Lalokau—Haroro Gaukara ai Anina Namona Ia Havaraia
1 “Lau dekenai umui mai, lau ese laga-ani do lau henia umui dekenai.” (Mat. 11:28) Unai hereva ese ia hahedinaraia, Iesu be taunimanima ia lalokau henia bada. Ita be Keristani taudia dainai, ita ura Iesu ita tohotohoa, bona idia lalometau taudia dekenai lalokau ita hahedinaraia. Sivarai namona ita harorolaia neganai, edena bamona iseda lalokau ita hahedinaraia diba?
2 Hereva Amo: Iesu be taunimanima ia lalokau henia dainai, sivarai namona be taunimanima ibounai dekenai ia harorolaia. (Ioa. 4:7-14) Lalokau dainai do ita ura gabu bona nega idauidau ai ita haroro. Mauri lagani 6 kekeni maragina be hospital ai doketa ia naria noho lalonai, ena badinai ia helai hahine ia haroro henia. Dahaka ese ena lalona ia veria unai bamona ia karaia totona? Ia gwau, “Unai hahine be Iehova ia diba be namo.”
3 Moale toana ita hahedinaraia bona ita hereva namo henidia, unai amo ita hahedinaraia idia ita laloa bada. Ma haida idia hereva neganai ita kamonai namonamo, idia herevalaia gauna dainai ita hanamodia, bona edia namo ita laloa bada, unai amo lalokau ita hahedinaraia. (Aon. 15:23) Iesu hegeregerena, Basileia ena sivarai namona bona Iehova ese taunimanima totona ia hahedinaraia hebogahisi ita herevalaia be namo.—Mat. 24:14; Luka 4:18.
4 Kara Amo: Iesu ia ura tauanina dalanai taunimanima ia durua. (Mat. 15:32) Haroro gaukara lalonai, taunimanima dekenai hebogahisi-mai-lalokauna ita hahedinaraia diba danu. Taihu ta ia itaia hahine ta be telefon ai ia hereva, bona toana be unai hahine ia hekwarahi telefon dekenai ia hereva tauna ena hereva ia lalopararalaia totona. Unai dainai taihu ese ia durua bona telefon amo ia hereva tauna ena hereva be unai hahine dekenai ia hahanaia. Unai kara dainai, taihu be unai hahine ida Baibel idia herevalaia diba, bona unai hahine be Baibel stadi ia abia dae. Sivarai ma ta be, tadikaka be lou henia ia karaia neganai, ia itaia ruma tauna be ia hekwarahi noho helai gauna ta be ruma lalonai ia atoa vareai totona. Unai dainai tadikaka ese ia durua bona unai helai gauna be ruma lalonai idia atoa vareai. Tadikaka ese ia durua murinai, tadikaka be unai helai gauna dekenai ia helai bona ruma tauna ida Baibel stadi idia hamatamaia.
5 Haroro gaukara ita karaia neganai, iseda lalokau Dirava bona iseda dekena taudia dekenai ita hahedinaraia. (Mat. 22:36-40) Iseda hereva bona kara amo lalokau ita hahedinaraia neganai, kudou-maoro taudia be do idia laloparara hereva momokani be ita ese ita abia loaloa.