Abidadama Aneru Edia Haheitalai Oi Tohotohoa

1-2. (a) Edena dala ai ita be aneru amo ita idau? (b) Edena dala ai ita be aneru ida ita hegeregere?

IEHOVA ese hereva momokani dekenai oi ia veria mai neganai, iena lalokau ruma besena lalonai oi ia boiria. Bona unai ruma bese lalonai abidadama anerudia milioni momo idia noho danu. (Dan. 7:9, 10) Aneru ita laloa neganai, ita diba idia be ita taunimanima amo idia idau. Hegeregere, Iehova ese ita ia do havaraia lasi neganai, aneru be idia noho vadaeni. (Iobu 38:4, 7) Edia goada ese iseda goada ia hereaia. Idia be helaga bona kara maoromaoro taudia, ita be goevadae lasi dainai edia mauri dalana ita badinaia diba lasi.—Luka 9:26.

² Ena be gau haida dekenai ita be aneru amo ita idau, to dala momo ai idia ida ita hegeregere. Unai be Iehova ena kara namodia ita hahedinaraia diba, mai iseda ura kwalimu, ita ta ta be mai iseda ladana, iseda kara be idauidau, bona Iehova ena hesiai gaukara lalonai maduna idauidau ita huaia. Danu, aneru bamona ita ura iseda Havaraia Tauna ita tomadiho henia.—1 Pet. 1:12.

3. Abidadama anerudia amo dahaka ita dibaia?

³ Ita be gau momo dekenai aneru ida ita hegeregere dainai, edia haheitalai namona ese ita ia hagoadaia bona idia amo mai anina bada gaudia momo ita dibaia. Inai atikol ai, abidadama aneru idia manau, taunimanima idia lalokau henia, idia haheauka bona kongrigeisen idia hagoevaia karana do ita herevalaia.

ANERU BE IDIA MANAU

4. (a) Edena dala ai aneru be manau karana idia hahedinaraia? (b) Dahaka dainai aneru be idia manau? (Salamo 89:7)

⁴ Abidadama anerudia be manau karana idia hahedinaraia. Ena be gau momo idia diba, mai edia goada, bona aonega, to Iehova ena hakaua dalana idia badinaia. (Sal. 103:20) Edia maduna idia huaia neganai, idia karaia gaudia eiava edia siahu dainai idia hekokoroku lasi. Idia be mai moale ida Dirava ena ura idia karaia, ena be haida ese edia ladana idia dibaia lasi.a (Gen. 32:24, 29; 2 Ki. 19:35) Bona idia ura hanamoa ibounai be Iehova dekenai idia henia. Dahaka dainai aneru be idia manau? Badina Iehova idia lalokau henia bona idia matauraia bada.—Salamo 89:7 duahia.

5. Aneru ta be aposetolo Ioane ia hamaoromaoroa neganai, edena dala ai manau karana ia hahedinaraia? (Laulau itaia danu.)

⁵ Mani inai sivarai ta ita laloa unai ese ia hahedinaraia, aneru be manau karana idia hahedinaraia. Lagani 96 C.E. ai, ena ladana ita diba lasi aneruna ta be aposetolo Ioane dekenai matahanai ta ia hahedinaraia. (Apok. 1:1) Ioane be unai matahanai ia itaia neganai, dahaka ia karaia? Ia ura unai aneru ia tomadiho henia. To, unai aneru ese karaharaga ia koua bona ia hamaoroa: “Unai bamona oi karaia lasi! Lau danu be hesiai tauna sibona, oi bona emu tadikaka hegeregerena, . . . Dirava oi tomadiho henia!” (Apok. 19:10) Unai aneru be ia manau momokani! Bona ia ura lasi hanamoa ia abia. Ia ese karaharaga Ioane ia hamaoroa, Iehova Dirava do ia tomadiho henia. Danu, aneru ia laloa lasi ia be Ioane ia hereaia. Ena be aneru be lagani daudau Iehova ia hesiai henia bona ena goada be Ioane ena goada ia hereaia, to mai manau ida Ioane ia hamaoroa ia danu be hesiai tauna sibona. Ena be aneru ese Ioane ia hamaoromaoroa, to ia gwau henia lasi bona mai hemataurai ida ia hereva henia. Reana ia laloparara Ioane be ia itaia gaudia dainai ia hoa.

