Baibel be Dahaka Ia Hadibaia? Bukana Ena Stadi Moalelaia
1 “Dirava Badinaia” Distrik Hebouhebou dekenai Baibel be Dahaka Ia Hadibaia? bukana idia halasia neganai, unai be moale bada gauna. Unai buka be haroro gaukara bona Baibel stadi lalonai do ita gaukaralaia momo. Unai dainai, unai buka matamata ita dibaia be namo. Unai do ia vara badina April 17, 2006 ai, unai buka be Kongrigeisen Buka Stadi lalonai do ita stadilaia.
2 Kongrigeisen Buka Stadi naria tauna ese karoa ta ena hamatamaia kahanai idia noho henanadai do ia gwauraia. Bena rau ena henunai idia noho henanadai do ia gaukaralaia stadi ia karaia totona. Baibel ena siri badadia do ia duahia bona herevalaia, bona karoa ena dokonai ia noho maua—“Baibel Ia Hadibaia Gaudia”—do ia gaukaralaia karoa ibounai ia riviulaia totona. Badina unai maua lalonai idia noho herevadia ese karoa ena hamatamaia kahanai idia noho henanadai idia haerelaia. Haere karana do oi moalelaia, badina unai buka be auka lasi dalanai idia torea.
3 Inai buka ena apendiks ese hereva badadia ia gwauraia goevagoeva. Bema Baibel stiuden taudia idia ura hereva ta ena anina idia dibaia namonamo, apendiks dekenai ia noho hereva maorona ta amo idia ita durua diba. Apendiks ena kahana haida be Kongrigeisen ena Buka Stadi ai umui karaia diba. Buka duahia tauna ese apendiks ta ena kahana ibounai do ia duahia, bema kahana ta ia lata, vadaeni paragraf haida idia karaia guna bona ma haida be gabeai. Apendiks ena kahana ai henanadai idia noho lasi. To stadi naria tauna ese apendiks ena hereva badana hahedinaraia totona, helai taudia dekenai henanadai haida do ia henia.
4 Kongrigeisen Buka Stadi dekenai Baibel Hadibaia buka ena stadi be do ia heau haraga. To bema ma haida ida unai buka ita stadilaia bona edia diba Baibel dekenai ia maragi, namona be stadi ita karaia haraga lasi. (Kara 26:28, 29) Baibel stadi ita karaia neganai, namona be siri bona laulau edia anina ita herevalaia namonamo. Unai dainai Baibel be Dahaka Ia Hadibaia? bukana ita stadilaia neganai, namona be wiki ibounai ita lao bona haere ita henia.