Hepapahuahu be Edena Bamona Oi Hamaoromaorodia Diba?

Imamu oi naria namonamo lasi​—bona gau ta latanai idia gini hebou galasi elefanti 5 amo ihatoina be ia moru diho. Unai ia makohia gauna do ia namo lou be namo. Bema lasi, unai elefanti orea toana ena namo be ia boio. To, hanamoa dalana be ia auka, bona oi laloa oi hegeregere lasi oi karaia totona. Namona be ta ese oi ia durua eiava unai gaukara ia diba namonamo tauna oi hamaoroa do ia karaia totona.

LAUMA dalanai, tadikaka bona taihu idia lalo-tamona be gau badana, unai kara ena namo ese herahera gaudia edia namo ia hanaia momokani. Salamo torea tauna be ane dekenai ia hereva maoro, ia gwau: “Itaia! Tadikaka idia noho hebou mai edia lalo-tamona ida, unai be namo bona mai ena moale danu!” (Salamo 133:1) Keristen tadikakana ta danu hepapahuahu ia vara neganai, nega haida hamaoromaoroa dalana be ia auka. Danu, haida be dala kererena amo idia hamaoromaoroa toho. Nega momo “hanamoa dalana” ese taunimanima dekenai hisihisi ia henia kava eiava ia be dala maorona lasi, unai dainai bero dikana ia henia.

Hepapahuahu ia vara neganai, ena be Keristen taudia haida be sibodia idia hamaoromaoroa diba to idia karaia lasi, idia ura dagi gaukara idia karaia elda taudia ese idia hamaoromaoroa. Reana unai bamona idia ura badina idia diba lasi dahaka do idia karaia. Baibel amo sisiba henia dalana ia manadalaia tadikakana ia gwau: “Hepapahuahu idia vara neganai, iseda tadikaka momo be Baibel ena sisiba be edena bamona idia badinaia diba unai hepapahuahu idia hamaoromaoroa totona, idia diba lasi.” Ma ia gwau: “Nega momo, idia be Iesu ena kara idia tohotohoa lasi.” Vadaeni, Keristen tauna be ena tadikakana ta ida ia hepapahuahu neganai, Iesu ia gwau edena dala amo do ia hamaoromaoroa be namo? Dahaka dainai unai sisiba herevana ita diba namonamo bona badinaia dalana ita diba be gau badana?

Hepapahuahu Maragidia

“Unai dainai, oiemu harihari gauna pata helaga dekenai oi atoa gwauraia neganai be do oi laloa guna, oiemu tadikakana dekenai mai emu kerere. Bema unai bamona, oiemu harihari gauna pata helaga ena vairana dekenai do oi rakatania, oi lao, oiemu tadikakana danu maino do umui ruaosi karaia guna, gabeai oi giroa lou, oiemu harihari gauna Dirava dekenai do oi henia.”​—Mataio 5:​23, 24.

Iesu be unai hereva ia gwauraia neganai, Iuda taudia vaia edia kara, boubou gaudia idia henia, eiava Ierusalem dekenai, dubu ena pata dekenai harihari gaudia idia henia. Bema Iuda tauna be ena Israel tadikakana ta dekenai kerere ia havaraia, ia ese animal ta ibounai ena gole-oho boubouna, eiava kara dika totona boubou ma ta ia henia diba. Iesu ia gwauraia herevana be mai anina bada negana lalonai idia laloatao. Tau ta be pata helagana dekenai ena harihari gauna be Dirava dekenai ia henia gwauraia neganai, bema ena tadikaka ta be ia dekenai ia badu, unai ia laloatao. Oibe, namona be Israel taudia idia lalo-parara edia tadikaka danu maino do idia karaia guna, bena gabeai unai tomadiho karana do idia karaia be gau badana.

Ena be Mose ena Taravatu henunai, unai bamona boubou gaudia idia henia taravatu dainai, to Dirava ena matana dekenai idia be gau bada hereana lasi. Peroveta tauna Samuel be abidadama lasi Pavapava Saulo dekenai ia gwau: “Iehova ese idia gabua boubou gaudia bona boubou idauidau ia moalelaidia bada, to Iehova ena hereva kamonai henia karana ia moalelaia maragi, a? Oi laloa, kamonai ese boubou ia hereaia, hereva kamonai henia ese mamoe maruanedia edia digara ia hereaia.”​—1 Samuel 15:22.

