“Moale Diravana” Iehova, Tohotohoa
1 Iehova ia ura taunimanima ibounai idia moale. Baibel be nega vairai Iehova ese taunimanima totona do ia havaraia hahenamo idauidau ia herevalaia, bona unai ita laloa neganai ita moale. (Isa. 65:21-25) Namona be taunimanima idia diba ita be “moale Diravana ena sivarai namona mai hairaina” ita harorolaia dainai ita moale. (1 Tim. 1:11, NW ) Basileia ena sivarai namona ita harorolaia dainai, namona be iseda hereva amo ita hahedinaraia hereva momokani ita ura henia bona ita hereva henia taudia edia namo ita laloa bada.—Roma 1:14-16.
2 Momokani, nega haida moale toana ita hahedinaraia be auka. Teritori haida dekenai taunimanima haida sibona ese Basileia ena sivarai namona idia kamonai. Reana nega haida iseda mauri lalonai hekwakwanai badadia do ita davaria. To ita moale noho totona, Basileia ena sivarai namona ita harorolaia neganai, gau badana be iseda teritori dekenai idia noho taudia ese unai sivarai idia kamonaia bona ena anina idia lalopararalaia. (Roma 10:13, 14, 17) Bema unai ita lalohadailaia, unai ese ita do ia durua Iehova ese hahemauri totona ia karaia dalana, be taunimanima dekenai mai moale ida ita gwauraia hedinarai.
3 Lalona Hagoadaia Gaudia Sibona Herevalaia: Ita gwauraia gaudia ita laloa namonamo guna be namo. Ena be iseda hereva ita hamatamaia neganai, taunimanima ese idia davaria hekwakwanaidia eiava nius dekenai idia halasia gaudia ita herevalaia, to namo lasi unai gaudia sibona ita herevalaia. Badina Baibel ena hahegani be “sivarai namona” ita harorolaia. (Isa. 52:7; Roma 10:15) Unai sivarai namona be Dirava ena gwauhamata vaira nega namona ia herevalaia. (2 Pet. 3:13) Unai dainai, namona be Baibel ena siri idauidau oi gaukaralaia “kudouna idia makohia taudia” do oi durua totona. (Isa. 61:1, 2) Unai ese ita ta ta do ia durua moale toana ita hahedinaraia bona lalona hagoadaia herevadia sibona do ita gwauraia.
4 Bona iseda haroro gaukara ita karaia neganai, taunimanima ese iseda moale toana do idia itaia. Unai dainai, iseda gabu ai idia noho taudia dekenai Basileia ena sivarai namona ita harorolaia neganai, namona be nega ibounai iseda “moale Diravana” Iehova, ita tohotohoa.