Hadibaia Gaukara ai Ita Gaukaralaia Tulu Idauidau
1. Edena dala ai Keristani taudia be kapenta tauna bamona?
1 Kapenta taudia ese tulu idauidau idia gaukaralaia. Tulu haida be nega ibounai idia gaukaralaia, to tulu haida be nega haida sibona idia gaukaralaia. Kapenta idia diba momo taudia edia tulboks ai hanaihanai idia gaukaralaia tulu idauidau idia noho, bona gaukaralaia daladia idia diba namonamo. Unai hegeregerena, Baibel ese Keristani taudia ia hagoadaia haroro gaukara idia karaia bona ‘edia gaukara dekenai idia hemarai lasi.’ (2 Tim. 2:15) Ita dekenai edena tulu be mai anina bada? Baibel—unai tulu badana amo ‘hahediba taudia halaoa’ gaukarana ita karaia. (Mat. 28:19, 20) Unai dainai, namona be ita hekwarahi ‘hereva momokani hadibaia maoromaoro’ taudia ai ita lao totona. To, eda hadibaia gaukarana lalonai tulu haida ita gaukaralaia hanaihanai, bona Keristani taudia ese unai tulu gaukaralaia daladia idia diba namonamo. Unai amo taunimanima dekenai hereva momokani idia hadibaia.—Aon. 22:29.
2. Hadibaia gaukara ai, dahaka tulu idauidau ita gaukaralaia diba?
2 Ita Gaukaralaia Tulu Idauidau: Baibel sibona lasi, to edena tulu idauidau ita gaukaralaia danu be namo? Baibel ena hereva momokani ita hadibaia tulu badana be, Baibel be Dahaka Ia Hadibaia? bukana. Emu Baibel stiuden ida unai buka umui haorea murinai, “Dirava Ena Lalokau Lalonai Do Umui Noho” bukana umui gaukaralaia diba. Unai amo ia dibaia hakaua herevadia be ena mauri lalonai ia badinaia. Unai dainai, namona be unai pablikeisen rua gaukaralaia daladia ita diba namonamo. Danu, eda hadibaia gaukarana ai buklet haida ita gaukaralaia be namo. Hegeregere, Dirava ena Sivarai Namona! buklet be tulu ta Baibel stadi hamatamaia totona. Iseda teritori ai, haida be duahiduahi idia diba namonamo lasi, eiava gado ma ta idia herevalaia—iseda buka o magasin be edia gado ai ita hahanaia lasi eiava haida sibona ita hahanaia—taudia dekenai, Dirava Oi Kamonai Henia eiava Dirava Oi Kamonai Henia Bena Oi Mauri Hanaihanai buklet ita gaukaralaia diba. Baibel stiuden taudia ese orea ena heau dalana idia diba totona, Daidia be Hari Iehova Ena Ura Idia Karaia Noho? buklet ita gaukaralaia. Danu, vidio haida ese ita idia durua, hadibaia gaukarana ita karaia totona. Hegeregere, Dahaka Dainai Baibel Oi Stadilaia?, Kingdom Hall Lalonai Dahaka Ia Vara?, bona Does God Have a Name?, unai tulu idauidau ita gaukaralaia daladia ita diba be namo.
3. Gabeai do idia halasia Iseda Basileia Gaukara pepadia ese ita do ia durua, dahaka ita karaia totona?
3 Gabeai do idia halasia Iseda Basileia Gaukara pepadia ese ita do ia durua, hadibaia gaukara ai pablikeisen idauidau gaukaralaia namonamo daladia ita diba totona. Bema ita hekwarahi unai tulu idauidau ita gaukaralaia namonamo, ita ese inai sisiba ita badinaia, ia gwau: “Oi sibona bona emu hadibaia hereva dekenai oi naria namonamo. Unai gaudia oi badinaia noho, badina unai bamona oi karaia neganai, oi sibona bona oi dekenai idia kamonai taudia do oi hamauria.”—1 Tim. 4:16.