Nega Matamata Baibel Ena Kahana Haida​—Kahana 1

New World Translation of the Holy Scriptures Baibel be tulu namona, badina Iehova ena taunimanima edia abidadama ia hagoadaia bona idia ia durua sivarai namona be taunimanima dekenai idia harorolaia totona. Hari, Nega Matamata Baibel, Mataio-Apokalupo ita abia dainai, ita moale. Edena dala ai ita gaukaralaia diba, eda abidadama ita hagoadaia, bona stadi taudia bona haroro ai ita davaria kamonai taudia ita durua totona? Mani Nega Matamata Baibel ena kahana haida ita itaia.

Mapu: Iesu ese tanobada dekenai ena hesiai gaukara ia karaia lalonai, ia raka ena daudau be edena bamona? Evanelia bukadia ai idia gwauraia gabudia bona taoni be edeseniai? Paulo be edena gabudia ai ena misinari loaloa ia karaia? Aena amo ia raka bona bouti amo ia lao edia daudau be edena bamona? Unai gaudia ita diba neganai, ita do ia durua Iesu ena hesiai gaukara bona Paulo ena loaloa sivaraidia ita lalopararalaia bona ita mamia unai gaudia be idia vara momokani. Nega Matamata Baibel ai ia noho mapu rua be Iesu ena negai idia noho Baibel tanodia idia hahedinaraia. Vaira kahanai ia noho mapu ena ladana be “Iesu Ena Negai Idia Noho Tanodia.” Bona mapu ma ta be “Palestine, Iesu Ena Hesiai Gaukara Negana Lalonai,” rau 609 ai ia noho. Paulo ena misinari loaloa ita badinaia totona, Baibel ena rau ginigabedia rua oi itaia. Paulo ia loaloa gabudia ta ta be laini mai edia kala idauidau amo idia makaia.

Rau ta ta Edia Hereva Kwaradia: Nega Matamata Baibel ena rau momo edia atai kahanai hereva kwaradia idia noho. Unai hereva kwaradia ese henunai idia noho herevadia idia hahedinaraia, bona pablisa ia durua taunimanima edia henanadai ena haere ia davaria haraga totona. Hegeregere, reana ta ese rara ita abia lasi ena badina ia henanadailaia. Bona ita diba rara ia herevalaia sirina be Kara bukana ai ia noho. (Helai taudia noia edia Baibel idia kehoa Kara bukana ai bona nega oi henia idia davaria totona.) Ita kehoa lao Kara bukana huanai bona hereva kwaradia ta ta ita itaia, bena rau 256 ai hereva kwarana ladana: “Kopina utua herevana. Rara abia lasi” ita itaia. Unai hereva be rau ena hereva kwarana ena kahana iharuana bona ia hahedinaraia rara ia herevalaia sirina be unai rau ena idiba kahanai ia noho. Ia be siri 20 ai ita itaia. Bema ia be hereva kwarana ena kahana ginigunana ai ia noho, anina be unai hereva be rau ena lauri kahanai ia noho.

Futnout: Nega Matamata Baibel, Mataio-Apokalupo be mai ena futnout momo. Futnout ai hereva ma haida ese Baibel duahia tauna idia durua ia laloparara namonamo totona. Futnout ai hereva haida be dala ma ta ai idia hahanaia, bona hereva ma haida edia anina idia gwauraia, bona apendiks ena namba idia noho, Baibel ai idia gaukaralaia hereva haida edia anina hahedinaraia totona. Hegeregere, Kara 13:15 bona ena futnout ita duahia. Dahaka ita dibaia? (Inai kahana ia naria tadikaka ese haere ia gwauraia diba o helai taudia ia noia idia haere totona.)

Futnout ai hereva haida be dala ma ta ai idia hahanaia ena haheitalai ta be Kara 6:13 ai. (Duahia.) Inai hereva “Taravatu” ena anina be “Mose ena Taravatu.”

Danu, futnout ese ita ia durua Baibel ena sivarai ita lalopararalaia namonamo totona. Kara 17:18 ai idia noho futnout oi itaia. (Mani siri bona futnout rua duahia.) Unai futnout edia hereva ese ita idia durua Paulo ese ia haroro henia taudia edia mauri dalana ita dibaia namonamo totona. Eiava Mataio 27:62 oi kehoa. (Mani siri bona futnout duahia.) Inai futnout ese Sabati totona idia karaia gauna ia herevalaia.

Danu, futnout ai idia noho herevadia ese haroro gaukara ai ita idia durua. Haroro gaukara ai, pablisa ta be ruma tauna ida “hel” idia herevalaia neganai, ia ese ruma tauna ia hamaoroa ena Baibel ai Mataio 18:9 do ia itaia, siri ia gwau: “Ia namo, mai emu matana tamona mauri dekenai do oi vareai, ia namo lasi mai emu matana ruaosi danu, hel ena lahi dekenai oi do idia negea diho.” Bona Pablisa ese unai siri tamona be Nega Matamata Baibel amo ia duahia diba, siri ia gwau: “Do ia namo bema matana tamona sibona ida mauri oi abia, to namo lasi mai matana rua ida Gehena lahina lalonai oi idia negea.” Bena ia ese inai hereva “Gehena” ena futnout ia itaia, futnout ia gwau, “Ierusalema murimuri ai momoru idia gabua gabuna. Apendiks 9 itaia.” Apendiks 9 ese Grik herevana Gehena ena anina ia hahedinaraia namonamo. (Kehoa bona paragraf 2, 4, bona 5 duahia.) Unai ese kudou-maoro taudia do ia durua hel ena anina korikori idia dibaia totona.

Mani emu kara Nega Matamata Baibel ena kahana idauidau oi dibaia namonamo noho. Sibona emu stadi bona haroro gaukara ai oi gaukaralaia, unai amo emu abidadama oi hagoadaia, bona emu stadi taudia bona haroro ai oi davaria taudia oi durua.

This article is unique to PNG