Kahana 11—Baibel Stadi Namodia Karaia
Stiuden Durua Lou Henia Idia Karaia
1 Baibel stiuden be haroro gaukara ia karaia matamaia neganai, sivarai namona idia ura kamonai taudia do ia davaria. Edena dala ai pablisa matamata ita durua diba, unai amo lou henia do ia karaia bona kamonai tauna ena ura do ia habadaia?
2 Nega ginigunana ai ta oi vadivadi henia neganai, lou henia dalana oi hegaegaelaia. Stiuden tauna oi hagoadaia ia hereva henia taudia ia laloa bada totona. (Fili. 2:4) Namona be stiuden tauna oi hadibaia ruma taudia dekenai henanadai ia henia totona, bona idia haere neganai ia kamonai, unai amo idia laloa bada gaudia do ia diba. Ta ia kamonai neganai, pablisa matamata hadibaia, mai anina bada herevadia do ia torea. Unai amo gabeai ia lou henia neganai, unai hereva badadia ia gaukaralaia diba idia herevahereva totona.
3 Lou Henia Hegaegaelaia: Vadivadi ginigunana dekenai umui herevalaia gaudia riviulaia, bena stiuden tauna oi durua ruma tauna ia ura kamonai Basileia ena sivarai ta ia abia hidi totona. (1 Kor. 9:19-23) Stiuden tauna ida siri ta bona do umui stadilaia buklet ena paragraf ta hegaegaelaia, stiuden tauna ese ena hamatamaia herevana lalonai ia gwauraia totona. Bona danu, stiuden ese herevahereva ena dokonai do ia gwauraia henanadai ta hegaegaelaia, unai amo dala ia karaia diba gabeai ia lou henia totona. Pablisa matamata dekenai oi hahedinaraia edena bamona ia ese vadivadi negadia ta ta ai, kamonai tauna ia durua diba Dirava ena Hereva dekenai ena diba ia habadaia totona.
4 Namona be stiuden tauna oi hadibaia lou henia ia karaia neganai, hamatamaia hereva kwadogina ia gwauraia. Ruma tauna ia hanamoa murinai, reana do ia gwau: “Vanegai iseda herevahereva lau moalelaia, bona hari lau mai Baibel ena hereva ma haida [sinado gwauraia] dekenai lau herevalaia totona.” Bona pablisa matamata dekenai do oi hahedinaraia edena bamona do ia kara bema tau idauna be iduara dekenai ia mai.
5 Lou Henia Karaia: Namona be stiuden tauna oi hagoadaia idia ura kamonai taudia ibounai ia lou henidia haraga totona. Reana taunimanima be ruma dekenai oi davaria totona do oi vadivadi henidia loulou. Stiuden tauna dekenai oi hahedinaraia do ia lou henia ena nega do ia abia hidi, bona ia gwauraia negana ai ia lou henia be gau badana. (Mat. 5:37) Namona be pablisa matamata oi hadibaia mamoe bamona taudia ia tahua bona edia ura ia habadaia noho lalonai, ia manau, ma haida ia laloa bona hemataurai ia hahedinaraia.—Tito 3:2.