Mai Gari Lasi ida Lou Henia Oi Karaia!

¹ Lou henia gaukarana oi moalelaia, a? Pablisa momo ese idia moalelaia. Reana guna oi gari, bona vadivadi ginigunana ai ia kamonai momokani lasi tauna oi lou henia neganai reana oi gari sisina bada. To lou henia gaukarana lalonai sivarai namona oi herevalaia totona Dirava amo goada oi abia neganai, reana do oi hoa badina oi itaia unai be auka lasi bona anina namona ia havaraia gaukarana. (1 Tes. 2:2) Edena bamona?

² Momokani, lou henia bona vadivadi ginigunana be dala badana ai idia idau. Oi lou henia tauna be idau tauna lasi, to oi diba tauna ta, bona nega momo oi diba tauna ida oi hereva be auka lasi, idau tauna ida oi hereva bamona lasi. Unai gaukara amo hahenamo badadia idia vara, hegeregere lou henia amo Baibel stadi namodia oi hamatamaia diba.

³ Ruma-ta-ruma-ta gaukarana ai, ita be guna idia kamonai lasi taudia ita vadivadi henia loulou. To, dahaka dainai ita lao loulou? Ita diba taunimanima edia mauri lalonai gau haida idia idau bona guna ita vadivadi neganai ia kamonai lasi tauna eiava ita ia dadaraia tauna be reana ita giroa lou neganai do ia kamonai. Unai ita diba dainai, lou henia totona ita hegaegae bona Iehova ena heduru ita noia iseda hereva ta ese ruma tauna ena lalona do ia veria totona.

⁴ Bema ita be ruma-ta-ruma-ta gaukarana lalonai mai eda ura ida guna idia kamonai lasi taudia dekenai ita haroro lou, vadaeni mai eda ura bada ida Basileia ena sivarai ia kamonai henia tauna ita lou henia be namo, ani?​—Kara 10:34, 35.

⁵ Hari ita momo be hereva momokani lalonai, badina guna pablisa ta ese mai haheauka ida ita ia lou henia. Bema oi be unai taudia ta, sibona oi nanadaia, ‘Egu kara dainai unai pablisa ese edena bamona lau ia laloa? Basileia ena sivarai lau kamonai neganai maoromaoro lau abia dae, a? Reana toana be lau laloa bada lasi, a?’ Ita moale diba badina ita ia vadivadi henia pablisa ia laloa ita ia lou henia be namo bona ‘[iena] Dirava ese ia hagoadaia’ dainai, ‘mai gari lasi ida’ ia giroa lou, bona hereva momokani ita dekenai ia hadibaia. (1 Tes. 2:2) Idia kamonai guna to gabeai toana be idia ura lasi taudia be edena bamona? Mai moale ida ita haheauka be gau badana, inai ekspiriens ese ia hahedinaraia hegeregerena.

⁶ Dina ta daba momokani ai, pablisa rua be dala ai idia haroro neganai, hahine matamatana ta idia davaria, natuna be stroller dekenai ia doria. Hahine ese magasin ia abia bona unai taihu ia hamaorodia vaira Sunday ai ena ruma dekenai do idia lao. Idia gwauraia negana ai idia ginidae, to ruma hahine ia gwau ena nega be hegeregere lasi idia hereva totona. To, ia gwauhamata pura vaira do ia hegeregere. Unai taihu idia laloa reana do ia noho lasi, to idia giroa lao neganai hahine ese idia ia naria noho. Idia ese stadi idia hamatamaia, bona ia be lauma dalanai ia tubu haraga. Nega sisina lalonai, hebou dekenai ia lao bona haroro gaukara ia karaia matamaia. Hari ia bapatiso vadaeni.

