“Taunimanima Idauidau Ibounai” Haroro Henia
1. Edena dala ai haroro gaukara idia manadalaia taudia be gaukara diba momo tauna bamona?
1 Gaukara diba momo tauna be mai ena tulu momo, bona ia diba edena negai bona edena dala ai unai tulu ta ta do ia gaukaralaia. Unai hegeregerena, ita be mai eda tulu idauidau, ita idia durua eda haroro gaukara ita hagugurua totona. Hegeregere, idia halasia buklet idauidau ese ita idia durua “taunimanima idauidau ibounai” ita haroro henia totona. (1 Kor. 9:22) Iseda Basileia Gaukara ena udaia pepana ai buklet haida edia lista ia noho, ia hahedinaraia unai buklet be daidia totona, bona edena dala ai do ita hariharilaia.
2. Edena negai buklet ita gaukaralaia?
2 Buklet Gaukaralaia Negana: Gaukara diba momo tauna be tulu maorona do ia gaukaralaia ena gaukara ia karaia totona. Unai hegeregerena, buklet maorona ita gaukaralaia bema ita laloa unai ese ta do ia durua, herevana unai be hua ena henia gauna lasi. Hegeregere, bema henia gauna be Baibel Hadibaia bukana, bona ita haroro henia taudia be Baibel idia laloa bada lasi, namona be buklet maorona ita henia bona edia ura ita habadaia, unai murinai Baibel Hadibaia bukana ita hahedinaraia.
3. Dahaka dainai haroro gaukara ena tulu idauidau ita gaukaralaia namonamo?
3 Baibel ese gaukara karaia namonamo taudia ia hanamoa. (Aon. 22:29) Momokani, hari inai negai “sivarai namona harorolaia gaukarana” be mai anina bada. (Roma 15:16) Unai ‘gaukara dekenai ita hemarai lasi’ totona, namona be ita hekwarahi iseda tulu idauidau ita gaukaralaia namonamo.—2 Tim. 2:15.