Mai Anina Bada Gaukarana
1. Haroro gaukara ita laloa bada dainai dahaka gaudia do ita gaukaralaia?
1 Dahaka dainai tadikaka be nega ibounai ita idia hagoadaia haroro gaukara ai iseda nega, goada, bona kohu ita gaukaralaia totona? Badina unai be gaukara hereadaena! Bema unai gaukara ena namo ita laloa dobu, do ita ura dikadika gabeai do ita karaia lou diba lasi gaukarana ita karaia.—Kara 20:24.
2. Edena dala ai haroro gaukara amo Iehova ena ladana badana ita hahelagaia?
2 Iehova Ena Ladana Hahelagaia: Haroro gaukara ai ita hahedinaraia Iehova ena Basileia—Iesu ese do ia lohiaia gauna—ese taunimanima edia hekwakwanai ibounai bona gavamani ibounai do ia haorea. (Mat. 6:9, 10) Iehova ita hanamoa badina ia sibona ese gorere bona mase amo ita do ia hamauria. (Isa. 25:8; 33:24) Iena ladana ita huaia dainai, ma haida be iseda kara namodia bona hekwarahi idia itaia neganai, idia ese Iehova idia hanamoa. (1 Pet. 2:12) Ita moale badina taunimanima ibounai dekenai Siahu Ibounai Lohiabadana, Iehova, ena ladana ita gwauraia hedinarai!—Sal. 83:18.
3. Basileia ena sivarai idia kamonai taudia be dahaka hahenamo do idia abia?
3 Taunimanima Ia Hamauria: Iehova “ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Pet. 3:9) To, bema hadibaia tauna be lasi, edena dala ai taunimanima do idia diba Iehova ena matanai dahaka kara be dika bona dahaka kara be namo? (Iona 4:11; Roma 10:13-15) Taunimanima ta ta ese sivarai namona idia kamonai bona idia badinaia neganai, edia mauri dalana idia hanamoa bona kara dikadia idia dadaraia. (Mika 4:1-4) Ma danu, idia moale badina mauri hanaihanai ena helaro idia diba. Hanaihanai haroro bona hadibaia gaukarana ita karaia neganai, ita bona ita idia kamonai henia taudia ese mauri do idia davaria. (1 Tim. 4:16) Inai mai anina bada gaukarana ita karaia be hahenamo badana!
4. Dahaka dainai nega ibounai Basileia harorolaia bona hahediba taudia halaoa gaukarana ita karaia be namo?
4 Kahirakahira hisihisi badana ese inai tanobada dikana do ia hadikaia ore haraga. To, Iehova ena kahanai idia gini taudia be do idia roho mauri. Unai dainai, hari inai negai, haroro bona hahediba taudia halaoa gaukarana ita karaia haraga be mai anina bada, bona taunimanima momo do ita durua. Unai dainai, iseda mauri lalonai inai gaukara ita atoa guna be gau badana!—Mat. 6:33.