Dahaka Oi Atoa Guna?

¹ Ataiai ia noho henanadai be edena bamona do oi haerelaia? Momokani, ita ibounai ita ura Dirava ena Basileia ita atoa guna. (Mat. 6:​33) To, ita sibona ita nanadaia, ‘Lau abia hidi gaudia amo lau hahedinaraia, lau be Basileia lau atoa guna, a?’ Baibel ena hagoadaia herevana ita dekenai be inai: “Umui sibona emui kara do umui tahua” noho. (2 Kor. 13:5) Edena dala ai ita diba, ita be Basileia ita atoa guna?

² Eda Nega: Gau ginigunana be, eda nega ita gaukaralaia dalana ita tahua be namo. (Efe. 5:​15, 16) Pura ta ta ai eda turadia o varavara ida ita herevahereva hebou, televisen o vidio ita raraia, eiava gadara haida ita karaia neganai, nega bada ita halusia kava, a? Bema unai hora bona Dirava tomadiho henia karadia dekenai ita halusia hora ita hahegeregerea, reana do ita hoa bada. Kohu namodia hoia totona, moni gaukara gabunai ovataim ita karaia dainai, nega be hegeregere lasi Iehova ita hesiai henia totona, a? Nega hida hebou o haroro gaukara ita reaia vadaeni, badina ita ura uma gabunai ita gaukara o maketi ai aniani bona ma gau haida ita hoihoilaia? Maketi totona hanua amo taoni ita mai neganai, kongrigeisen heboudia ita rakatania bona Keristani hebamo ena namo ita reaia, a?​​—Sal. 35:18.

³ Mai Anina Bada Gaudia Ita Abia Hidi: Ita momo eda nega be hegeregere lasi, ita ura do ita karaia gaudia ibounai ita karaia totona. Unai dainai Basileia ita atoa guna totona, namona be ita tahua edena gaudia be mai anina bada, bena unai “gau namodia” ita karaia totona nega ita atoa. (Fili. 1:​10) Hegeregere, Baibel ita stadilaia, haroro gaukara ita karaia, iseda ruma bese ita naria, bona Keristani heboudia ita lao. (Sal. 1:​1, 2; Roma 10:​13, 14; 1 Tim. 5:8; Heb. 10:​24, 25) Ma gau haida, hegeregere eksasais bona moale karadia ita karaia be namo. (Mar. 6:​31; 1 Tim. 4:8) To, namo lasi unai gaudia ese Dirava ena Basileia tahua guna karana idia koua.

⁴ Tadikaka ta be Dirava ena Basileia ia tahua guna dainai, painia gaukara ia karaia to sikuli badana ia lao lasi​—herevana unai sikuli ese ia durua diba gabeai moni gaukara ia davaria totona. Tadikaka be gado ta ia dibaia bona haroro taudia momo lasi gabuna dekenai ia lao. Ia gwau: “Iniseniai lau moale bada. Haroro gaukara be namo herea! Namona be matamata taudia ibounai be unai bamona idia karaia, bena lau abia moalena do idia mamia. Iehova hesiai henia karana be gau ma ta ese ia hanaia lasi.” Oibe, Dirava ena Basileia atoa guna karana ese hahenamo ia mailaia ita dekenai, to gau badana be inai: unai kara ese iseda guba Tamana Iehova ia hanamoa bada.​​—Heb. 6:​10.