Hari oi hagaegae diba kahirakahira ia mai tanobada namona totona
Tanobada Paradaiso Matamatana be Kahirakahira!
Dirava ese tanobada ia karaia unai amo kara maoromaoro taudia ese do idia noholaia ela bonahanaihanai. (Salamo 37:29) Ia ese tau bona hahine ginigunadia, Adamu bona Heva, be gabu hairaina, Eden umana lalonai ia atodia, bona maduna ia henia idia dekenai. Idia bona edia natudia ese tanobada do idia birulaia bona naria.—Genese 1:28; 2:15.
Hari tanobada be Dirava ese ia karaia Paradaiso amo ia hegeregere lasi. To, Dirava ena ura ia haidaua lasi. Edena dala ai ena ura korikorina do ia hagugurua? Atikol ginigunana ese ia hahedinaraia Dirava be ita noholaia tanobadana do ia hadikaia lasi. To, ia ese abidadama taudia dekenai do ia henia bona do idia noholaia. Dirava ena gwauhamata ia hagugurua neganai, tanobada ai mauri be edena bamona?
Tanobada gavamani tamona
Kahirakahira, Dirava ena gavamani matamata ese guba amo taunimanima ibounai ia lohiaia neganai, tanobada be moale gabuna ai do ia lao, bona taunimanima be maino ai do idia noho hebou bona mai moale ida gaukara namodia do idia karaia. Dirava ese Iesu ia abia hidi tanobada ia lohiaia totona. Hari taunimanima idia lohiaia taudia be idau, Iesu bamona lasi, badina Iesu be ia lohiaia taudia edia namo do ia laloa bada. Iena lohia siahuna ena badina be lalokau. Ia be hariharibada, hebogahisi bona hahemaoro maorona do ia karaia King.—Isaia 11:4.
Taunimanima ibounai be Lalotamona ai do idia noho
Gau ta ese tanobada ai idia noho taudia ibounai do ia hapararaia lasi. Taunimanima ibounai be lalotamona ai do idia noho. (Apokalupo 7:9, 10) Tanobada ai do idia noho taudia ibounai be Dirava bona edia dekena taudia do idia lalokau henia. Mai maino ida do idia gaukara hebou tanobada idia naria totona, unai be Dirava ese tanobada ia karaia neganai, iena ura hegeregerena.—Salamo 115:16.
Maino ia noho tanobada bona mauri gaudia huanai
Dirava ena Basileia ese tanobada ia lohiaia neganai, Havaraia Tauna ese lai bona medu do ia biagua, dika do idia havaraia lasi. (Salamo 24:1, 2) Iesu be tanobada ai ia noho neganai, Dirava ese ia henia siahuna ia hahedinaraia badina lai badana ia gwau henia neganai, lai ia doko. (Mareko 4:39, 41) Keriso ena lohia siahuna henunai, taunimanima be lai gubana eiava medu badana do idia gari henia lasi. Dirava ena Basileia henunai taunimanima bona tanobada ena mauri gaudia ibounai be maino ai do idia noho, matamana negana ai hegeregerena.—Hosea 2:18.
Helt namona bona aniani momo
Taunimanima ibounai do idia moale helt namona dainai. Tau ta be do ia gorere, buruka eiava mase lasi. (Isaia 35:5, 6) Taunimanima be gabu hairaina bona goevana ai mauri do idia moalelaia, Adamu bona Heva be Eden umana lalonai idia noho hegeregerena. Eden hegeregerena, tanobada matamata lalonai tano ese aniani idauidau momo do ia havaraia dainai, taunimanima do idia hitolo lasi. (Genese 2:9) Idaunegai Dirava ena bese Israela taudia hegeregerena, Paradaiso lalonai taunimanima ese edia ‘paraoa do idia ania bona do idia bogakunu.’—Levitiko 26:4, 5.
Maino bona noho namona
Dirava ena gavamani henunai, taunimanima ibounai be maino ai do idia noho, ta ta do idia hebogahisi bona kara namo henia. Tuari be lasi, taunimanima hadikaia karana be lasi bona ta be mauri durua totona do ia hekwarahi lasi. Baibel ia gwauhamata: “Idia ta ta be edia vain bona fig au henunai do idia helai, bona tau ta ese idia do ia hagaria lasi.”—Mika 4:3, 4.
Ruma momo bona gaukara namodia
Ruma bese iboudiai be mai edia ruma, ta ese idia do ia lulua lasi, bona idia karaia gaukara ibounai do idia moalelaia. Baibel ena hereva hegeregerena, Dirava ena tanobada matamatana lalonai do idia noho taudia be “do idia hekwarahi kava lasi.”—Isaia 65:21-23.
Edukeisen hereadaena
Baibel ena gwauhamata be: “Tanobada be Iehova dibaia karana dekenai do ia honu.” (Isaia 11:9) Tanobada matamatana ai do idia noho taudia be idia ia Havaraia Tauna, Iehova, ena aonega bona ia ese ia havaraia gaudia ibounai do idia dibaia. Idia be edia diba do idia gaukaralaia lasi tuari kohudia idauidau idia karaia, eiava haida idia hahisia totona. (Isaia 2:4) To, maino ai do idia noho dalana bona tanobada idia naria namonamo dalana do idia dibaia.—Salamo 37:11.
Mauri hanaihanai
Dirava be tanobada ia karaia namonamo badina ena ura be dina ibounai mauri ita moalelaia sibona. Ena ura be taunimanima ese tanobada do idia noholaia ela bona hanaihanai. (Salamo 37:29; Isaia 45:18) Matamanai ena ura korikorina do ia hagugurua, Dirava ese “mase do ia haorea momokani.” (Isaia 25:8) “Mase, lalohisihisi, taitai, bona hisihisi be do idia ore.” (Apokalupo 21:4) Dirava ese taunimanima ibounai—tanobada dikana ena dokona amo idia roho mauri taudia, bona ia mai noho tanobada matamatana lalonai do ia hatorea isi lou mase taudia momo herea dekenai—dala do ia kehoa mauri hanaihanai idia abia totona.—Ioane 5:28, 29; Kara 24:15.
Hari, tanobada hegegemadai taunimanima milioni momo be idia hegaegae noho, badina edia mauri dala matamatana be kahirakahira vadaeni. Ena be idia goevadae lasi, to idia hekwarahi noho, unai dala amo Dirava ese idia do ia abia hidi ena tanobada matamatana lalonai do idia noho totona. Edena dala ai? Namona be Iehova Dirava bona ia ese ia siaia tauna, Iesu Keriso, idia dibaia.—Ioane 17:3.
Hari tanobada ena dokona ai do oi roho mauri bona ia mai noho tanobada namona lalonai oi noho dalana oi diba namonamo totona, diba ma haida oi abia. Mauri Moalelaia Hanaihanai! bukana amo Iehova ena Witnes tauna ta ida, davana lasi Baibel stadi kosi oi abia dae.