Ma Haida Hadibaia Iehova Idia Lalokau Henia Totona
1 Iehova ena ladana oi kamonai negana ginigunana oi laloatao, a? Dahaka dainai Iehova kahirakahira oi lao? Kudou-maoro taudia momo be oi do idia hamaoroa idia be Iehova ena hebogahisi bona lalokau idia diba neganai, unai ese idia ia veria Iehova kahirakahira idia lao totona.—1 Ioa. 4:8.
2 “Inai be Iseda Dirava”: Baibel Hadibaia bukana be Iehova ena lalokau bona Ia ida ita hetura karana ia herevalaia. Edena dala ai unai buka amo ma haida ita hadibaia Dirava idia lalokau henia totona? Baibel ena point matamata ta ita kikilaia neganai, namona be stadi tauna ena lalona do ia veria henanadai ita henia, hegeregere: “Inai hereva momokani ese Iehova ena kara be edena bamona ia hahedinaraia?” o “Edena dala ai inai point ese ia hahedinaraia Iehova be eda Tamana hereadaena?” Unai dala amo stadi tauna ita hadibaia neganai, stadi tauna be ena mauri lalonai Iehova do ia tura henia.
3 Bema Baibel stadi taudia ita durua idia laloparara Iehova idia diba be hahenamo ta, idia be Isaia bamona do idia gwau: “Inai be iseda Dirava.” (Isa. 25:9) Dirava ena Hereva ita kikilaia neganai, namona be ita hahedinaraia edena dala ai Iehova ese ena ura be Keriso Iesu ena gavamani amo do ia hagugurua bena taunimanima do ia hanamoa.—Isa. 9:6, 7.
4 Ita Hahedinaraia Iehova Ita Lalokau Henia: Ita diba mai eda kudouna bona lalona ibounai ida Iehova ita lalokau henia be maoro. To danu, Iehova ena laloa dalana ita abia dae bona ita badinaia be gau badana. (Sal. 97:10) Ena be hahetoho bona dagedage idia vara, to bema Dirava ena taravatu ibounai ita badinaia, iseda kara ibounai idia helaga bona Dirava ena kara ita tohotohoa, anina be ita hahedinaraia ita be Dirava ita lalokau henia.—2 Pet. 3:11; 2 Ioa. 6.
5 Dirava ita lalokau henia dainai ena ura ita karaia be moale gauna. (Sal. 40:8) Namona be stadi tauna ia diba, Dirava ese taravatu ia henia ena hesiai taudia ia durua totona. (Deu. 10:12, 13) Bema ta be Iehova ena hakaua herevadia ia badinaia, anina be ia hahedinaraia ia be Iehova ena kara namodia ibounai ia moalelaia. Namona be stiuden oi durua ia laloparara, Iehova ena taravatu ia badinaia tauna be do ia lalohisihisi lasi.
6 Dirava Lalokau Henia Taudia Edia Hahenamo: Iehova be ia idia lalokau henia manau taudia ia hanamoa, bona idia dekenai ena “laloa dobu gaudia” ia hadibaia. (1 Kor. 2:9, 10) Idia be Iehova ena ura idia diba dainai, idia laloparara vaira negana ai be dahaka do ia vara bona idia naria noho. (Ier. 29:11, NW ) Iehova idia lalokau henia taudia be Iehova ese ia hanamodia. (Eso. 20:6) Idia diba mauri hanaihanai do idia abia, badina Dirava ese ia lalokau henidia.—Ioa. 3:16.
7 Bema iseda guba Tamana ita diba namonamo, ma haida dekenai Iena sivarai do ita harorolaia. (Mat. 13:52) Momokani, iseda natudia o ma haida ita hadibaia Iehova idia lalokau henia be hahenamo hereadaena! (Deu. 6:5-7) Iehova ena “kara namodia” ita mamia dainai, namona be nega ibounai ita bona iseda Baibel stadi taudia ita hekwarahi Iehova ita hanamoa totona.—Sal. 145:7.
[Study Questions]
1. Dahaka dainai haida be Iehova kahirakahira idia lao?
2, 3. Edena dala ai Baibel Hadibaia bukana amo Baibel stadi taudia ita hadibaia Dirava idia lalokau henia totona?
4, 5. Iehova lalokau henia ena anina be dahaka?
6. Iehova idia lalokau henia taudia be dahaka hahenamo idia abia diba?
7. Ma haida oi hadibaia Iehova idia lalokau henia totona be edena bamona oi laloa?