⁷ Vadivadi Ginigunana ai Dala Karaia: Nega momo, lou henia gaukarana ai ita kwalimu totona, vadivadi ginigunana ai dala ita karaia. Ruma tauna ena hereva oi kamonai namonamo. Ena hereva amo dahaka oi diba? Tomadiho ia laloa bada, a? Taunimanima edia noho ia laloa, a? Ia laloa bada gauna be saiens, a? histori, a? tanobada, a? Vadivadi ginigunana oi haorea gwauraia neganai, reana ena lalona ia veria henanadaina ta oi henia, bona oi gwauhamata do oi giroa neganai Baibel ena haere do umui herevalaia.

⁸ Hegeregere, bema Baibel ena gwauhamata, tanobada paradaisona unai, ese ruma tauna ena lalona ia veria, reana gabeai unai do umui kikilaia lou be namo. Ia oi rakatania gwauraia neganai, reana oi nanadaia: “Edena bamona ita diba Dirava ese unai gwauhamata do ia hagugurua momokani?” Ma oi gwau: “Reana famili taudia ibounai idia noho neganai do lau mai diba, bona unai henanadai ena haere be Baibel amo do lau hahedinaraia diba.”

⁹ Bema oi herevalaia gaudia ese ruma tauna ena lalona ia veria lasi, reana Iseda Basileia Gaukara pepana ena rau dokona ai idia noho haroro herevadia edia henanadai ta oi henia diba, gabeai do umui herevalaia totona.

¹⁰ Rekodi Namodia Torea: Namona be oiemu ruma-ta-ruma-ta gaukarana ena rekodi oi torea namonamo bona anina bada gaudia ibounai oi torea. Ruma oi rakatania murinai maoromaoro ruma tauna ena ladana bona adres oi torea. Ruma ena namba eiava dala ena ladana oi torea kava lasi​—oi torea gaudia oi sekea idia maoro totona. Bema ruma ena namba ia noho lasi, dala ma ta amo ena noho gabuna oi gwauraia toho. Ruma tauna ena sivarai oi torea, ia be edena gabu tauna, bona edena ladadia ia gaukaralaia. Umui herevalaia gauna, umui duahia siridia, oi rakatania bukadia, bona oi giroa negana ai do oi haerelaia henanadai oi torea. Emu vadivadi ginigunana bona do oi lou henia ena deit bona nega oi torea danu. Oiemu rekodi idia hegeregere murinai, oi haboioa lasi! Gabu namona ta dekenai oi atoa gabeai do oi davaria totona. Ruma tauna bona do oi lou henia dalana oi laloa noho.

¹¹ Oi Tahua Gaudia Oi Diba: Gau ginigunana be, hebogahisi bona lalokau karana oi hahedinaraia, ruma tauna ia gari lasi totona. Mai hemataurai ida oi hahedinaraia ia oi laloa bada. Gau iharuana be, vadivadi gunana lalonai oi henia henanadai oi gwauraia lou. Ena lalohadai oi kamonai namonamo, bona ena hereva dainai oi hanamoa. Bena oi hahedinaraia dahaka dainai Baibel ena hereva ese ita ia durua. Bema ia hegeregere, Diba ese Mauri Dekenai Ita Ia Hakaua Lao bukana amo umui herevalaia lalohadaina oi hahedinaraia. Oi laloaboio lasi, lou henia dekenai oi tahua gauna badana be Baibel stadi do oi hamatamaia.

¹² Diba bukana lalonai hereva maoromaoro dalana idia gaukaralaia, unai dainai ita momo be Baibel stadi karaia neganai ‘mai gari lasi ida’ stiuden taudia ita hagoadaia, hebou dekenai idia mai bona Iehova ena orea lalonai idia vareai totona. Guna, nega sisina daudau ita naria murinai stadi taudia ita boiria ita ida idia hebou totona. Hari, stiuden taudia momo be idia stadi matamaia negana ai hebou dekenai idia mai, bona unai dainai lauma dalanai idia tubu haraga.

