Haroro Gaukara Karaia Namonamo
1. Edena dala ai haroro gaukara dekenai, 1 Korinto 9:26 be mai anina bada?
1 Aposetolo Paulo ia gwau: “Lau be dala ia diba lasi bona ia heau kava tauna bamona lau heau lasi. Bona lau be hodahoda ia paisia kava tauna bamona, lau paisi lasi.” (1 Kor. 9:26) Paulo ia hahedinaraia, ena tahua gauna be Iehova ia hesiai henia namonamo. To danu, haroro gaukara dekenai unai hakaua herevana be mai anina bada. Ita ura haroro gaukara ita karaia namonamo, unai amo anina namona do ia havaraia. Edena dala ai?
2. Haroro gabudia bona negadia abia hidi totona, edena dala ai Paulo bona ma haida ita tohotohoa?
2 Taunimanima Idia Noho Gabudiai Haroro: Paulo bona ena negai idia noho haroro taudia ma haida be taunimanima idia noho gabudiai idia haroro. (Kara 5:42; 16:13; 17:17) Bema eda teritori lalonai adorahi ai momo be edia ruma ai idia noho, reana unai be nega namona ruma-ta-ruma-ta gaukara ita karaia. Dabai bona adorahi ai taunimanima momo be basi stopu ai idia noho, a? Edena negai teritori ai idia noho sitoa gabudiai taunimanima momo idia noho? Reana unai bamona negadiai dala harorona ita karaia.
3. Edena dala ai eda teritori ita karaia namonamo?
3 Teritori Karaia Namonamo: Gau ibounai ita laloa namonamo be namo, unai amo iseda teritori ai haroro gaukara ita karaia namonamo. Hegeregere, bema teritori be tamona to haroro grup be bada, namona be grup naria tauna ese grup ia hapararaia kahana rua dekenai, unai amo ia hekwarahi lasi bona nega ia haorea kava lasi. Unai hegeregerena, bema gabu daudauna ta ita lao haroro totona, bona pablisa haida sibona ese teritori tamona idia karaia, taunimanima momo ita hereva henia bona teritori ita haorea haraga diba. Haroro naria tauna amo gwaumaoro ita abia diba ruma kahirakahira ia noho gabudia be eda haroro teritori ai ita halaoa, unai amo nega bada ita halusia lasi gabu daudau lao totona.
4. Dahaka ese ita ia durua “taunimanima haoda henia taudia” namodia ai ita lao totona?
4 Iesu ia gwau haroro taudia be “taunimanima haoda henia taudia” bamona. (Mar. 1:17) Haoda tauna ena ura badana be gwarume do ia abia. Unai dainai, ia diba edeseniai bona edena negai gwarume do ia davaria bona nega ia halusia kava lasi to maoromaoro ia haoda. Oibe, haoda taudia be edia gaukara idia karaia namonamo. Namona be ita danu ita gaukara goada haroro gaukara ita karaia namonamo totona.—Heb. 6:11.