Hakaua Oreana Amo Ia Mai Revareva
“LAU ura be Dirava iseda Tamana bona Lohiabada Iesu Keriso ese hariharibada bona maino umui dekenai do idia henia.” Paulo be kongrigeisen idauidau dekenai revareva ia siaia neganai, unai bamona hanamoa herevana ia gaukaralaia. Ai danu be unai bamona hanamoa herevana ai siaia umui dekenai.—Efe. 1:2.
Iehova be Iesu Keriso ena mauri davalaia boubouna amo ia hahedinaraia hariharibada karana dainai, ia ita tanikiu henia! Unai boubou karana dainai Iehova ena lalonamo ita abia diba. To, bema sibona eda goada dekenai Baibel ita stadilaia goadagoada, sivarai namona ita harorolaia eiava gaukara namodia ma haida ita karaia, Dirava ena lalonamo do ita abia lasi. Iseda dika ia gwauatao bona mauri hanaihanai ita abia diba, unai be iseda gaukara ena davana lasi, to Iehova ena hebogahisi dainai Ia ese Iesu Keriso amo unai harihari gauna ia henia.—Roma 11:6.
Paulo be abidadama taudia dekenai ia gwau: “Ia ida ai gaukara hebou dainai, ai danu be umui ai noia Dirava ena hariharibada umui abia dae bona ena anina umui reaia lasi. Badina be ia gwau: ‘Nega namona ta ai oi lau kamonai henia, bona hahemauri dinana ta ai oi lau durua.’ Itaia! Harihari be nega namo hereana. Itaia! Harihari be hahemauri dinana.” Aposetolo taudia edia negai Ierusalema idia do hadikaia lasi neganai, unai be “nega namona.” Badina unai nega ai Iehova idia lalokau henia kudou-maoro taudia be Iehova ese ia lalonamo henidia. Unai dainai, lagani 70 C.E. ai Ierusalema idia do hadikaia lasi neganai, unai abidadama taudia ibounai be idia heau mauri.—2 Kor. 6:1, 2, NW.
Danu hari inai negai, ita be “nega namona” bona “hahemauri dinana” ai ita noho. Iehova ese ia abia dae hesiai taudia bona lauma dalanai idia mauri taudia be kahirakahira Iehova “ena dina badana” amo do idia roho mauri.—Sep. 1:14.
Iehova ena dina be ia mai noho dainai, ita be mai eda maduna badana ta. Unai be taunimanima dekenai Iehova ena dina do ita hadibaia bona kudou-maoro taudia ita durua Iehova ena hebogahisi amo namo idia davaria totona, unai amo idia roho mauri diba. Paulo be unai maduna ia laloa bada. Ia gwau: “Bema Sivarai Namona lau harorolaia lasi neganai, madi, lau be dika momokani!” Unai gaukara ia laloa bada dainai, ia gwau: “Dirava ena taravatu diba taudia do lau durua, bona Dirava ena taravatu diba lasi taudia danu do lau durua. Sikuli vadaeni taudia do lau durua, sikuli lasi taudia danu do lau durua. Unai dainai lau ura umui dekenai danu Sivarai Namona do lau harorolaia.”—1 Kor. 9:16; Roma 1:14, 15.
Bema inai mai anina bada gaukarana lalonai taunimanima ita hadibaia lasi, Iehova ese ita do ia hahemaoro henia. Iehova ese peroveta tauna Esekiela dekenai ia gwauraia herevana ita diba: “Tanobada tauna e, lau ese Israela bese ena naria tauna be oi do lau halaoa. Oi dekenai lau henia sisiba be idia dekenai do oi hamaoroa. Bema lau gwau dika tauna ta be do ia mase, vadaeni oi ese ia do oi sisiba henia. Do oi hamaoroa iena kara dika do ia rakatania, vadaeni do ia mase lasi. Bema oi ese ia dekenai oi sisiba henia lasi, unai tauna be iena kara dika dainai do ia mase. Bona lau be do lau gwau unai tau ena mase be oiemu kerere dainai.”—Ese. 3:17, 18.
Inai nega dokona lalonai metau dikadia momo idia vara. Unai dainai ruma bese gaudia, moni gaukara, kongrigeisen gaukaradia, bona haroro gaukara ita karaia namonamo totona be mai ena hekwarahi. Ma danu, umui momo be gorere, lalometau, buruka, bona dagedage umui davaria. Bona umui momo be “gaukara metau taudia.” Ai ura bada umui ai durua, Iesu ena hereva hegeregerena: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai.” (Mat. 11:28) Ena be hekwakwanai badadia eiava maragidia umui davaria, to umui ibounai ai hanamoa badina mai emui lalona ibounai ida Iehova umui hesiai henia noho.
Haroro bona hadibaia gaukara umui karaia goadagoada bona Iehova ena hahenamo dainai, tanobada hegegemadai 4,762 be pura ta ta ai idia bapatiso. Hesiai laganina gunanai, kongrigeisen matamatadia 1,375 idia haginia. Ai guriguri inai buka matamatana Baibel be Dahaka Ia Hadibaia?, gado 120 mai kahana ai idia halasia gauna, ese taunimanima milioni momo do ia durua Iehova ena “hahemauri dinana” dekenai Iena hebogahisi mai lalokauna bona maino do idia abia totona.
Namona be umui diba Hakaua Oreana be umui ia lalokau henia bona umui totona ai guriguri. Danu ai totona umui guriguri dainai umui ai tanikiu henia.
Emui tadikaka,
Iehova Ena Witnes Taudia Edia Hakaua Oreana