Mentol Helt Gorerena Idia Abia Taudia Durua Totona

Unai Ena Anina

Turana ta be laloa momo gorerena ia abia neganai, ita diba lasi dahaka do ita karaia. To iseda turana ese ia ita laloa bada karana ia mamia neganai, unai ese ia do ia durua ena mentol helt gorerena ia haheaukalaia totona. Edena dala ai?

Heduru Dalana

“Kamonai haraga.”​—IAMESI 1:19.

Emu turana durua totona dala namona ta be ia hereva neganai oi kamonai sibona. Namo lasi oi laloa ia gwauraia hereva ibounai do oi haerelaia. Ia oi hamaoroa ena hereva oi kamonai noho bona oi laloa bada. Iena lalohadai oi lalopararalaia toho, bona oi hahemaoro henia lasi. Laloatao, iena gorere dainai ia laloa namonamo lasi bona ia hereva.​—Iobu 6:2, 3.

“Umui hagoadaia.”​—1 TESALONIKA 5:14.

Reana emu turana be ia laloa momo, o ia mamia ia be anina lasi. Emu kara amo oi hahedinaraia ia oi laloa bada neganai, ia oi hagoadaia diba bona ena lalona oi hanamoa, ena be hereva ta oi gwauraia lasi.

“Tura korikori be nega ibounai lalokau ia hahedinaraia.”​—AONEGA HEREVADIA 17:17.

Heduru henia. Namo lasi oi laloa heduru henia dalana oi diba, to namona be oi henanadai. Emu turana be iena ura gauna ia herevalaia totona be ia auka neganai, ia oi nanadaia bema hegeregere nega tamona umui raka loaloa diba. Oi hadibaia ia ida shopping, hagoevaia gaukarana bona gaukara ma haida umui karaia hebou totona.​—Galatia 6:2.

“Do umui haheauka.”​—1 TESALONIKA 5:14

Reana emu turana be ia hegaegae lasi oi ida ia hereva totona. Emu turana oi hamaoroa bema ia ura hereva, ia do oi kamonai henia. Emu turana ia gorere dainai, reana iena hereva o ia karaia gaudia ese oi hahisia. Reana palani do ia haidaua o oi ia habadua. Ia dekenai oi haheauka bona heduru oi henia bona ia oi lalopararalaia.​—Aonega Herevadia 18:24.

Emu Heduru ese Emu Turana Ia Durua Diba

“Lau ura egu turana ia diba, lau dekenai ena lalohadai ia gwauraia diba. Ena be iena problem hadokoa dalana lau diba lasi, hanaihanai lau noho hegaegae ia lau kamonai henia totona. Nega haida ia ura haida ese iena lalohadai idia kamonai henia, unai ese iena hemami ia hanamoa.”​—Farraha ena turana be laloa momo bona lalometau gorerena dainai ia ura lasi aniani.

“Egu turana ta be lau ia durua namonamo bona lau ia hagoadaia. Aniani totona lau ia invait. Laloa bada karana bona lalokau lau mamia bona unai ese lau ia durua egu lalohadai lau gwauraia hedinarai totona. Lau ia hagoadaia bada!”​—Ha-eun, clinical depression gorerena ia abia.

“Haheauka karana be gau badana. Egu hahine ese ia karaia gauna ta dainai lau ia habadua neganai, lau diba iena gorere dainai unai ia karaia. Unai ese lau ia durua lau badu lasi totona, bona iena namo lau laloa bada.”​—Jacob, iena hahine be clinical depression gorerena ia abia.

“Egu hahine ese lau ia durua bona hagoadaia bada. Lau lalohekwarahi bada neganai, lau ia doria diba lasi egu ura lasi gaudia lau karaia totona. Anina be nega haida sibona iena ura ia dadaraia. Unai bamona karadia bona iena harihari bada karana dainai lau dekena ia be spesel.”​—Enrico, anxiety disorder gorerena ia abia.