Lau Hemarai, to Misinari ai Lau Lao

Lagani 1951 ai, Vienna, Austria dekenai lau vara, egu tama sina be Katolic dubu idia lao. Lau hemarai, to lau abia dae Dirava ia noho bona nega momo lau guriguri. Egu mauri lagani be 9 neganai, egu tamana be Iehova ena Witnes taudia ida ia stadi matamaia, gabeai egu sinana danu ia stadi.

Daudau lasi, ai be Vienna ai ia noho Döbling kongrigeisen ai bamoa. Famili ida gau momo ai karaia hebou. Baibel ai duahia bona stadilaia, hebou dekenai ai lao bona hebouhebou badadia ai voluntia gaukara ai karaia. Lau maragi neganai, egu tamana ese lau ia durua Iehova lau lalokau henia totona. Hanaihanai egu tamana ia guriguri, badina ia ura lau bona egu taihuna be painia gaukara do ai karaia. To, unai nega ai, painia gaukara be egu tahua gauna lasi.

FUL-TAIM HESIAI GAUKARA LAU HAMATAMAIA

Lagani 1965 ai, egu mauri lagani be 14 neganai, lau bapatiso. To, lau hekwarahi haroro gaukara ai lau diba lasi taudia lau hereva henia totona. Danu, nega momo lau mamia matamata taudia haida ese lau idia hereaia, to lau ura idia ese lau do idia abia dae. Unai dainai lau bapatiso murinai, Iehova idia hesiai henia lasi taudia lau bamoa matamaia. Ena be edia hebamo karana lau moalelaia, to egu lalomamina ese lau ia kota henia, badina Iehova idia tomadiho henia lasi taudia lau bamoa totona nega bada lau haorea. To ia auka idia bamoa karana lau hadokoa totona. Dahaka ese lau ia durua?

Unai nega ai, mauri lagani 16 kekeni ta ladana Dorothée be emai kongrigeisen ia bamoa. Lau itaia ia be ruma-ta ruma-ta haroro gaukarana ia ura henia bada. Egu mauri lagani be bada, to haroro gaukara lau goadalaia lasi. Sibona dekenai lau laloa: ‘Egu tama sina be Witnes taudia, to Dorothée ena famili be Witnes lasi taudia. Bona ena sinana be mai ena gorere, to Dorothée be hanaihanai ia haroro!’ Iena haheitalai namona ese lau ia hagoadaia Iehova lau hesiai henia totona. Daudau lasi, lau bona Dorothée be painia gaukara ai karaia hebou. Matamanai, heduru painia ai karaia, unai nega ai idia gwau vacation painia, bona gabeai regula painia ai karaia. Dorothée be haroro gaukara ia moalelaia bona lau danu be haroro gaukara lau moalelaia. Dorothée ese lau ia durua Baibel stadi ginigunana lau hamatamaia totona. Nega sisina murinai ruma-ta-ruma-ta ai, strit dekenai, bona gabu idauidau ai taunimanima hereva henia daladia lau manadalaia.

Egu painia lagani ginigunana ai, Austria tadikaka, ladana Heinz be emai kongrigeisen dekenai ia mai. Ia be Canada ai ena tadina ia vadivadi neganai, unuseni ai hereva momokani ia dibaia. Heinz be Vienna ai emai kongrigeisen dekenai spesel painia gaukara ia karaia. Ia lau ura henia. To ia be ia ura misinari gaukara ia karaia, bona lau be lau ura lasi. Unai dainai matamanai, lau ura lasi hahedinaraia ia lau ura henia. To, gabeai lau bona Heinz ai hetura matamaia, ai headava, bona Austria dekenai ai painia hebou.

MISINARI GAUKARA

Nega momo Heinz ia gwau, ia ura misinari gaukara ia karaia. Lau ia hagoadaia totona henanadai namodia ia gaukaralaia hegeregere, “Ita be natudia lasi dainai, Iehova hesiai henia gaukara ita habadaia diba, a?” Lau hemarai dainai, lau ura lasi misinari gaukara lau karaia. Ena be painia gaukara lau karaia, to lau laloa misinari gaukara be do ia auka. To, Heinz be lau ia hagoadaia misinari gaukara lau laloa noho totona. Danu lau ia hagoadaia sibona lau laloa bada lasi, to taunimanima lau laloa bada totona. Iena hagoadaia herevadia ese lau ia durua bada.

Metairametaira, misinari gaukara karaia lalohadaina lau abia, unai dainai Gilead Sikuli ena aplikeisen pepana ai torea. To, Brens ofesi ai ia gaukara tadikaka ese lau ia hamaoroa, English lau dibaia guna be namo. Lagani toi English lau dibaia murinai, ai hoa badina ai idia siaia lao Salzburg, Austria ai ia noho Serbo-Croatian kongrigeisen dekenai. Lagani 7 lalonai Serbo-Croatian gado idia hereva taudia dekenai ai haroro, bona lagani ta lalonai sekit gaukara ai karaia. Ena be Serbo-Croatian gado ai dibaia totona be ia auka, to Baibel stadi momo ai karaia.