Ena Haroro ororo dekenai lalonai, Iesu ese dahaka do idia karaia guna ia gwauraia hedinarai, bona ena hahediba taudia ia hamaorodia gau badana be edia hepapahuahu do idia hamaoromaorodia guna, gabeai edia boubou gaudia idia henia. Hari inai negai, Keristen taudia be lauma dalanai boubou gaudia idia henia​—‘inai hanamoa Dirava do ita henia nega ibounai, boubou gauna bamona. Oibe, ita ese iseda uduna bibina dekenai ia do ita gwauraia hedinarai.’ (Heberu 13:15) To, unai hereva ena anina ia idau lasi. Aposetolo Ioane danu ese ia hahedinaraia bema tau ta ia gwau Dirava ia lalokau henia, to ena tadikaka ta ia badu henia, unai tau ena hereva be anina lasi.​—1 Ioane 4:​20, 21.

Inai oi laloa, bema tau ta ia diba ena tadikaka ta ia habadua, hamaoromaoroa totona ia ese kara ta do ia karaia guna. Unai amo ia hahedinaraia ia be mai ena manau bona reana namo do ia havaraia diba. Bema ia habadua tauna dekenai ia lao, bona sibona ena kerere ia hahedinaraia, ia habadua tauna be reana ena hereva do ia abia dae bona idia lalo-tamona lou diba. Mose ena Taravatu ia gwau bema tau ta ena kohu idia henaoa, do idia henia lou bona do idia atoa kau gauna ma ima do idia henia danu. (Levitiko 6:5) Unai hegeregerena, maino, bona lalo-tamona havaraia lou do ia haraga bema badu ia havaraia tauna ese ia hahedinaraia ia ura namo ia havaraia, unai ena anina be ia ura ena kerere ia hamaoromaoroa.

Ena be maino idia havaraia lou toho, to nega haida idia kwalimu lasi. Hereva Lada-isidia bukana lalonai, ita ia hadibaia bema ta ia badu noho, hepapahuahu hamaoromaoroa be ia auka. Hereva Lada-isidia 18:19 ia gwau: “Idia habadua tadikaka be hanua aukana ta bamona; bona heiriheiri be kohoro ta ena auri bamona.” Baibel ma ta dekenai, ia gwau: “Idia habadua tadikakana be hanua goadana kwalimu henia toho bamona, ia auka herea: Bona edia hepapahuahu be ruma badana ena auri bamona.” (The Englishman’s Bible) To, bema tadikaka idia ura Dirava idia hamoalea, mai edia ura bona mai edia manau danu hepapahuahu idia hamaoromaoroa diba. To kara dika badana ia vara neganai, Iesu ena sisiba Mataio karoa 18 idia badinaia be gau badana.

Hepapahuahu Badadia Hamaoromaorodia

“Oiemu tadikakana ese kara dikana bema ia karaia oi dekenai, do oi lao ia dekenai, ena kerere do oi hedinaraia, umui ruaosi sibona do umui herevalaia. Bema oiemu hereva ia kamonai henia neganai, oi be oiemu tadikakana ena lalona oi hamaoromaoroa vadaeni. To bema oiemu hereva ia kamonai lasi, tau ta, o tau rua danu do umui lao, vadaeni oiemu samani hereva do oi hamomokania inai taudia edia vairana dekenai. To umui rua o umui toi emui hereva bema ia kamonai lasi neganai, ekalesia ena hebou dekenai do umui hamaoroa. Ekalesia hebou danu ena hereva bema ia kamonai lasi, oi dekenai idau bese tauna o takisi gogoa tauna hegeregerena do oi halaoa.”​—Mataio 18:​15-17.

