Mauri Moalelaia Hanaihanai! Gaukaralaia Iehova Bona Iesu Dekenai Emu Abidadama Hagoadaia Totona

Dirava hamoalea totona, Baibel stiuden ese ena abidadama ia hagoadaia be namo. (He 11:6) Mauri Moalelaia Hanaihanai! bukana ita gaukaralaia amo edia kudouna ita hamarerea diba. Inai buka lalonai mai anina bada siridia, auka lasi herevadia, lalona veria henanadai, vidio, bona laulau namodia idia noho. Bema stiuden oi durua Keristani kara namodia ia hahedinaraia bona Dirava ida ena hetura karana ia hagoadaia totona, oi be lahi ese idia hadikaia lasi gaudia amo ruma oi haginia.​—1Ko 3:12-15.

Taunimanima haida idia laloa Dirava idia tura henia diba lasi, badina Ia idia itaia diba lasi. Unai dainai namona be idia ita durua Iehova do idia dibaia bona idia abidadama henia.

VIDIO LADANA IEHOVA DEKENAI ABIDADAMA HAGOADAIA TOTONA, “MAURI MOALELAIA HANAIHANAI!” GAUKARALAIA ITAIA, BENA INAI HENANADAI HAERELAIA:

• Edena bamona ita diba taihu be stadi totona ia hegaegae namonamo?

• Edena dala ai taihu be henanadai namodia ia gaukaralaia stiuden ia durua Isaia 41:10, 13 dekenai ena lalohadai ia gwauraia totona?

• Vidio bona Baibel siridia ese edena dala ai stiuden ia durua?

Taunimanima momo ese mauri davana idia lalopararalaia lasi, eiava idia laloa lasi unai be Dirava ena harihari gauna idia dekenai. (Ga 2:20) Unai dainai, namona be idia ita durua Iesu ena mauri davalaia boubouna idia abidadama henia totona.

VIDIO LADANA IESU DEKENAI ABIDADAMA HAGOADAIA TOTONA, “MAURI MOALELAIA HANAIHANAI!” GAUKARALAIA ITAIA, BENA INAI HENANADAI HAERELAIA:

• Edena bamona ita diba tadikaka be stadi totona ia hegaegae namonamo?

• Edena dala ai tadikaka ese kahana ladana, “Referens Itaia” ia gaukaralaia namonamo stiuden ia durua totona?

• Dahaka dainai stiuden dekenai guriguri be mai anina bada?