Hakaua Oreana Amo Ia Mai Revarevana
Iehova Ena Witnes Taudia E:
Ita be Iehova, guba bona tanobada edia Lohiabadana ena ladana ita abia be hahenamo badana! Unai ladana be ia noho hanaihanai, do ia dika diba lasi, bona ladana ma haida amo ia be hereadae. Iehova ese ita dekenai unai ladana ia henia, bona lagani 1931 amo ema bona hari taunimanima idia diba ita be unai ladana ita abia. (Isa. 43:10) Mai moale bada ida ita sibona ita gwauraia, Iehova ena Witnes taudia.
Satani Diabolo be ia hekwarahi bada Dirava ena ladana ia hadikaia totona. Ia ese taunimanima ia hakaua kerere dainai idia ese Iehova ena ladana idia dadaraia. Babulonia Badana, tomadiho koikoi ibounai ena badina, ese Iehova ena ladana idia inai henia bona idia ese Baibel momo amo idia kokia. To, Iesu be ena Tamana ena ladana ia abia isi, bona unai ladana be iena hahediba taudia dekenai ia hadibaia Lohiabada ena guriguri lalonai ia gwauraia guna. Ia gwau: “Unai dainai, inai bamona do umui guriguri: ‘Aiemai Tamana e, guba dekenai oi noho, oiemu ladana do ai hahelagaia.’ ” (Mat. 6:9) Gabeai, Iesu ese ena Tamana ia guriguri henia neganai, ia gwau: ‘Tanobada ai lau dekenai oi henia taudia dekenai be oiemu ladana lau hadibaia vadaeni.’ (Ioa. 17:6) Ita be Iesu ena haheitalai namona ita tohotohoa dainai, ita ura tanobada hegegemadai Iehova ena ladana do ita harorolaia goadagoada.
Lagani 2009 ena siri badana, “Sivarai namona harorolaia gaukarana hagugurua” ese ita ia hagoadaia iseda haroro gaukara ita karaia goadagoada totona. (Kara 20:24) Ita diba hesiai laganina 2009 lalonai Iehova be iseda hesiai gaukarana ia hanamoa bada. Iseda haroro gaukara be tanobada hegegemadai ita karaia bona unai ese Iehova ena ladana ia hanamoa bada. Haroro gaukara idia karaia pablisa taudia edia namba matamatana be 7,313,173. Idia ese hari inai negai, hekwakwanai idia davaria kudou-maoro taudia idia hadibaia bona idia durua edia hekwakwanai hanamoa daladia idia dibaia totona. Memorial dekenai idia mai taudia edia namba be 18,168,323 bona unai ese ia hahedinaraia inai tanobada dikana ia do ore lasi lalonai, momo be Iehova ena ladana do idia hanamoa.
Iehova ese iseda gaukara ia do koua lasi neganai, ita be mai iseda goada ida dala idauidau do ita gaukaralaia eda teritori ai idia noho taudia dekenai Basileia ena sivarai namona do ita harorolaia. (Mat. 24:14; Mar. 13:10) Ena be ruma-ta-ruma-ta dekenai, dala dekenai, revareva amo, telefon amo o nega bona dala idauidau ai ita haroro, to gau badana be mai goada ida Iehova ena ladana bona iena ura be taunimanima dekenai do ita hadibaia.
Badina namona dainai ita abia dae momokani, kahirakahira Iehova be kara ta do ia karaia iena ladana ia hahelagaia totona. (Ese. 36:23) Nega ia mai kahirakahira vadaeni Iena ladana idia hadikaia taudia ibounai edia hereva do ia koua. Unai nega ai mai abidadama ida Iehova idia badinaia taudia ibounai be do idia moale, badina idia be Iehova ena ladana idia hanamoa bona iena lohia siahuna idia abia isi!
Lagani 2009 lalonai tanobada hegegemadai “Gima Noho!” Distrik bona Intenesenel Hebouhebou ese ia hahedinaraia goevagoeva, Iehova be mai ena lalokau ida ena taunimanima ia naria noho. Dirava ena orea ena histori lalonai, unai hebouhebou be mai anina bada, badina ita ia hagoadaia do ita gima noho bona Iehova ena dina do ita naria noho.—Mar. 13:37; 1 Tes. 5:1, 2, 4.
Momokani, Iehova be ita ia kara namo henia bona ita dekenai moale ia henia. Ia ese rei namona bona ranu namona gabuna dekenai ita ia hakaua lao ita laga-ani totona.—Sal. 23:1, 2; 100:2, 5.
Vaira hua lalodiai Basileia ena sivarai namona oi harorolaia goadagoada noho lalonai, namona be oi abia dae momokani, Iehova ese emu gaukara do ia hanamoa!
Tanobada hegegemadai tadikaka oreana dekenai emai Keristani lalokau ai siaia,
Emui tadikaka,
Iehova Ena Witnes Taudia Edia Hakaua Oreana