Bema Iuda (eiava gabeai, Keristen) tauna be Iehova ia tomadiho henia tauna danu idia hepapahuahu bada be edena bamona? Bema ta ia laloa ta be ia dekenai ia kara dika, hamaoromaoroa totona ia be kara ta do ia karaia guna. Idia ruaosi sibodia do idia herevahereva guna. Bema sibona ena namo hamomokania totona haida edia heduru ia tahua lasi, ena tadikaka danu maino do idia davaria lou haraga diba, unai be ia momokani bema hepapahuahu ia vara ena badina be ta be hereva ta ia kamonai kerere neganai. Kerere ia vara neganai bema unai taudia sibodia be unai kerere idia diba, do idia hamaoromaoroa haraga diba.

To, reana sisiba hereva ginigunana idia badinaia to hepapahuahu idia hamaoromaoroa lasi. Bema unai bamona, Iesu ia gwau: “Tau ta, o tau rua danu do umui lao.” Reana idia be kerere idia itaia taudia unai. Reana ta ese ma ta ena ladana ia hadikaia idia kamonai, eiava idia danu idia noho unai taudia ruaosi ese kontraka hereva idia torea neganai, to hari idia hepapahuahulaia dainai idia hakaudia lao hamomokania totona. Eiava, unai tau ruaosi idia hakaua lao badina hekwakwanai ia vara ena badina idia kikilaia neganai, gabeai idia torea eiava idia herevalaia gaudia idia hamomokania diba. To, taunimanima haida sibona​—hegeregere “tau ta, o rua” sibona​—be unai hekwakwanai idia diba be namo. Unai neganai, bema ta ia kamonai kerere dainai hekwakwanai ia vara, kerere do ia habadaia lasi.

Namona be dika ia davaria tauna ena ura be dahaka? Dala ia tahua ena Keristen tadikaka do ia hahemaraia bona unai neganai ia sibona ia matauraia diba lasi, a? Iesu ena sisiba herevana dainai, namo lasi Keristen taudia be karaharaga edia tadikaka idia gwauraidia dika. Bema ta ese ma ta dekenai dika ia havaraia, bona ena kerere dainai ia helalo-kerehai, sori herevana ia gwauraia, bona ia havaraia dika gauna ia hamaoromaoroa toho, ia kara dika henia tauna ese ena ‘tadikakana ena lalona ia hamaoromaoroa vadaeni’​—Mataio 18:15.

Bema edia hepapahuahu idia hamaoromaoroa diba lasi, kongregesen do idia hadibaia be gau badana. Gunaguna, unai ena anina be Iuda elda taudia idia hadibaia, to gabeai Keristen kongregesen ena elda taudia idia hadibaia. Ia helalo-kerehai lasi kara dika tauna be reana kongregesen murimurinai do idia atoa. Unai ena anina be unai tau be “idau bese tauna o takisi gogoa tauna” hegeregerena do idia halaoa, Iuda taudia be unai bamona taudia amo idia siri. Unai be mai anina bada karana bona Keristen tauna ta sibona ese unai ia karaia diba lasi. Dagi gaukara idia karaia elda taudia, kongregesen naria taudia unai, sibodia be mai edia maoro unai kara idia karaia totona.​—Korinto Ginigunana 5:13 itaia.

Ia helalo-kerehai lasi kara dika tauna be orea murimurinai idia atoa diba, bona unai ese ia hahedinaraia Mataio 18:​15-17 ena hereva be kerere maragidia ia gwauraia lasi. Unuseniai, Iesu be kerere badadia ia gwauraia, to idia hepapahuahu taudia ruaosi ese unai kerere be reana idia hamaoromaoroa diba. Hegeregere, tau ta ese ma tau ta be hereva amo ia hadikaia, bona unai ese taunimanima vairanai ena ladana ia hadikaia. Eiava moni dainai reana idia hepapahuahu, badina murina siri ma haida dekenai, Iesu ese hesiai tauna ta ena abitorehai bada idia gwauatao to hesiai tauna ma ta dekenai ia hebogahisi lasi ena parabole herevana ia gwauraia. (Mataio 18:​23-35) Reana hekwakwanai ta ia vara dainai, ta ese ena abitorehai monina be nega korikori dekenai ia henia lou diba lasi, to bema abitorehai tauna bona moni ia henia tauna be ruaosi do idia herevahereva namonamo neganai, hekwakwanai do ia vara lasi. To bema abitorehai tauna be ia ura lasi ena abitorehai ia henia lou, unai be henaohenao karana, bona unai be kara dika badana.

