KERISTANI TAUDIA EDIA MAURI DALANA
Edena Bamona Baibel Stadilaia Namonamo Tauna Ai Oi Lao Diba?
Hahetoho oi davaria neganai, oi ura Daniela hegeregerena emu abidadama dekenai oi gini goada, a? Daniela ese Dirava ena Hereva ia stadilaia namonamo, peroveta hereva dobudia danu. (Da 9:2) Baibel stadilaia namonamo karana ese emu abidadama ia hagoadaia. Edena dala ai? Unai ese oi ia durua Iehova ena gwauhamata oi abidadama henia goada totona. (Ios 23:14) Danu, emu lalokau Dirava dekenai do ia bada bona oi ia durua kara maoromaoro oi karaia totona. (Sa 97:10) To Baibel ai dahaka gaudia oi stadilaia diba? Mani inai heduru herevadia haida ita laloa.
Dahaka Gaudia Do Lau Stadilaia? Kongrigeisen heboudia totona hegaegae karana be emu stadi ena sediual ai oi atoa diba. Wiki ta ta ena Baibel duahiduahi oi moalelaia diba, bema nega oi atoa oi lalopararalaia lasi point haida oi tahua totona. Ma danu, haida be Baibel ena peroveta herevadia idia stadilaia, ma haida be Dirava ena lauma huahua idauidau, ma haida be aposetolo Paulo ena misinari loaloa, bona ma haida be Iehova ese ia havaraia gaudia idia stadilaia. Bema dina lalonai Baibel ena henanadai ta oi laloa, oi torea diho bona gabeai stadi oi karaia neganai, unai oi tahua diba.
Edeseniai hereva ma haida lau tahua diba? Dala ma haida dibaia totona, vidio ladana Baibel Henanadai Edia Haere Tahua Tulu oi itaia. Emu diba tohoa totona, namona be oi tahua, Daniela karoa 7 ese ia herevalaia dagedage animal idauidau ese edena basileia badadia ia laulaulaia.
Stadi totona hora hida lau atoa be namo? Dirava ida eda hetura karana ia goada totona, stadi hanaihanai karana be mai anina bada. Reana matamanai nega kwadogina lalonai stadi oi karaia diba, bona metairametaira stadi ena nega oi halataia diba. Dirava ena Hereva stadilaia karana be tano oi geia dava bada nadi oi tahua bamona, unai oi davaria neganai, do oi ura oi tahua noho! (Ao 2:3-6) Unai amo emu ura Dirava ena Hereva dekenai do oi habadaia, bona Baibel stadilaia hanaihanai karana be emu mauri ibounai lalonai do oi karaia.—1Pe 2:2.
DANIELA KAROA 7 AI, DAGEDAGE ANIMAL ESE DAHAKA IDIA LAULAULAIA?
HENANADAI MA HAIDA:
Daniela 7:8, 24 ena hereva be edena bamona ia guguru?
TAHUA GAUNA MA TA:
Apokalupo 13 ai, dagedage animal ese dahaka idia laulaulaia?