Baibel Stiuden Durua Hereva Momokani Idia Badinaia Totona

1-2. (a) Dahaka dainai Baibel stiuden taudia haida dekenai ia auka Iehova idia hesiai henia totona? (b) Inai atikol ai dahaka do ita herevalaia?

REANA oi laloa gau haida dainai oi hegeregere lasi Iehova ena Witnes tauna ai oi lao totona, a? Reana oi gari, badina oi laloa oi ida idia gaukara hebou taudia, emu turadia, eiava famili be oi dekenai do idia badu. Eiava reana oi mamia do oi hegeregere lasi Iehova ena taravatu oi badinaia totona. Bema emu hemami be unai bamona, do oi laloparara dahaka dainai Baibel stiuden taudia haida dekenai ia auka hereva momokani idia abia dae totona.

² Iesu ia laloparara, unai bamona gaudia ese ta ia koua diba Iehova ia hesiai henia totona. (Mat. 13:20-22) To Iesu be unai bamona taudia dekenai ia hesiku lasi. Ena hahediba taudia ia hadibaia unai bamona taudia do idia durua. Hegeregere do idia hadibaia (1) idia ia koua gaudia idia diba be namo, (2) Iehova dekenai edia lalokau do idia habadaia, (3) mai anina bada gaudia do idia atoa guna, bona (4) Hekwakwanai ia hanaia dalana do idia diba. Mauri Moalelaia Hanaihanai! buka ita gaukaralaia neganai, edena dala ai Iesu ena hadibaia dalana ita tohotohoa diba stiuden ita durua totona?

STIUDEN DURUA KOUA GAUDIA IDIA DIBA TOTONA

3. Dahaka ese Nikodemo ia koua Iesu ena hahediba tauna ai ia lao totona?

³ Nikodemo be Iuda taudia ese idia laloa bada gunalaia tauna ta, to gauna ta ese ia koua dainai ia auka Iesu ena hahediba tauna ta ai ia lao totona. Iesu be hua 6 lalonai ena haroro gaukara ia karaia murinai, Nikodemo ia laloparara Iesu be Dirava ese ia siaia tauna. (Ioa. 3:1, 2) To, Nikodemo ia ura hehuni dalana ai Iesu dekenai ia lao, badina ‘Iuda taudia dekenai ia gari.’ (Ioa. 7:13; 12:42) Ia laloa Iesu ena hahediba tauna ai ia lao neganai, reana ena dagi do ia haboioa.a

4. Edena dala ai Iesu ese Nikodemo ia durua Dirava ena ura ia lalopararalaia totona?

⁴ Nikodemo be Mose ena Taravatu ia diba, to Iehova ena ura ia lalopararalaia totona heduru ia abia be namo. Edena dala ai Iesu ese ia durua? Ena be hanuaboi vadaeni, to Iesu be nega ia atoa Nikodemo ida ia herevahereva totona. Bona Iesu ese Nikodemo dekenai ia hahedinaraia ena hahediba tauna ai ia lao totona gau haida do ia karaia, unai be: Ena kara dika amo do ia helalo-kerehai, ranu lalonai do ia bapatiso, bona Dirava ena Natuna dekenai ena abidadama do ia hahedinaraia.—Ioa. 3:5, 14-21.

5. Edena dala ai Baibel stiuden tauna be ia idia koua gaudia do ia diba?

⁵ Ena be stiuden taudia be Baibel ena hereva idia diba, to namona be idia ita durua idia ia koua noho gaudia idia diba totona. Reana ena moni gaukara dekenai ia bisi eiava ena famili ese idia dagedage henia dainai, unai ese ia koua Iehova ena witnes tauna ai ia lao totona. Unai dainai oi noho hegaegae emu Baibel stiuden tauna oi durua totona. Reana ia oi noia ia ida ti sisina umui inua eiava umui lao loaloa. Unai bamona negadiai, reana ena noho dalana do ia herevalaia, bona ia oi durua senisi haida do ia karaia dalana ia diba totona. Bena ia oi hadibaia unai ia karaia ena badina be Iehova ia hamoalea totona.