¹³ Tadikaka ta mai ena adavana ida ese gaukara turana ta idia haroro henia. Ia hahedinaraia hereva momokani ia ura henia neganai, Diba bukana amo Baibel stadi idia herevalaia. Unai nega tamona ai, idia hamaoroa namona be hebou ia lao henia, unuseniai ena henanadai momo edia haere do ia abia. Unai tau ese stadi ia abia dae sibona lasi to pura ta ta nega rua ia stadi matamaia bona hanaihanai Kingdom Hall dekenai hebou totona ia lao matamaia.

¹⁴ Dirava Ia Ura Dahaka Ita Karaia? Buklet Gaukaralaia: “Dirava Ena Maino Gwauraia Taudia” Distrik Hebouhebouna ai, Dirava Ia Ura Dahaka Ita Karaia? buklet ita abia. Unai buklet be namo herea Dirava gari henia taudia ida Baibel stadi hamatamaia totona, herevana idia be sikuli bada taudia eiava lasi. Ia be stadi kosi namona, Baibel ena hadibaia hereva badadia ia hahedinaraia. Unai buklet be tulu namona Dirava dibaia totona. Ia ese hereva momokani ena anina ia hahedinaraia goevagoeva dainai, ita ibounai ese ita gaukaralaia diba Dirava ena ura be ma haida dekenai do ita hadibaia totona. Reana pablisa momo ese unai buklet amo Baibel stadi do idia karaia diba.

¹⁵ Taunimanima haida idia laloa edia nega ia hegeregere lasi Diba bukana idia stadilaia, to reana idia ura nega kwadogi lalodiai Dahaka Ita Karaia? buklet idia stadilaia. Idia dibaia gaudia do idia moalelaia bada! Rau rua o toi sibona lalonai, taunimanima be lagani handred momo lalonai idia laloa henanadaidia edia haere do idia abia diba: Dirava be Daika? Diabolo be Daika? Dirava Ena Palani Tanobada Totona be Dahaka? Dirava Ena Basileia be Dahaka? Tomadiho Momokanina be Edena Bamona Oi Davaria Diba? Ena be buklet be auka lasi dalanai hereva momokani ia herevalaia, to ena hereva be mai ena siahu. Ia ese elda taudia be bapatiso gwauraia taudia ida idia herevalaia gau badadia ia hahedinaraia bona ia be hamatamaia tulu namona taunimanima be Diba bukana amo stadi namona do idia karaia totona.

¹⁶ Lou henia lalonai stadi oi hamatamaia totona, reana inai bamona do oi gwau: “Guna oi diba miniti haida sibona lalonai, Baibel henanadai badana ta ena haere oi abia diba, a?” Bena, buklet ena kahana ta hamatamaia henanadaina ta oi gwauraia. Hegeregere, bema buruka tauna oi vadivadi henia, reana oi gwau: “Ita diba guna Iesu ese taunimanima ia hanamoa. To vaira negana ai, Iesu be dahaka do ia karaia gorere taudia dekenai? buruka taudia dekenai? mase taudia dekenai?” Haere be kahana 5 ai idia noho. Inai henanadai ese tomadiho ia laloa bada tauna ena lalona ia veria diba: “Dirava ese guriguri iboudiai ia hakala henia, a?” Kahana 7 ai haere idia henia. Ruma bese taudia idia ura diba: “Dirava ena ura tama sina bona natudia dekenai be dahaka?” Kahana 8 idia stadilaia neganai do idia diba. Ma henanadai haida be: “Mase taudia ese mauri taudia idia hadikaia diba, a?” kahana 11 ai idia herevalaia; “Dahaka dainai sibodia idia gwauraia Keristani tomadiho be momo?” kahana 13 ai idia herevalaia; bona “Dirava ena turana ai oi lao totona, namona be dahaka oi karaia?” kahana 16 lalonai idia haerelaia.

