Haroro Gaukara ai Mauri Moalelaia Hanaihanai! Bukana Gaukaralaia

Ita moale badina Baibel stadi karaia totona, buklet bona buka matamata ita abia! Iehova ita guriguri henia iseda hekwarahi ia hanamoa, momo be hahediba taudia ai ita halaoa totona. (Mt 28:18-20; 1Ko 3:6-9) Inai tulu matamatadia be edena bamona do ita gaukaralaia?

Mauri Moalelaia Hanaihanai! Baibel stadi amo unai oi dibaia bukana, ese hadibaia dala matamatana ia hahedinaraia. Baibel stadi totona oi hegaegae bona stadi oi karaia totona inai hakaua daladia oi badinaia diba.a

• Pablikeisen duahia bona henanadai herevalaia

• Stiuden ida “duahia” siridia umui duahia, bona ia oi durua iena mauri lalonai do ia badinaia daladia ia laloa totona

• Vidio oi hahedinaraia murinai, idia atoa henanadai umui herevalaia

• Stadi lalonai leseni ta umui haorea diba

Haroro gaukara lalonai kamonai tauna ena ura oi habadaia totona, buklet oi hariharilaia guna (Maua ladana, “Vadivadi Ginigunana ai, Mauri Moalelaia Hanaihanai! Buklet Hariharilaia Dalana” itaia.) Bema stiuden ida buklet umui stadilaia ore bona ia ura stadi noho, buka oi henia bona leseni 4 amo umui hamatamaia. Bema oi be ta ida Baibel Hadibaia bukana eiava Dirava Ena Lalokau bukana umui stadilaia noho, namona be Mauri Moalelaia Hanaihanai! bukana dekenai umui hanaia.

VIDIO LADANA EMU BAIBEL STADI TOTONA OI AI WELKAM HENIA ITAIA, BENA INAI HENANADAI HAERELAIA:

• Inai buka matamatana amo Baibel stiuden be dahaka do ia dibaia?

• Dahaka dainai inai vidio be stiuden matamatana dekenai oi hahedinaraia be namo?

• Stiuden oi durua dahaka tahua gaudia ia atoa bona hagugurua totona?​—Maua ladana, “Inai Oi Laloa Bona Tahua Gaudia Edia Kahana” itaia