseda Basileia Gaukara bona gabeai gaudia dekenai, ita ese Baibel stadi namodia karaia daladia haida do ita herevalaia.
2 Edena Negai Baibel Stadi ta Ripotilaia: Bema hanaihanai ta ida Baibel oi herevalaia, ena be nega kwadogi sibona lalonai, to Baibel bona buka eiava magasin ta oi gaukaralaia neganai, unai be Baibel stadi ta oi karaia. Unai be momokani, herevana iduara dekenai eiava telefon sibona amo stadi oi karaia. Stadi dalana oi haheitalaia bona nega rua stadi oi karaia, bona oi diba momokani unai stadi do oi karaia noho neganai, unai stadi oi ripotilaia diba.
3 Dahaka Ita Karaia? buklet bona Diba bukana be ita gaukaralaia Baibel stadi momo ita karaia totona. Unai buklet eiava buka ita haorea murinai, bema oi itaia unai tauna be ia goada ia lao, ena be unai ia karaia metairametaira, bona ia dibaia gaudia ia moalelaia, vadaeni Dirava Tomadiho Henia bukana dekenai stadi oi karaia noho diba. Dirava Ena Turana ai Oi Lao Diba! buklet oi gaukaralaia edukeisen bada lasi taudia eiava duahiduahi idia diba namonamo lasi taudia oi stadi henidia totona.
4 Baibel stadi gaukarana be taunimanima milioni momo ia durua bada Iesu ena hahediba taudia momokanidia ai idia lao totona. (Mat. 28:19, 20) Iseda Basileia Gaukara gabena dekenai do idia halasia heduru herevadia oi badinaia neganai, Baibel stadi namona ta oi karaia diba.