¹⁷ Idau Gado ai Idia Hereva Taudia Oi Durua: Ruma taudia bema idau gado ai idia hereva be edena bamona? Bema ia hegeregere, idia diba namonamo gadona ai ta ese idia ia hadibaia be namo. (1 Kor. 14:9) Bema unai gado ia gaukaralaia kongregesen eiava grup ta be kahirakahira lasi bona pablisa ma ta be ena gado ia diba lasi, reana pablisa ese ruma tauna ia stadi henia diba, bona Dahaka Ita Karaia? buklet be gado rua ai ia gaukaralaia.

¹⁸ Idau gado ai idia hereva taudia ida oi stadi neganai, oi hereva metairametaira, hereva oi gwauraia namonamo, bona hereva bona lalohadai aukadia oi gaukaralaia lasi. To, oi laloaboio lasi, idau gado ai idia hereva taudia oi matauraia. Idia be beibi bamona oi kara henia lasi.

¹⁹ Dahaka Ita Karaia? buklet ena laulau namodia oi gaukaralaia namonamo. Bema “laulau ta be hereva tausen hegeregerena,” buklet lalonai idia noho laulau momo herea amo ruma tauna ese diba bada do ia abia. Ia oi noia sibona ena Baibel amo Baibel siridia ia duahia totona. Bema Hiri Motu gado ia diba famili tauna ta ia noho bona gado ia hahanaia diba stadi umui karaia neganai, unai amo namo do ia vara.

²⁰ Lou Henia Karaia Haraga: Dina hida oi naria be namo bena lou henia oi karaia diba? Pablisa haida be vadivadi ginigunana idia karaia bena dina ta o rua murinai idia lou henia. Ma haida be unai dina tamona lalonai idia giroa lou! Unai bamona idia karaia haraga be namo, eiava? Nega momo, ruma taudia dekenai unai be hegeregere. Nega momo namona be lou henia ia karaia pablisa ese ena lalohadai ia haidaua, ia gari lasi danu be namo. Mani inai ekspiriens oi lalodia.

²¹ Dina ta ai ena mauri lagani be 13 pablisa ta ese ruma-ta-ruma-ta gaukarana ia karaia lalonai, dala dekenai idia raka hahine rua ia hereva henia. Idia ese Basileia ena sivarai idia ura henia bona idia ta ta be Diba bukana idia abia. Unai tadikaka matamatana ese edia adres ia abia, dina rua murinai ia lou henidia, bona idia ta ta ida Baibel stadi ia hamatamaia.

²² Taihu ta be ruma tauna dekenai ia gwau pura ta murinai do ia giroa lou. To vadivadi ginigunana ia karaia bena dina ta o rua murinai ia lao bona guna idia herevalaia gauna be magasin ta lalonai ruma tauna dekenai ia hahedinaraia. Ia be ruma tauna dekenai ia gwau: “Lau ese inai hereva lau itaia bona lau laloa reana oi ura duahia. Hari lau noho diba lasi ita hereva totona, to ita gwauraia negana Wednesday adorahi ai do lau giroa lou. Unai nega ia do hegeregere oi dekenai, a?”

²³ Ta ese hereva momokani ia ura henia neganai, ita diba momokani dala ta ai dagedage do ia davaria. Vadivadi ginigunana murinai ita giroa lou haraga neganai, unai amo goada ia abia varavara, turana namodia, bona ma haida edia koua karana lalonai do ia gini goada totona.

²⁴ Loaloa Gabudia ai Oi Davaria Taudia Edia Ura Habadaia: Ita momo be dala ai, motuka atoa gabudia ai, PMV bona peleini ai, maketi bona sitoa kahirakahira ai, loaloa uma gabu ai, bona gabu ma haida ai haroro gaukarana ita moalelaia. Buka bona magasin ita hariharilaia sibona lasi, to edia ura ita habadaia danu. Unai do ita karaia diba totona, ita davaria kamonai taudia ibounai edia ladana, adres, bona, bema hegeregere, edia telefon namba ita abia be namo. Unai gaudia oi abia be auka momokani lasi. Emui herevahereva oi haorea gwauraia neganai, oiemu noutbuk oi abia bona oi nanadaia: “Dala ta ia noho nega ma ta inai bamona do ita herevahereva lou totona, a?” Eiava oi gwau: “Lau laloa magasin ta ena hereva do oi moalelaia. Oiemu ruma eiava opesi dekenai unai lau mailaia diba, a?” Tadikaka ta ia henanadai: “Oiemu telefon namba be dahaka?” Ia gwau hua toi lalonai taunimanima toi sibona ese edia namba idia henia lasi, to oredia ibounai be mai moale ida idia henia.

