Hahediba Tauna ai Oi Lao Diba!
1 Ma ta dekenai hereva momokani hadibaia karana be gaukara hereadaena ta. Ita itaia ta be Basileia ena sivarai namona ia kamonai bona ia ita durua tanobada bona guba edia King badana kahirakahira ia lao neganai, unai be moale gauna. (Iam. 4:8) Pablisa ibounai edia tahua gauna be inai: Hereva momokani ia ura henia tauna ta idia hadibaia bona idia itaia ena mauri, toana, bona kara ia haidaua matamaia.—Mat. 28:19, 20.
2 Iehova Dekenai Oi Tabekau: Gunaguna, kamonai taudia haida idia laloa idia be hegeregere lasi Iehova ia henia gaukarana idia karaia totona. To, Iehova tabekau henia karana ese Mose, Ieremia, Amosa, bona ma haida ia durua unai lalohadai kererena idia dadaraia bona mai anina bada gaukarana idia karaia totona. (Eso. 4:10-12; Ier. 1:6, 7; Amo. 7:14, 15) Aposetolo Paulo danu be mai “gari lasi” ida ia haroro. Dahaka dainai? Paulo ia gwau, ‘Dirava ese lau ia hagoadaia.’ (1 Tes. 2:2) Momokani, namona be ita ibounai be Iehova dekenai ita tabekau, unai amo Ia ese ita do ia durua, aonega do ia henia, bona ita dekenai goada do ia henia Baibel stadi namodia ita karaia totona.—Isa. 41:10; 1 Kor. 1:26, 27; 1 Pet. 4:11.
3 Iehova Ena Hadibaia Dalana Abia Dae: Iseda Hadibaia Tauna Hereadaena, Iehova Dirava, be nega ibounai Baibel amo ita ia hadibaia, unai amo ita be hadibaia taudia namodia ai ita lao diba. (Isa. 54:13; 2 Tim. 3:16, 17) Unai hadibaia karana oi abia dae dalana be inai: Gau ibounai oi gaukaralaia Baibel ena hereva edia anina oi lalopararalaia namonamo, bona hereva momokani hadibaia daladia oi hanamoa. Unai dainai, ena be Tiokratik Haroro Sikuli bona Hesiai Hebou be ita idia durua unai bamona ita karaia totona, to kongrigeisen ena hebou ma haida ese ita idia durua danu Dirava ena Hereva amo taunimanima ita hadibaia totona.
4 Oi gaukara goada auka lasi daladia haida oi dibaia, Baibel ena dobu herevadia oi hadibaia namonamo totona. Haroro Sikuli bukana, rau 227 ai ia gwau: “Namona be do oi herevalaia gauna oi lalo-pararalaia namonamo guna, bema oi ura ma haida ese idia lalo-pararalaia dalanai oi hahedinaraia.” Kongrigeisen heboudia dekenai haere ita henia neganai, unai ese ita idia durua hereva badadia ita laloatao, gabeai eda haroro gaukara dekenai ita gaukaralaia totona. Unai dainai oi hegaegae namonamo, unai amo oi be hadibaia tauna namona ai do oi lao.
5 Momokani, Keristani hesiai taudia rua be hahediba taudia halaoa gaukarana idia karaia hebou neganai, ta be ma ta amo diba ia abia. (Luka 10:1) Bema mai dalana, Baibel stadi gaukara oi karaia neganai, namona be haroro gaukara dekenai ia manada pablisa ta, painia ta, elda ta, o loaloa naria tauna oi bamoa. Bena idia ese iseda buka lalonai idia noho auka lasi haheitalai, laulau, bona gau ma haida idia gaukaralaia hereva momokani ena anina idia hahedinaraia dalana oi itaia totona. Idia oi nanadaia dahaka oi karaia diba hadibaia tauna namona oi lao totona. (Aon. 1:5; 27:17) Unai bamona tadikaka o taihu ese oi idia hadibaia karana oi laloa bada be namo, badina Dirava be unai dala amo oi ia hadibaia.—2 Kor. 3:5.
6 Iehova dekenai oi tabekau, bona iena orea amo idia mai hadibaia daladia oi abia dae. Unai gaudia amo namo bada oi abia totona, namona be Iehova oi guriguri henia. (Sal. 25:4, 5) Oi danu oi moale diba bema oi ese ta oi durua oi bamona ia karaia totona, anina be Baibel ena hereva ia hadibaia tauna namona ai ia lao!
[Askim Bilong Stadi]
1. Pablisa ta ta edia tahua gauna badana be dahaka?
2. Dahaka dainai pablisa haida be idia ura lasi Baibel stadi idia karaia, bona dahaka ese idia ia durua Baibel stadi idia karaia totona?
3, 4. Iehova be edena dala ai ita ia hadibaia ena Hereva ita hadibaia namonamo totona?
5. Iehova be edena dala ma ta amo ita ia durua hadibaia taudia namodia ai ita lao totona?
6. Dahaka ita karaia diba, unai amo ita be Dirava ena Hereva hadibaia tauna ta ai ita lao?