6. Edena dala ai aneru edia manau karana ita tohotohoa diba?

⁶ Edena dala ai aneru edia manau karana ita tohotohoa diba? Maduna idauidau ita huaia neganai, ita hekokoroku lasi, eiava ita hagugurua gaudia dainai hanamoa ita abia lasi. (1 Kor. 4:7) Danu, ena be lagani daudau lalonai Iehova ita hesiai henia, eiava maduna badadia haida ita abia, to namo lasi ita laloa ma haida ita hereaia. Oibe, Iehova ena hesiai gaukara lalonai maduna momo ita abia neganai, namona be ladana maragi taudia bamona ita noho. (Luka 9:48) Aneru hegeregerena, ita ura ma haida ita hesiai henia bona ita ura lasi sibona iseda ladana ita abia isi.

7. Ta ita hamaoromaoroa eiava sisiba henia neganai, edena dala ai manau karana ita hahedinaraia diba?

⁷ Iseda tadikaka bona taihu eiava iseda natuna ita hamaoromaoroa eiava sisiba henia neganai, manau karana ita hahedinaraia diba. Nega haida sisiba aukana ita henia be namo. To aneru be mai hebogahisi ida Ioane ia hamaoromaoroa hegeregerena, ta ita sisiba henia neganai, unai bamona ita karaia diba. Unai amo do ia lalohisihisi lasi. Bema sibona ita abia isi lasi, mai hemataurai bona hebogahisi ida Baibel ena sisiba do ita herevalaia.—Kol. 4:6.

ANERU BE TAUNIMANIMA IDIA LALOKAU HENIA

8. (a) Luka 15:10 hegeregerena, edena dala ai aneru be taunimanima idia lalokau henia? (b) Haroro gaukara ita karaia neganai, edena dala ai aneru ese ita idia durua? (ena laulau itaia danu.)

⁸ Aneru be taunimanima amo idia daudau eiava parara lasi. Bona taunimanima idia lalokau henia. Tadikaka eiava taihu ta be ena kara dika amo ia helalo-kerehai bona Iehova dekenai ia giroa lou, eiava ta be Iehova ia dibaia bona Ia hesiai henia totona ena mauri ia haidaua neganai, aneru idia moale bada. (Luka 15:10 duahia.) Danu, haroro gaukara ita karaia neganai aneru be ita idia durua. (Apok. 14:6) Ena be idia ese taunimanima idia haroro henia lasi, to Iehova ia ura dibaia tauna ta dekenai pablisa ta idia hakaua lao diba. Momokani, do ita gwau lasi aneru be nega ibounai ita idia hakaua lao kamonai tauna ta ita hedavari henia totona. Badina Iehova be dala ma haida ia gaukaralaia diba, hegeregere ena lauma helaga ese taunimanima ia durua diba eiava ena hesiai taudia ia hakaua totona. (Kara 16:6, 7) To, ita haroro neganai, ena aneru ia gaukaralaia ita idia durua totona. Unai dainai sivarai namona ita harorolaia neganai, ita abia dae momokani aneru be ita do idia durua.—Maua ladana, “Edia Guriguri Ena Haere Idia Abia” itaia.