²⁵ Telefon amo Kamonai Taudia Oi Tahua Bona Edia Ura Oi Habadaia: Nega haida ita davaria diba lasi taudia, hegeregere magu aukadia lalonai sekuriti ese idia naria rumadia ai idia noho taudia, be telefon amo ita hereva henia diba. Telefon amo ia haroro taihuna ta tano ma ta ai, nega ginigunana ai ia rini neganai, ia gwau: “Lau diba oi be lau oi diba lasi. Lau hekwarahi oiemu noho gabuna dekenai idia noho taudia lau davaria, Baibel ena lalohadai ta lau hahedinaraia totona. Bema nega ia noho, lau ura . . . dekenai ita davaria diba gwauhamatana lau duahia.” Siri ia duahia murinai ia gwau: “Do ia namo herea bema unai nega do ita itaia, ani? Lau moale unai siri oi dekenai lau duahia diba dainai. Bema oi ese unai oi moalelaia danu, lau ura gabeai do lau rini lou bona siri ma ta do ita kikilaia.”

²⁶ Ia rini henia lou neganai, ruma tauna dekenai guna idia herevalaia gauna ia gwauraia lou, bona ia gwau ia ura Baibel amo do ia hahedinaraia kara dika ia ore murinai edena bamona maurina do ita abia diba. Bena nega sisina lalonai ruma tauna ida Baibel ia herevalaia. Nega momo telefon amo taunimanima ida ia herevahereva lalonai, idia 35 be edia ruma dekenai ia idia boiria bona ia ese Baibel stadi 7 ia hamatamaia! Nega haida gorere, eiava medu badana eiava hekwakwanai ma ta dainai oi loaloa diba lasi. Bema unai bamona ia vara, bona bema ia hegeregere, mani telefon amo idia ida oi hereva.

²⁷ Bisinesi Gabudia ai Oi Davaria Kamonai Taudia Edia Ura Oi Habadaia: Sitoa-ta-sitoa-ta gaukarana be magasin hariharilaia gaukarana sibona lasi. Sitoa naria taudia momo ese hereva momokani idia ura bada, bona edia ura ita habadaia be namo. Nega haida, ena gaukara gabuna dekenai Baibel ita herevalaia diba eiava stadi ita karaia diba. Ma nega haida, reana oi bona kamonai tauna be dina tubua ai eiava ma nega namona ta ai umui hedavari diba.

²⁸ Sekit naria tauna ta be aniani sitoa maragina ta ena biaguna ia hereva henia bona ia gwau Baibel stadi do ia hahedinaraia diba. Sitoa ena biaguna ia ura diba miniti hida lalonai unai ia karaia bona sekit naria tauna ia gwau miniti 15 sibona be hegeregere. Unai neganai, sitoa ia naria tauna ese saini ta ia atoa iduara dekenai, ia gwau: “Miniti 20 murinai do lau giroa lou.” Helai gaudia rua ia atoa bona idia ruaosi be Diba bukana ena paragraf ginigunadia ima idia herevalaia hebou. Unai kudou-maoro tauna ese ia kamonai gaudia ia ura henia bada dainai, Sunday ai Pablik Tok bona Gima Kohorona Stadi edia hebou dekenai ia lao bona ia ura pura vaira ai do idia stadi lou.

