Lagani 100 Lalonai Basileia Harorolaia!
1. Lagani handred gunanai, Iehova ena taunimanima be dahaka hagoadaia herevana idia abia?
1 “Itaia, King ia lohia! Umui be King ena hereva gwauraia taudia. Unai dainai umui haroro, haroro, haroro, King bona iena basileia umui harorolaia.” Lagani handred bamona gunanai, Tadikaka Rutherford ese unai hereva amo Iehova ena taunimanima ia hagoadaia Basileia sivaraina be tanobada ibounai dekenai idia harorolaia totona. Bona ita be unai ita karaia! Keristani taudia ginigunadia bamona, ita ese Basileia ena sivarai namona be ‘tanobada hegegemadai ita harorolaia’ vadaeni. (Kol. 1:23) Lagani handred lalodiai, dahaka ita karaia vadaeni Dirava ena Basileia ita harorolaia totona? Basileia ena lohia laganina 100 ena aniveseri ia kahirakahira lalonai, edena dala ai ita haroro noho diba?
2. Edena dala ai iseda magasin ese Dirava ena Basileia idia harorolaia?
2 Gunaguna amo: Lagani momo lalodiai, iseda magasin ese Dirava ena Basileia idia harorolaia. Lagani 1939 amo, iseda magasin ginigunana ena ladana be, Gima Kohorona Iehova Ena Basileia Ia Harorolaia. Nega momo unai magasin ese Basileia bona Basileia ese do ia karaia gaudia ia herevalaia. Danu, Awake! magasin ese ia hahedinaraia Dirava ena Basileia ese taunimanima edia hekwakwanai ia haorea diba. Hari, unai magasin rua be gado momo ai idia hahanaia bona tanobada hegegemadai ita hariharilaia!—Apok. 14:6.
3. Edena dala haida amo Basileia ita harorolaia?
3 Iehova ena taunimanima be dala idauidau amo Basileia idia harorolaia. Guna, ita ese saun motuka, reidio, bona rekodi masini ita gaukaralaia. Ena be unai negai pablisa be momo lasi, to unai bamona gaudia ese ita idia durua sivarai namona be taunimanima momo dekenai ita harorolaia totona. (Sal. 19:4) Vanegai laganidia ai, ita ese jw.org ai gau momo ita atoa, unai amo taunimanima milioni momo—iseda gaukara idia taravatua tanodia ai idia noho taudia danu—dekenai Basileia ita harorolaia.
4. Edena dala matamatadia amo Basileia ita harorolaia?
4 Danu, Iehova ena taunimanima ese dala matamatadia amo Basileia sivaraina idia harorolaia. Hegeregere, lagani 1990 murinai, ita be pablik gabudiai, motuka atoa gabudiai, bona bisinesi gabudiai ita haroro. Vanegai, tanobada hegegemadai ita be siti ena pablik gabudiai ita haroro. Danu, kongrigeisen momo be edia teritori ena pablik gabudiai teibolo o troli ai pablikeisen idia atoa, taunimanima ese idia abia totona. To, ruma-ta-ruma-ta haroro gaukarana be Basileia ita harorolaia dalana badana.—Kara 20:20.
5. Hesiai lagani matamatana lalonai, momo be dahaka do idia karaia?
5 Vaira Negana: September ai, hesiai lagani matamatana ia matamaia neganai, momo be do idia regula painia. Oi danu do oi regula painia, a? Bema lasi, nega ta ta heduru painia oi karaia diba, a? Herevana do oi painia o lasi, to Iehova ese emu hekwarahi o palani do ia hanamoa, unai amo Basileia do oi harorolaia.—Mal. 3:10.
6. Dahaka dainai October 2014 be spesel huana?
6 October 2014 ai, Basileia be lagani 100 ia lohia vadaeni. Unai dainai, unai hua ena pablik Gima Kohorona ese Dirava ena Basileia do ia herevalaia. Namona be unai Gima Kohorona be taunimanima momo dekenai ita hariharilaia. Vaira negana ita laloa neganai, namona be kamonai taudia ibounai dekenai “Dirava ena Basileia ena sivarai namona” ita harorolaia noho.—Kara 8:12.