Kara dika ma haida be Keristen taudia ruaosi sibodia idia hamaoromaoroa diba lasi. Mose ena Taravatu henunai, kara dika badadia idia gwauraidia hedinarai be gau badana. (Levitiko 5:1; Hereva Lada-isidia 29:24) Unai hegeregerena, bema kara dika ta ia vara bona unai ese kongregesen ena goeva karana ia hadikaia diba, namona be unai kara be Keristen elda taudia dekenai ita gwauraia hedinarai.

To, Keristen taudia idia hepapahuahulaia gaudia momo be gau maragidia dainai ita gwauraia hedinarai be anina lasi.

Oi Gwauatao Diba, A?

Iesu ese hepapahuahu badadia hamaoromaorodia dalana ia gwauraia hedinarai murinai, ia ese inai mai anina bada karana ia hadibadia. Ita duahia: “Petero be Iesu dekenai ia lao, ia gwau, ‘Lohiabada e, lauegu tadikakana do ia hadikaia lau dekenai, bona ena dika do lau gwauatao ela bona nega hida? Nega 7, o?’ Iesu ia gwau, ‘Umui lau hamaoroa, nega 7 sibona lasi, to nega 70×7.’ ” (Mataio 18:​21, 22) Ma nega ta ai, Iesu ese ena hahediba taudia dekenai ia gwau, “dina tamona dekenai nega 7” dika do idia gwauatao. (Luka 17:​3, 4) Vadaeni, ia hedinarai goevagoeva, Keriso murinai idia raka taudia ese edia hepapahuahu idia hamaoromaoroa totona, dika idia gwauatao heheni be gau badana.

Unai ita karaia totona ita hekwarahi bada be gau badana. Inai sivarai ena hereva ginigunana ta lalonai, tadikaka ta ia gwau: “Tadikaka haida be dika gwauatao dalana idia diba lasi.” Ma ia gwau: “Idia hoa bema ta ese ia hamaorodia kara dika idia gwauatao diba, badina unai be mai anina bada kara ginigunana Keristen kongregesen lalonai maino havaraia totona.”

Aposetolo Paulo ia toretore, ia gwau: “Bema tau ta ese ena bamona tauna ia maumauraia, ia kara dika henia dainai, namona be unai dika do ia gwauatao. [Iehova] ese umui emui dika ia gwauatao, vadaeni unai bamona do umui karaia danu.” (Kolose 3:13) Vadaeni, bema tadikaka ta ese ita ia habadua, ia dekenai ita do lao lasi neganai, namona be inai henanadai ita lalodia namonamo: Ia karaia gauna dainai lau hereva henia be gau badana, eiava? Lau be mai egu dala guna ia vara gauna lau laloaboio totona, unai be Keristen ena kara dainai, a? Bema ia lau kara dika henia, lau ura egu dika ia gwauatao, a? Danu, bema lau ura lasi ena dika lau gwauatao, Dirava ese lauegu guriguri do ia haerelaia bona egu dika do ia gwauatao, a? (Mataio 6:​12, 14, 15) Unai henanadai ese ita idia durua haida edia dika ita dekenai ita gwauatao totona.

Ita be Keristen taudia dainai, iseda maduna badana ta be Iehova ena taunimanima edia kongregesen lalonai maino ita havaraia. Unai dainai, namona be Iesu ena sisiba ita badinaia. Unai ese ita ia durua dika ita gwauatao heheni totona. Dika ita gwauatao heheni neganai, unai ese tadikaka lalokau heheni karana do ia habadaia bona unai kara be Iesu ena hahediba taudia edia toana.​—Ioane 13:​34, 35.

[Picture on page 23]

Iesu ena sisiba idia badinaia neganai, Keristen taudia be edia hepapahuahu idia hamaoromaoroa diba