²⁹ Bisinesi gabuna ai stadi oi herevalaia neganai, reana oi gwau: “Miniti 15 sibona lalonai emai Baibel stadi program lau hahedinaraia diba. Ia hegeregere neganai, lau moale bema ai karaia dalana oi dekenai lau hahedinaraia diba.” Bena, unai nega oi hanaia lasi. Bema bisinesi gabuna ai umui hereva daudau diba lasi, reana ia namo sitoa naria tauna ena ruma dekenai ia do oi vadivadi henia.

³⁰ Buka Oi Rakatania Lasi Neganai Danu Oi Lou Henia: Idia kamonai taudia ibounai ita lou henia be namo, herevana buka o magasin ta ia abia eiava lasi. To momokani, bema ia hedinarai goevagoeva ruma tauna ese Basileia ena sivarai ia ura henia lasi neganai, namona be taunimanima ma haida durua totona do oi hekwarahi.

³¹ Ruma-ta-ruma-ta gaukarana ai, taihu ta ese kara namo hahinena ta ia davaria to ia ura lasi magasin ia abia. Unai pablisa ia torea: “Dina momo lalonai ia lau laloa noho bona egu lalona lau hadaia ia ida do lau hereva lou.” Gabeai, unai taihu ia guriguri, goada ia abia, bona unai hahine ena iduara ai ia pidipidi. Ia moale badina ruma hahine ese ruma dekenai ia abia dae. Baibel stadi idia hamatamaia, bona murina dinana ai idia karaia lou. Gabeai, unai ruma hahinena be hereva momokani lalonai ia vareai.

³² Hegaegae Guna Anina Namona Havaraia Totona: Ita idia hagoadaia pura ta ta nega ita atoa lou henia ita karaia totona. Ita hegaegae namonamo neganai, anina namona ia vara diba. Ruma-ta-ruma-ta gaukarana do umui karaia gabuna dekenai idia noho lou henia taudia totona oi hegaegae. Bema motuka umui gaukaralaia, grup maragina sibona be namo ta ta be lou henia idia karaia diba totona. Motuka ia taria tauna umui hadibaia guna lou henia be edeseniai idia noho bena do ia taria loaloa kava lasi.

³³ Lou henia bona Baibel stadi gaukarana lalonai idia kwalimu taudia idia gwau gau badana be ita hahedinaraia taunimanima ta ta ita laloa bada bona edia ruma ita rakatania murinai danu idia ita laloa noho. Danu namona be edia lalona ia veria Baibel lalohadaina ita herevalaia bona vadivadi ginigunana ita do haorea lasi neganai lou henia totona ita hegaegae. Ma danu, namona be edia ura habadaia totona ita giroa haraga. Nega ibounai ita tahua gauna, Baibel stadi unai, ita laloa noho.

³⁴ Lou henia gaukarana lalonai ita kwalimu totona gau badana be ita gari lasi. Unai be edena bamona ia vara diba? Aposetolo Paulo ia haere, ia gwau ‘mai gari lasi ida’ taunimanima dekenai hereva momokani ita harorolaia, badina ‘Dirava ese ita ia hagoadaia.’ (1 Tes. 2:2) Bema oi laloa unai kara do oi habadaia be namo, Iehova ena heduru abia totona do oi guriguri. Bena, emu guriguri hegeregerena, oi davaria kamonai taudia ibounai edia ura oi habadaia. Momokani Iehova ese oiemu hekwarahi do ia hanamoa!

[Box on page 3]

Lou Henia Gaukarana Lalonai Oi Kwalimu Dalana

■ Oi hahedinaraia taunimanima ta ta oi laloa bada.

■ Lalona ia veria Baibel lalohadaina oi abia hidi do oi herevalaia totona.

■ Vadivadi ginigunana ai lou henia totona dala oi karaia.

■ Ruma tauna oi rakatania murinai danu ia oi laloa noho.

■ Dina ta o rua murinai oi giroa edia ura oi habadaia totona.

■ Oi tahua gauna, Baibel stadi unai, oi laloa noho.

■ Mai gari lasi ida unai gaukara do oi karaia totona guriguri amo heduru oi noia.