Emu Nega Gaukaralaia Namonamo
1 Iehova ita ura hamoalea karana ese iseda lalona ia veria, iseda mauri lalonai tomadiho karadia ita atoa guna. Dirava ena Hereva ese ita ia hadibaia ‘Basileia do ita tahua guna’ bona ‘gau namodia edia toana do ita diba.’ (Mat. 6:33; Fili. 1:10) Iseda mauri lalonai Basileia ita atoa guna bona anina maragi gaudia ita tahua lasi totona, edena dala ai iseda nega ita gaukaralaia namonamo?—Efe. 5:15-17.
2 Basileia Atoa Guna: Sediual namona oi karaia, unai amo emu nega be anina lasi gaudia dekenai oi haorea lasi. Haida be hua ena matamana ai, edia kalenda dekenai dina haida idia makaia haroro gaukara totona. Bena idia naria namonamo, gau ma haida ese edia palani ia hadikaia lasi. Unai hegeregerena, hebou, sibona eda stadi, bona hebouhebou badadia totona nega ita atoa. Momo ese palani idia karaia, daba eiava adorahi kahana ai Baibel idia duahia totona. Nega oi atoa mai anina bada gaudia ta ta oi karaia totona, bona namo lasi gau ma haida ese unai mai anina bada gaudia edia nega ia abia.—Had. 3:1; 1 Kor. 14:40.
3 Tanobada Gaudia Dekenai Nega Halusia Lasi: Tano haida dekenai, momo ese gadara idauidau, moale karadia, bona unai bamona gaudia ma haida idia tahua goadagoada. Momo ese nega bada idia halusia TV idia raraia, kompiuta idia gaukaralaia, eiava varavara taudia ida idia kiki momo. To, bema iseda nega be gaukara idauidau bona inai tanobada ena kohu matamatadia dekenai ita halusia, unai ese moale do ia mailaia lasi. (1 Ioa. 2:15-17) Unai dainai, Baibel ese ita ia hagoadaia inai tanobada ena “gau namodia” momo ita tahua lasi. (1 Kor. 7:31) Unai aonega sisibana oi badinaia neganai, oi hahedinaraia emu mauri lalonai Iehova tomadiho henia karana oi atoa guna.—Mat. 6:19-21.
4 Inai tanobada lalonai nega be ia ore haraga noho. Basileia idia tahua guna taudia be do idia moale bona Dirava ena lalonamo do idia abia. (Aon. 8:32-35; Iam. 1:25) Unai dainai, namona be inai mai anina bada gauna, nega, ita gaukaralaia namonamo.