6. Edena dala ai stiuden tauna oi durua Baibel ena hereva ia badinaia totona? (1 Korinto 16:13)

⁶ Bema Baibel stiuden tauna ia diba Iehova ese ia do ia durua Baibel ena hakaua herevadia ia badinaia totona, goada do ia abia ia dibaia gaudia ia badinaia totona. (1 Korinto 16:13 duahia.) Emu Baibel stiuden oi durua dalana be sikuli tisa ena gaukara bamona. Oi sikuli neganai, edena tisa oi ura henia? Reana oi ura henia tisa be mai haheauka ida oi ia durua oi karaia diba gaudia oi dibaia totona. Unai hegeregerena, Baibel tisa namona be Dirava ena hereva ia hadibaia sibona lasi, to stiuden ia hadibaia Iehova ena heduru amo ena mauri ia senisia diba. Edena dala ai tisa namona ai oi lao diba?

EMU STIUDEN DURUA IEHOVA DEKENAI ENA LALOKAU IA HABADAIA

7. Edena dala ai Iesu ese kamonai taudia ia durua Iehova dekenai edia lalokau idia habadaia totona?

⁷ Iesu ia diba ena hahediba taudia be Dirava idia lalokau henia dainai, idia dibaia gaudia do idia badinaia. Nega momo Iesu be ena hahediba taudia dekenai gau haida ia hadibaia, unai ese idia ia durua edia guba tamana dekenai lalokau idia hahedinaraia totona. Hegeregere, idia dekenai ia hahedinaraia Iehova be tama lalokauna ta bamona iena natudia dekenai gau namodia ia henia. (Mat. 7:9-11) Iesu ena hereva idia kamonai taudia haida be edia tamadia ese idia lalokau henia lasi. Iesu ese boio natuna ena parabole ia gwauraia neganai, mani unai taudia edia hemami oi laloa! Iesu ese ia hahedinaraia tamana be mai hebogahisi ida ena natuna ia abia dae lou ena be kara dika badadia ia karaia. Iesu ese taunimanima ia durua dainai idia diba Iehova ese idia ia lalokau henia bada bona ia ura idia ia durua.—Luka 15:20-24.

8. Edena dala ai Baibel stiuden do oi durua iena lalokau Iehova dekenai ia habadaia totona?

⁸ Unai dainai bema Baibel stiuden dekenai Dirava ena kara namodia oi hadibaia, unai ese ia do ia durua ena lalokau Iehova dekenai ia habadaia totona. Umui stadi negadiai, emu stiuden oi durua ia dibaia gaudia amo Iehova ena lalokau ia lalopararalaia totona. Bema mauri davana oi herevalaia, emu stiuden dekenai oi hahedinaraia Iehova ese unai ia karaia badina ia ia lalokau henia. (Roma 5:8; 1 Ioa. 4:10) Stiuden ia laloparara Iehova ese ia lalokau henia bada neganai, unai ese ia do ia durua Iehova lalokau henia karana ia habadaia totona.—Gal. 2:20.

9. Dahaka ese Michael ia durua ena mauri ia haidaua totona?

⁹ Mani Michael, ena ekspiriens ita laloa, ia be Indonesia amo. Ia be hereva momokani lalonai ia bada to ia bapatiso lasi. Ena mauri lagani be 18 neganai, tano ta dekenai ia lao bona motuka taria gaukara ia karaia. Gabeai Indonesia ai ia giroa lou bona ia headava, to gaukara dainai ena famili ia rakatania bona tano ma ta dekenai ia lao. Unai nega ai, ena adavana bona natuna be Baibel idia stadilaia bona idia dibaia gaudia idia badinaia. Michael ena sinana ia mase murinai, ena tamana ia naria totona Indonesia dekenai ia giroa lou, bena Baibel stadi ia abia dae. Mauri Moalelaia Hanaihanai! buka ena leseni 27 ena kahana ta “Diba Ma Haida Abia” idia stadilaia neganai, unai ese Michael ena kudouna ia hamarerea. Michael ia tai badina ena stadi lalonai ia itaia Iehova be Ena Natuna ese ia abia hisihisi dainai ia lalohisihisi. Bona Iehova ese ia henia mauri davana ia laloa bada dainai, ena mauri ia haidaua bona ia bapatiso.

