Lauma Dalanai Tahua Gaudia Hagugurua Dalana
1 Keristani matamata taudia be Iehova idia lalokau henia bona Iesu ena hereva, ‘basileia tahua guna’ herevana unai, idia laloa bada dainai, unai ese edia lalona ia veria tahua gaudia idia atoa totona. (Mat. 6:33) Emu tahua gauna be reana emu haroro gaukara oi habadaia eiava regula painia gaukara oi ura karaia. Ma haida be reana idia ura Kingdom Hall haginia gaukarana dekenai idia volantia, eiava Betele dekenai idia gaukara. Unai bamona tahua gaudia oi atoa be namo herea!
2 Unai tahua gaudia oi hagugurudia totona, heduru gauna ta be pepa dekenai oi torea. June 1, 2005, Gima Kohorona ia gwau: “[Oi] lalohadailaia tahua gaudia be pepa dekenai [oi] torea neganai, idia hedinarai goevagoeva. Unai dainai, namona be [emu] tahua gaudia bona [oi] hagugurua diba daladia be pepa ta dekenai [oi] torea.” Danu, nega kwadogi lalonai do oi tahua gaudia ese oi ia durua diba oi ura hagugurua gauna oi abia totona.
3 Nega Kwadogi Lalonai Tahua Gaudia: Bema oi do bapatiso lasi, do oi karaia be namo gaudia oi lalohadailaia. Unai oi karaia totona, Baibel ena hadibaia hereva badadia oi diba be namo. To bema oi diba lasi, Baibel Hadibaia buka ibounai stadilaia karana be emu tahua gauna ai oi halaoa, bona oi stadilaia lalonai idia torea siridia ibounai oi duahia be namo. (1 Tim. 4:15) Betele bona Gilead taudia be idia hagoadaia lagani ta lalonai Baibel ibounai idia duahia ore totona, ita danu be unai bamona ita karaia diba, Genese ia lao Apokalupo be lagani tamona lalonai oi duahia haorea be emu tahua gauna ai oi halaoa diba. Unai oi hagugurua murinai, dina ta ta ena Baibel duahiduahi sediual oi badinaia noho. (Sal. 1:2, 3) Emu hetura karana Iehova ida do ia goada ia lao! Oiemu Baibel duahiduahi bona stadi be guriguri amo oi kehoa bona koua, bona oi dibaia gauna oi badinaia be gau badana.—Iam. 1:25.
4 Bema oi bapatiso vadaeni, dahaka tahua gaudia oi atoa diba? Emu hadibaia karana be edena bamona? Hegeregere, oi ura haroro gaukara ai Dirava ena Hereva do oi gaukaralaia namonamo, a? (2 Tim. 2:15) Emu haroro gaukara be edena bamona oi habadaia diba? Emu mauri lagani bona noho dalana hegeregerena nega kwadogi lalonai oi hagugurua diba tahua gaudia oi atoa, bona unai ese oi do ia durua gabeai oi ura hagugurua gauna oi abia totona.
5 Sivarai Namona Ta: Tony, ena mauri lagani be 19, be Iehova ena Witnes taudia edia brens opesi ia vadivadi neganai, unai ese ena lalona ia veria Betele dekenai ia gaukara totona. To, iena mauri ia haidaua lasi bona Dirava dekenai ena mauri ia do gwauhamatalaia lasi. Tony be ena lalona ia hadaia ena kara ia hanamoa totona bona Iehova dekenai ena mauri ia gwauhamatalaia, bona ena tahua gauna be do ia bapatiso. Unai tahua gauna ia hagugurua murinai, ia heduru painia bena regula painia be ena tahua gauna ai ia halaoa, bona ia hamatamaia deit be ena kalenda dekenai ia torea. Lagani haida lalonai painia gaukara ia karaia murinai, ia idia boiria Betele dekenai do ia gaukara totona, mani ena moale oi laloa!
6 Emu tahua gaudia oi hagugurua diba, bema Basileia gaudia oi tahua guna. “Oi ura karaia gaudia ibounai” be Iehova dekenai oi gurigurilaia bona oi gaukara goada emu tahua gaudia oi hagugurudia totona.—Aon. 16:3; 21:5.
[Study Questions]
1. Keristani matamata taudia momo edia tahua gaudia be dahaka?
2. Emu tahua gauna oi hagugurua totona, dahaka oi karaia diba?
3. Bema ta be bapatiso totona ia hegaegae, nega kwadogina lalonai ia tahua diba gaudia haida mani oi gwauraia.
4. Bema ta ia ura Betele dekenai ia gaukara, edena bamona tahua gaudia ia atoa diba unai ia hagugurua totona?
5. Edena dala ai tadikaka ta be nega kwadogi lalonai ia tahua gaudia ese ia ia durua Betele dekenai ia gaukara totona?
6. Dahaka ese oi ia durua diba emu tahua gaudia oi hagugurua totona?