9. Edena dala ai aneru ese taunimanima idia lalokau henia karana ita tohotohoa diba?

⁹ Edena dala ai aneru ese taunimanima idia lalokau henia karana ita tohotohoa diba? Hadibaia hereva ta amo ita kamonai ta be orea dekenai ia giroa lou neganai, aneru bamona ita moale diba. Iseda tadikaka eiava taihu ita welkam henia bona ita hahedinaraia ia ita lalokau henia. (Luka 15:4-7; 2 Kor. 2:6-8) Danu, aneru ita tohotohoa bona mai ura ida haroro gaukara ita karaia. (Had. 11:6) Bona sivarai namona ita harorolaia lalonai aneru ese ita idia durua hegeregerena, ita danu haroro gaukara ai dala ita tahua iseda tadikaka taihu ita durua totona. Hegeregere, palani ita karaia diba haroro gaukara ai pablisa matamata ta ita bamoa. Danu, tadikaka eiava taihu burukana eiava idia gorere pablisa taudia ita durua diba haroro gaukara idia karaia totona.

10. Sara ena ekspiriens amo dahaka ita dibaia?

¹⁰ To, bema iseda noho dalana dainai ita hegeregere lasi Iehova ena hesiai gaukara ita karaia be edena bamona? Namona be ita diba haroro gaukara lalonai aneru ese ita do idia durua. Mani India ai taihu ta ladana Sarab ena ekspiriens ita laloa. Lagani 20 bamona painia gaukara ia karaia murinai, Sara be gorere badana ta ia abia bona bedi dekenai ia hekure sibona. Unai dainai ia lalohisihisi bada. To tadikaka taihu be mai lalokau ida ia idia durua bona hanaihanai Baibel duahiduahi karana ese ia hagoadaia, unai amo metairametaira ena moale ia abia lou. Danu, ena noho dalana hegeregerena haroro gaukara ia karaia be namo. Bona revareva torea totona ia helai diba lasi dainai, fon sibona amo ia haroro. Unai dainai telefon amo ena lou henia ia karaia, bona ia idia hamaoroa ma haida danu be idia ura Baibel idia stadilaia. Dahaka ia vara? Hua haida murinai, Sara ena Baibel stadi be 70, bona ia hegeregere lasi idia ibounai ia stadi henia totona! Unai dainai dala ia karaia idia haida be kongrigeisen ai pablisa ma haida ese idia stadi henia totona. Unai stadi taudia momo be hari iseda hebou dekenai idia mai noho. Tadikaka taihu, bona Sara danu, be mai ura ida haroro gaukara idia karaia, bona aneru be idia moale idia ida idia gaukara totona!

ANERU BE IDIA HAHEAUKA

11. Edena dala ai abidadama anerudia be haheauka karana idia hahedinaraia?

¹¹ Abidadama aneru be haheauka karana dekenai haheitalai namona idia hahedinaraia. Idia be lagani tausen momo lalonai kara gageva bona kara dika idia haheaukalaia. Idia itaia, guna idia ida Iehova idia hesiai henia anerudia haida bona Satani be Iehova idia gwau-edeede henia. (Gen. 3:1; 6:1, 2; Iuda 6) Baibel ese ia hahedinaraia abidadama aneruna ta be dina momo lalonai aneru dikana ta ida ia heatu. (Dan. 10:13) Danu, Adamu bona Heva edia nega amo, aneru idia itaia taunimanima haida sibona be Iehova idia hesiai henia. Ena be unai gaudia idia vara, to unai abidadama aneru be mai moale bona ura ida Iehova idia hesiai henia noho. Idia diba nega maorona ai Dirava ese kara gageva do ia kokia.

12. Dahaka ese ita ia durua diba ita haheauka totona?

¹² Edena dala ai aneru edia haheauka karana ita tohotohoa diba? Aneru hegeregerena, ita danu be kara gageva ita itaia bona dagedage ita davaria. To idia bamona, ita abia dae momokani, nega maorona ai Dirava ese kara dika ibounai do ia kokia. Danu, idia hegeregerena “ita hesiku lasi kara namodia ita karaia noho totona.” (Gal. 6:9) Bona Dirava ia gwauhamata ita do ia durua ita haheauka totona. (1 Kor. 10:13) Iehova ena lauma helaga totona ita guriguri, unai amo do ita haheauka bona ita moale. (Gal. 5:22; Kol. 1:11) Bema dagedage oi davaria be edena bamona? Namona be Iehova ita abidadama henia bona ita gari lasi. Iehova ese hanaihanai oi do ia durua bona hagoadaia.—Heb. 13:6.