STIUDEN DURUA MAI ANINA BADA GAUDIA IA ATOA GUNA

10. Edena dala ai Iesu ese hahediba taudia ia durua haroro gaukara idia laloa bada totona? (Luka 5:5-11) (Laulau itaia danu.)

¹⁰ Hahediba taudia ginigunadia idia laloparara Iesu be gwauhamata Mesia, to heduru idia abia be namo unai amo haroro gaukara do idia laloa bada. Petero bona Andrea be hahediba taudia, to Iesu ese ia boiria ful-taim hesiai gaukara idia karaia totona. (Mat. 4:18, 19) Idia ruaosi be Iamesi bona Ioane ida haoda bisinesi idia karaia. (Mar. 1:16-20) Petero bona Andrea ese Iesu idia badinaia totona “edia reke idia rakatania” neganai, dala haida idia karaia unai amo edia famili idia durua diba. Dahaka dainai idia ura edia bisinesi idia rakatania? Luka bukana ia hahedinaraia Iesu be hoa karana ta ia karaia, unai ese idia ia hagoadaia bona idia abia dae Iehova be edia dabu gaudia do ia henia.—Luka 5:5-11 duahia.

11. Edena dala ai iseda ekspiriens ese stiuden ia hagoadaia diba?

¹¹ Iesu bamona hoa karadia ita karaia diba lasi, to iseda stiuden dekenai Iehova ese ena ura idia atoa guna taudia ia durua dalana ita herevalaia diba. Hegeregere, hebou oi lao matamaia neganai, Iehova ese oi ia durua dalana oi herevalaia. Reana emu hebou negana oi reaia lasi totona kampani biaguna oi hadibaia ovataim gaukara do oi karaia lasi dalana oi gwauraia. Eiava Iehova tomadiho henia karana oi atoa guna dainai, Iehova ese emu abidadama ia hagoadaia daladia oi herevalaia.

12. (a) Dahaka dainai pablisa haida ita boiria iseda stadi lalonai idia helai be namo? (b) Edena dala ai vidio oi gaukaralaia diba emu stiuden oi durua totona? Haheitalai gwauraia.

¹² Emu stiuden be Keristani taudia ma haida edia ekspiriens ese do ia hagoadaia danu. Unai dainai pablisa haida oi boiria diba stadi lalonai idia helai totona. Bona idia oi noia hereva momokani idia dibaia bona Iehova ena hesiai gaukara idia atoa guna dalana idia herevalaia totona. Danu stiuden ida, Mauri Moalelaia Hanaihanai! buka ena kahana “Diba Ma Haida Abia” eiava “Referens Itaia” kahana ai idia noho vidio umui itaia. Hegeregere, leseni 37, umui herevalaia neganai, vidio ladana Iehova ese Ita Do Ia Durua umui itaia bona ena point haida herevalaia.

EMU STIUDEN DURUA HEKWAKWANAI IA HANAIA TOTONA

13. Edena dala ai Iesu ese ena hahediba taudia ia durua hekwakwanai do idia haheaukalaia totona?

¹³ Iesu ese iena murinai idia raka taudia ia hadibaia loulou, idia be ma haida eiava varavara amo hekwakwanai do idia davaria. (Mat. 5:11; 10:22, 36) Iesu ena mase negana ia kahirakahira neganai, ena hahediba taudia ia hamaoroa idia be Iehova idia tomadiho henia dainai haida ese do idia hamasea diba. (Mat. 24:9; Ioa. 15:20; 16:2) Unai dainai ia hagoadadia mai aonega ida do idia haroro. Hegeregere ia gwau, ita idia inai henia taudia ida do idia hepapahuahu lasi. Danu edia hereva bona kara do idia naria namonamo, unai amo idia haroro noho diba.

