Emu Tadikaka Ida Maino Oi Karaia Guna​—⁠Edena Dala ai?

Mani oi laloa: Oi be Iesu ena negai Galilea dekenai oi noho. Bona oi be Ierusalema dekenai oi lao Au Raurau Ruma Maragidia edia Aria moalelaia totona. Siti be tomadiho hebou vadivadi taudia amo ia honu, idia be daudau bona kahirakahira gabudia amo idia mai. Oi ura Iehova dekenai emu boubou gauna oi henia. Unai dainai, nanigosi ta oi abia bona varo amo oi veria bena hutuma huanai oi raka, dubu helaga dekenai oi lao totona. Oi ginidae neganai, dubu be taunimanima ese idia hahonua vadaeni, badina idia danu idia ura edia boubou gauna idia henia. Emu nega ia ginidae vadaeni hahelaga tauna dekenai emu nanigosi oi henia totona. Unai oi do karaia lasi lalonai, oi laloatao oi be mai emu hekwakwanai emu tadikaka ida bona ia be reana hutuma huanai o siti lalonai ia noho. Iesu ese unai hekwakwanai hamaoromaoroa dalana ia gwauraia. (Mataio 5:24 Duahia) Edena dala ai oi bona emu tadikaka be maino umui karaia diba, Iesu ena hakaua dalana hegeregerena? Henunai idia noho lista ai, haere maorona oi makaia.

NAMONA BE . . .

• emu tadikaka ida oi kiki bema oi laloa badina maorona dainai ia badu

• oi hekwarahi emu tadikaka ena laloa dalana oi hamaoromaoroa bema oi laloa ia badu kava o ia gwau unai hekwakwanai ena badina be emu kerere

• mai haheauka ida oi kamonai namonamo bema emu tadikaka be ena lalohekwarahi ia gwauraia, ena be ena hereva oi laloparara lasi, to iena hemami oi hahisia dainai mai momokani ida sori herevana oi gwauraia

NAMONA BE EMU TADIKAKA ESE . . .

• kongrigeisen taudia haida dekenai emu kerere ia gwauraia hedinarai

• oi ia gwau henia, oi karaia gaudia ibounai ia gwauraia lou, bona ia ura emu kerere oi gwauraia hedinarai

• ia dekenai oi hahedinaraia manau bona boga auka karana ia laloa bada bona mai kudouna ibounai ida emu dika ia gwauatao

Ena be hari iseda tomadiho lalonai animal ita bouboulaia lasi, to Iesu ia ura dahaka ita dibaia iseda tadikaka ida maino ita karaia bona Dirava ia ura henia tomadiho dalana dekenai?