Iduara ai Bona Telefon amo Baibel Stadi Karaia
1 Baibel stadi ta ita hamatamaia neganai, ita moale bada! To, Baibel ia ura stadilaia tauna ita davaria neganai, namona be ia do ita durua noho. Unai tauna ita stadi henia ena badina be ita ura ia ita durua Keriso ena hahediba tauna korikorina ai ia lao totona. (Mat. 28:19, 20) Dahaka ese ita ia durua diba unai ita hagugurua totona?
2 Taunimanima Idia Bisi: Hari inai negai, taunimanima be idia bisi bada. Gabu haida dekenai, matamanai taunimanima haida do idia ura lasi hora tamona lalonai Baibel idia stadilaia. Unai bamona taudia durudia totona, ita idia hagoadaia iduara ai eiava telefon ai stadi ita hamatamaia totona. Matamanai, unai bamona stadi be nega kwadogina lalonai oi karaia diba, Baibel Hadibaia bukana amo paragraf tamona eiava rua bona siri haida oi herevalaia. Hari, pablisa momo be iduara ai bona telefon amo unai bamona stadi idia karaia dainai, idia ai hanamoa!
3 To hanaihanai iduara ai Baibel stadi ta ita karaia be hegeregere, a? Lasi. Nega ginigunana iduara ai stadi ita hamatamaia neganai, namona be ita noho daudau lasi. July 1990 Iseda Basileia Gaukara, rau 8, ia gwau: “Stadi oi hamatamaia murinai” bona ruma tauna ena ura oi habadia neganai, stadi ena “nega oi halataia diba.” Unai be mai anina bada. Haheitalai ta be inai: Bema ia hitolo bada natuna ita ubua matamaia neganai, ia dekenai aniani sisina do ita henia, unai amo do ia ura ia aniani. To bema nega daudau lalonai ia dekenai aniani sisina sibona ita henia, do ia goada bona tubu namonamo lasi. Unai hegeregerena, Baibel stiuden be hanaihanai ita stadi henia be namo, unai amo Dirava ena lo hesiai tauna ai ia lao diba.—Heb. 5:13, 14.
4 Baibel Stadi Ruma Ai: Namona be ruma ai eiava gabu namona ma ta ai stadi ita karaia. Unai ese stiuden do ia durua gau momo ia dibaia bona Dirava ena Hereva ia lalopararalaia totona. (Mat. 13:23) Hadibaia tauna danu do ia durua iena stiuden ena diba hegeregerena stadi ia karaia totona. Danu, bema stadi negana umui halataia, umui stadilaia gaudia do umui herevalaia namonamo bona stadi tauna ena abidadama ia hagoadaia diba.—Roma 10:17.
5 Edena dala ai, iduara ai oi karaia Baibel stadi be ruma lalonai oi karaia diba? Stadi kwadogidia haida murinai, stiuden oi noia bema ia ura nega sisina daudau lalonai stadi umui karaia. Eiava ia oi nanadaia, “Oi dekenai nega ia noho ita helai hebou bona inai kahana ita stadilaia, a?” Eiava “Oi dekenai hora tamona be ia hegeregere stadi ita karaia totona, a?” Bema ena haere be lasi, vadaeni iduara ai umui karaia stadi umui karaia noho. Nega maorona ma ta ai, ia oi nanadaia lou diba, unai amo stadi be ruma lalonai umui karaia diba.
6 Kudou-maoro taudia ita tahua neganai, gau badana be Baibel stadi ita karaia ena badina ita laloaboio lasi. Iseda tahua gauna be ita ura unai taudia ita durua Iehova ena gwauhamata hesiai taudia ai idia lao totona. Bema unai ita laloa bona iseda hesiai gaukara ita karaia, Iehova ese iseda hekwarahi ia hanamoa.—2 Tim. 4:5.
[Study Questions]
1. Baibel stadi ita karaia ena badina be dahaka?
2. Iduara ai bona telefon amo idia karaia Baibel stadi be dahaka, bona dahaka dainai anina namona idia havaraia?
3. Dahaka dainai iduara ai ita karaia Baibel stadi ena nega ita halataia be namo?
4. Ruma lalonai stadi ita karaia ena namo be dahaka?
5. Edena dala ai, iduara ai ita karaia Baibel stadi be ruma lalonai ita karaia diba?
6. Haroro gaukara ita karaia neganai, iseda tahua gauna be dahaka? Inai atikol ai idia gwauraia heduru herevadia ese edena bamona ita ia durua diba, unai tahua gauna ita hagugurua totona?