14. Edena dala ai stiuden ita durua diba dagedage totona ia hegaegae? (2 Timoteo 3:12)

¹⁴ Stiuden dekenai ita gwauraia hedinarai diba, ia be Baibel ia stadilaia dainai, ia ida idia gaukara hebou taudia, turadia bona varavara amo dagedage eiava hekwakwanai ia davaria diba. (2 Timoteo 3:12 duahia.) Ena mauri ai Baibel ena hahediba herevadia ia badinaia dainai, ena gaukara turadia ese ia do idia kirikirilaia. Bona ma haida eiava ena varavara ese Baibel amo ia dibaia gaudia do idia abia dae lasi. Namona be iseda stiuden dekenai do idia vara dagedage eiava hekwakwanai ita herevalaia guna, unai amo stiuden ia hegaegae dainai ia diba dahaka do ia gwauraia bona karaia.

15. Dahaka ese emu stiuden ia durua diba ena famili edia dagedage karana ia haheaukalaia totona?

¹⁵ Bema stiuden tauna be ena famili ese idia dagedage henia, ia oi hagoadaia edia dagedage karana ena badina ia laloa totona. Reana idia laloa ia ita koia, eiava idia gwau Iehova ena Witnes taudia be taunimanima namodia lasi. Iesu danu be ia lalokau henia taudia ese idia kara namo henia lasi. (Mar. 3:21; Ioa. 7:5) Emu stiuden oi durua ia aonega bona mai haheauka ida ena varavara bona turadia ia kara henia totona.

16. Edena dala ai iseda stiuden ita durua diba mai aonega ida ia abia dae gaudia ia herevalaia totona?

¹⁶ Bema Baibel stiuden ena varavara idia ura Baibel amo diba idia abia, namo lasi stiuden be ia dibaia gaudia ibounai be nega tamona ia gwauraia. Unai amo ena varavara do idia hesiku lasi bona do idia ura nega ma ta ia ida idia herevahereva. Unai dainai stiuden tauna ita hagoadaia ia dibaia gaudia ibounai ia herevalaia lasi. (Kol. 4:6) To reana ena varavara ia hadibaia diba iseda websait jw.org. idia sekea totona. Unai dala amo sibodia edia nega ai Iehova ena Witnes taudia totona diba ma haida idia abia.

17. Edena dala ai stiuden tauna oi durua diba Iehova ena Witnes taudia totona idia gwauraia henanadai ia haerelaia totona? (Laulau itaia danu.)

¹⁷ Iseda websait ai, “Momo Edia Henanadai” kahana oi gaukaralaia emu stiuden oi durua ena varavara eiava gaukara turadia edia henanadai ia haerelaia totona. (2 Tim. 2:24, 25) Mauri Moalelaia Hanaihanai! buka ena leseni ta ta edia dokona ai “Haida Idia Gwau” kahana umui riviulaia. Emu stiuden tauna oi hagoadaia sibona ena hereva dalana ai ia haere totona. Bema hegeregere, ma haida dekenai ia abia dae gaudia ia gwauraia dalana ia praktis. Unai bamona praktis karana ese ia do ia durua mai abidadama ida ia hereva totona.

