Baibel Stadi Hamatamaia—Hegeregere Lasi Lalohadai Hanaia
1. Dahaka dainai haida idia laloa idia hegeregere lasi Baibel stadi ta idia hamatamaia totona?
1 Oi laloa oi hegeregere lasi Baibel stadi ta oi hamatamaia totona, a? Idaunegai abidadama hesiai taudia, hegeregere Mose bona Ieremia be nega haida idia laloa idia hegeregere lasi edia hesiai gaukara idia karaia totona. (Eso. 3:10, 11; 4:10; Ier. 1:4-6) Momo be unai bamona idia laloa danu. Edena dala ai unai lalohadai ita hanaia diba?
2. Dahaka dainai ita laloa lasi ruma-ta-ruma-ta gaukara sibona ita karaia, to Baibel stadi be haida ese do idia karaia?
2 Namona be ita laloatao: Iehova be ita ia doria lasi, ita karaia diba lasi gaudia ita karaia totona. (Sal. 103:14) Unai dainai taunimanima “hadibaia” bona “hahediba taudia” halaoa gaukarana ita karaia diba. (Mat. 28:19, 20) Iehova ese Baibel stadi karaia daladia idia diba momo taudia sibona dekenai unai gaukara ia henia lasi. (1 Kor. 1:26, 27) Unai dainai, namo lasi ita laloa ruma-ta-ruma-ta gaukara sibona do ita karaia, bona Baibel stadi hamatamaia gaukara be haida ese do idia karaia.
3. Edena dala ai Iehova ese ita ia durua Baibel amo ta ita stadi henia totona?
3 Iehova ese Ita Ia Durua: Iehova ena heduru amo hahediba taudia halaoa gaukarana ita karaia diba. (2 Kor. 3:5) Iena orea amo ita dekenai Baibel ena hereva momokani ia hadibaia, bona tanobada ena aonega bada taudia momo be unai idia diba lasi. (1 Kor. 2:7, 8) Dirava ese Baibel ai Hadibaia Tauna Badana, Iesu, ena hadibaia daladia ia atoa, ita tohotohoa totona, bona kongrigeisen amo ita dekenai treinini ia henia noho. Danu, Baibel amo ma haida ita hadibaia totona Iehova be heduru gaudia ma haida ia henia. Unai heduru gauna ta be Baibel Hadibaia bukana, unai buka ese auka lasi dalanai hereva momokani ia herevalaia bona ita lalopararalaia haraga diba. Unai dainai, Baibel amo ta ita stadi henia be auka lasi.
4. Dahaka dainai ita diba Iehova be ita do ia durua?
4 Mose bona Ieremia be Iehova ese ia durudia dainai, edia gaukara idia hagugurua diba. (Eso. 4:11, 12; Ier. 1:7, 8) Ita danu be Iehova ita noia diba ita ia durua totona. Danu, Baibel amo ta ita stadi henia neganai, ita be ia dekenai Iehova ena sivarai momokanina ita hadibaia, bona unai kara be Dirava ese ia moalelaia. (1 Ioa. 3:22) Unai dainai, namona be emu tahua gauna be, Baibel stadi ta oi hamatamaia, unai be emu hesiai gaukara oi moalelaia dalana ta.