Duahia Taudia Edia Henanadai

Ita karaia noho haroro gaukara be edena nega ai do ia ore?

Iesu ia gwau: “Basileia ena sivarai namona be tanobada ibounai dekenai do idia harorolaia, bese ibounai idia kamonai totona, unai murinai dokona do ia ginidae.” (Mat. 24:14) Siri 14, 6 bona 13 ai, inai hereva “dokona” ena Grik herevana be teʹlos. Unai hereva be Aramagedono ai Satani ena tanobada ena dokona ia herevalaia. (Apok. 16:14, 16) Unai dainai, sivarai namona do ita harorolaia noho ela bona dokona negana ia kahirakahira momokani. Unai ese guna ita abia lalohadai dekenai laloparara matamata ita abia.

Guna ita laloa, hisihisi badana bona Babulonia Badana do idia hadikaia ore negana ia matamaia neganai, sivarai namona harorolaia gaukara do ia doko. (Apok. 17:3, 5, 15, 16) Ita laloa, unai gaudia idia vara negana be “Iehova ena kara namo laganina” ena dokona. (Isa. 61:2) Danu ita laloa, hisihisi badana amo do idia roho mauri taudia be unai nega do lasi neganai, Iehova badinaia karana idia hahedinaraia. Unai be Ierusalema ai lagani 607 B.C.E. ai, idia roho mauri Iuda taudia edia sivarai ida ita hahegeregerea. Unai Iuda taudia be Iehova idia tomadiho henia bona kara dikadia idia dadaraia dainai, hahemauri ena maka idia abia. (Ese. 5:11; 9:4) To, unai be Mataio 24:14 ai Iesu ese ia gwauraia herevana ida ia hegeregere lasi, badina unai siri ia hahedinaraia taunimanima dekenai nega do ia noho sivarai namona idia abia dae totona ela bona dokona, unai be Aramagedono.

Mataio 24:14 amo ita abia diba matamata dainai, Apokalupo 16:21 ese ia perovetalaia aisi nadi badadia totona iseda lalohadai ia haidaua. Unai siri rua idia stadilaia namonamo murinai, idia laloparara unai siri rua be gau tamona idia herevalaia. Dahaka idia herevalaia? Unai siri rua be taunimanima ese Basileia ena sivarai namona do idia abia dae eiava lasi ia herevalaia. Aposetolo Paulo ia gwau, “mauri ena dala ai idia raka taudia” dekenai unai hereva be sivarai namona ena “bonana namona,” mauri ia havaraia gauna. To, Dirava ena inai taudia dekenai unai hereva be sivarai dikana, mase ia havaraia bonana bamona. (2 Kor. 2:15, 16) Idia be Basileia ena sivarai idia ura henia lasi, badina unai hereva ese ia hahedinaraia idia ura henia tanobada be ia dika, Satani ese ia lohiaia, bona do ia ore.—Ioa. 7:7; 1 Ioa. 2:17; 5:19.

Danu, Apokalupo ese ia herevalaia aisi nadi badadia be do idia “bada herea momokani.” Unai ena anina be hisihisi badana lalonai, iseda haroro gaukara ai do ita gwauraia herevadia ese momo do ia habadua momokani, badina unai nega ai taunimanima ibounai be Iehova ena ladana do idia diba. (Ese. 39:7) Babulonia Badana idia hadikaia murinai, haida be sivarai namona, bonana namona unai, do idia abia dae, a? Oibe. Badina unai nega ai reana haida do idia diba eiava laloatao, lagani momo lalonai Iehova ena Witnes taudia ese tomadiho koikoi ena moru idia harorolaia be hari ia guguru noho.

Unai ita hahegeregerea totona, Aigupito ai ia vara Hisihisi 10 murinai ia vara gauna mani ita laloa. Iehova ese ‘Aigupito taudia edia dirava ibounai ia hahemaoro henia bona panisia’ murinai, “idau taudia momo herea” be Israela taudia idia bamoa. (Eso. 12:12, 37, 38) Unai idau bese taudia be Hisihisi 10 idia itaia murinai, Iehova idia abidadama henia.

Babulonia Badana ia moru murinai Iehova idia abidadama henia taudia be Keriso ena tadikaka, tanobada ai idia do noho taudia unai, do idia durua. (Mat. 25:34-36, 40) Oibe, horoa orena taudia ibounai be guba dekenai idia lao neganai, mamoe bamona taudia makaia gaukara do ia ore, unai neganai Aramagedono do ia matamaia.

Unai diba matamata ese Iehova ena lalokau bada bona hebogahisi ia hahedinaraia namo herea. Oibe, Iehova “ia ura lasi tau ta ia mase, to ia ura taunimanima ibounai be do idia helalo-kerehai.”—2 Pet. 3:9.