18. Edena dala ai stiuden tauna oi hagoadaia haroro gaukara ai ena abidadama ia herevalaia totona? (Mataio 10:27)

¹⁸ Iesu ese ena hahediba taudia ia oda henia taunimanima ibounai dekenai sivarai namona idia harorolaia totona. (Mataio 10:27 duahia.) Baibel stiuden be kongrigeisen ida ia haroro matamaia neganai, ia be Iehova tabekau henia karana do ia dibaia. Stiuden ese unai be ena tahua gauna ai ia halaoa totona, edena dala ai ia oi durua diba? Bema kongrigeisen be haroro kempein do idia karaia, emu stiuden oi durua edena dala ai pablisa ta ai ia lao diba. Ia dekenai oi hahedinaraia unai bamona kempein amo momo be haroro gaukara idia hamatamaia. Tahua gauna ta be wiki ena hebou ai tok ia henia karana ese ia do ia durua herevahereva dalana ia hanamoa totona. Unai bamona ia karaia neganai, ma haida dekenai ia abia dae gaudia ia herevalaia namonamo diba.

OI HAHEDINARAIA EMU STIUDEN OI LALOA BADA

19. Iesu be edena dala ai ia hahedinaraia ena hahediba taudia ia laloa bada, bona edena dala ai ia ita tohotohoa diba?

¹⁹ Iesu be guba dekenai ia do daekau lasi neganai, ena hahediba taudia ia hamaoroa nega ta ia ida do idia hedavari lou. Idia laloparara lasi Iesu be guba dekenai do idia lao karana ia herevalaia. To, Iesu be edia daradara karana ia laloa lasi, ia be edia badinaia karana ia laloa bada. (Ioa. 14:1-5, 8) Badina Iesu ia diba gabeai gau haida do idia lalopararalaia, hegeregere edia guba helaro. (Ioa. 16:12) Ita danu iseda stiuden dekenai ita hahedinaraia ia be Iehova ia hamoalea diba.

20. Edena dala ai taihu Chifundo ia abia dae ena stiuden be kara maorona do ia karaia?

²⁰ Namona be oi abia dae emu stiuden ia ura kara maorona ia karaia. Hegeregere, Malawi ai ia noho taihu ladana Chifundo, ita laloa. Ia be Mauri Moalelaia Hanaihanai! buka amo Catholic hahine ta ladana Alinafe ida Baibel stadi ia hamatamaia. Leseni 14, idia stadilaia murinai, Chifundo ese Alinafe ia nanadaia: “Kaivakuku tomadiho henia karana dekenai emu lalohadai be dahaka?” Alinafe ia badu bona ia gwau, “Lau sibona ese abia hidi do lau karaia kaivakuku do lau gaukaralaia eiava lasi!” Unai murinai Chifundo ia laloa, Alinafe be ena stadi do ia hadokoa. To ia be mai haheauka ida Alinafe danu ia stadi noho, ia diba nega ta do ia laloparara. Hua haida murinai, Chifundo ese leseni 34 ai ia noho henanadai ia henia: “Baibel oi stadilaia bona Dirava momokani, Iehova oi dibaia karana ese edena dala ai oi ia durua?” Chifundo ese Alinafe ia haere dalana ia herevalaia, “Alinafe be point namodia ia herevalaia, bona unai point ta be Witnes taudia be Baibel ia taravatua gaudia idia karaia lasi.” Gabeai, Alinafe be kaivakuku tomadiho henia karana ia rakatania bona bapatiso ia abia.

21. Edena dala ai stiuden tauna ita hagoadaia Iehova ia hesiai henia totona?

²¹ Ena be Iehova ese “uhe ia hatubua,” to iseda maduna be Baibel stiuden ita durua ia goada ia lao totona. (1 Kor. 3:7) Ita be stiuden dekenai Dirava ena ura sibona ita hadibaia lasi, to gau ma haida danu ita hadibaia. Ia ita durua Iehova dekenai ena lalokau ia habadaia totona. Danu ita hagoadaia mai anina bada gaudia ia atoa guna totona, unai amo do ia hahedinaraia Iehova ia lalokau henia. Bona ia ita hadibaia dagedage negadiai Iehova dekenai do ia tabekau. Bema iseda stiuden dekenai ita hahedinaraia ia be Iehova ia hamoalea diba, unai ese ia do ia hagoadaia Iehova ia hesiai henia totona.