ANERU BE KONGRIGEISEN HAGOEVAIA GAUKARANA IDIA DURUA

13. Dina gabedia ai, aneru be dahaka mai anina bada gaukarana idia abia? (Mataio 13:47-49)

¹³ Dina gabedia ai, Iehova ese aneru dekenai mai anina bada gaukarana ta ia henia. (Mataio 13:47-49 duahia.) Tanobada hegegemadai taunimanima milioni momo be sivarai namona idia abia dae. Idia haida be edia mauri idia haidaua bona Keristani taudia ai idia lao, to haida be lasi. Aneru edia gaukara be “kara maoromaoro taudia be kara dika taudia amo do idia hapararaia.” Unai ena anina be heduru idia henia kongrigeisen ia goeva noho totona. To, unai ese ia hahedinaraia lasi Iehova ena orea idia rakatania taudia be do idia giroa mai lasi, eiava ita gwau lasi kongrigeisen lalonai hekwakwanai do idia vara lasi. To ita diba aneru be idia gaukara goada noho kongrigeisen ena goeva karana idia durua totona.

14-15. Edena dala ai aneru ita tohotohoa diba bona ita hahedinaraia ita ura kongrigeisen ia goeva? (Laulau itaia danu.)

¹⁴ Edena dala ai aneru hegeregerena kongrigeisen ena goeva karana ita laloa bada? Namona be ita gaukara goada Iehova ida iseda hetura karana ita gimaia. Unai ita karaia totona, Iehova idia lalokau henia turadia ita bamoa be namo. Bona Ia ida iseda hetura karana do ia hadikaia gaudia ita dadaraia karana amo kongrigeisen hagoevaia gaukarana ita durua. (Sal. 101:3) Danu, iseda tadikaka taihu ita durua Iehova idia badinaia noho totona. Hegeregere, bema ita kamonai iseda tadikaka eiava taihu ta be kara dika badana ta ia karaia, dahaka ita karaia be namo? Ia ita lalokau henia dainai, ita hagoadaia elda taudia ia hereva henia totona. Bema unai ia karaia lasi, namona be elda taudia ita hadibaia. Ita ura ia manoka tadikaka eiava taihu be heduru ia abia haraga!—Iam. 5:14, 15.

¹⁵ To, madi kara dika badadia idia karaia taudia haida be kongrigeisen amo idia kokia. Unai ia vara neganai, ia do ita “bamoa lasi.”c (1 Kor. 5:9-13) Unai dala amo kongrigeisen do ia goeva. Danu, abia hidi ita karaia kongrigeisen amo idia kokia taudia ita bamoa lasi neganai, ita be idia dekenai kara namona ita hahedinaraia. Bona unai ese idia do ia durua, Iehova dekenai idia giroa lou totona. Bema unai idia karaia, Iehova bona ena aneru ida do ita moale.—Luka 15:7.

16. Edena dala ai aneru edia haheitalai oi tohotohoa diba?

¹⁶ Iehova ese dala ia kehoa, aneru ita dibaia bona idia ida ita gaukara hebou karana be hahenamo badana! Namona be edia kara namodia, hegeregere edia manau karana, taunimanima idia lalokau henia, idia haheauka, bona kongrigeisen ena goeva idia laloa bada karana ita tohotohoa. Bema unai bamona ita karaia, ita danu be Iehova idia tomadiho henia ruma besena lalonai do ita noho hanaihanai.