Lagani 1979 ai, ai idia hamaoroa Bulgaria dekenai do ai lao loaloa totona. Unuseniai haroro gaukara idia taravatua. Unai dainai unuseni ai ai noho neganai, haroro gaukara ai karaia lasi. To hehuni dalanai siti badana Sofia dekenai idia noho taihu 5 totona pablikeisen maragidia ai abia lao. Lau gari, to Iehova ese lau ia durua unai asainmen lau karaia totona. Unai taihu 5 be idia gari lasi bona ena be dibura ruma dekenai idia lao diba, to idia moale. Edia abidadama ese lau ia durua Iehova ena orea ese ia henia gaukara idauidau lau karaia totona.

Gabeai, Gilead Sikuli ena aplikeisen pepana ai torea lou, bona idia abia dae. Ai laloa United States dekenai English gado ai sikuli do ai abia. To November 1981 ai, Germany ena brens ofesi Wiesbaden dekenai, Gilead klas idia hamatamaia. Unai dainai German gado ai sikuli ai abia, badina unai gado lau lalopararalaia namonamo. Edeseniai ai idia siaia lao?

TUARI TANONA AI MISINARI GAUKARA AI KARAIA

Ai be Kenya dekenai idia siaia! To Kenya ena brens ofesi ese ai ia noia bema ai ura Uganda dekenai misinari gaukara do ai karaia. Lagani 10 gunanai, Uganda ena gavamani be Jeneral Idi Amin ese ia gunalaia tuari orea ese ia abia. Unai murinai, ena lohia henunai taunimanima tausen momo idia mase bona milioni momo be edia noho gabudia idia haboioa. Bena 1979 ai, Idi Amin ena inai taudia ese ia idia kokia. Unai dainai lau daradara unai tuari tanona dekenai lau lao totona. To, Gilead sikuli ese ai ia durua Iehova ai abidadama henia totona. Unai dainai unai noinoi ai abia dae.

Uganda ai, mauri be auka. Heinz ia gwau: “Gavamani ese ranu, paua bona mauri durua gaudia haida ia henia diba lasi. Hanuaboi ai, taunimanima be haida idia pidia kava bona kohu idia henaoa. Taunimanima ibounai be ruma dekenai idia noho bona idia guriguri, tau dikana ta be edia ruma dekenai do ia mai bona edia kohu do ia henaoa eiava idia do ia hamasea lasi totona. Ena be unai hekwakwanai idia vara noho, to iseda tadikaka be mai moale ida Iehova idia hesiai henia noho!

Lagani 1982 ai, lau bona Heinz be Uganda ena siti badana Kampala dekenai ai ginidae. Hua 5 lalonai Sam bona Christina Waiswa edia ruma ai ai noho, edia natudia 5 bona varavara 4 ida. Tadikaka bona taihu Waiswa bona edia famili be nega momo dina tamona lalonai nega tamona idia aniani, to hanaihanai idia ese ai dekenai heabidae karana idia hahedinaraia. Idia ida ai noho neganai, lau bona Heinz be idia amo gau namodia momo ai dibaia, unai ese ai ia durua bada. Hegeregere, ranu sisina amo ai digu bona unai ranu be toileti hagoevaia totona ai gaukaralaia. Lagani 1983 ai, lau bona Heinz be Kampala dekenai noho gabuna ta ai davaria.

Haroro gaukara ai moalelaia. Lau laloatao hua ta lalonai magasin 4,000 bamona ai hariharilaia! To moale gauna be taunimanima ese hereva momokani idia abia dae. Dirava idia matauraia bona idia ura Baibel idia herevalaia. Nega momo egu Baibel stadi be 10 eiava 15 bamona, bona Heinz ena Baibel stadi danu be 10 ia lao 15 bamona. Bona emai stiuden taudia amo gau momo ai dibaia. Hegeregere, ena be wiki ta ta ai hebou lao totona idia raka, to idia maumau lasi bona idia moale.

Lagani 1985 bona 1986 ai, Uganda dekenai tuari rua idia vara lou. Nega momo ai itaia dala ai natudia maragidia be ipidi idia dogoatao bona dala idia koua. Unai nega lalonai, ai be haroro gaukara ai kudou-maoro taudia ai tahua noho, unai dainai aonega bona lalomaino totona ai guriguri. Bona Iehova ese emai guriguri ia haerelaia. Nega momo kudou-maoro taudia be sivarai namona idia abia dae neganai, emai gari ia ore.

Danu idau tano taudia haroro henia karana ai moalelaia. Hegeregere, Tatarstan (Central Russia) amo idia mai headava taudia Murat bona Dilbar Ibatullin ida ai stadi matamaia, idia be doketa taudia. Unai nega amo ema bona hari, Iehova idia do badinaia noho. Gabeai, Ukraine hahine ladana Tatjana Vileyska lau davaria, unai negai ia ura sibona ia hamasea. Tatjana be bapatiso ia abia murinai Ukraine dekenai ia giroa lou, bona iseda pablikeisen hahanaia gaukara ia karaia.a

ASAINMEN MATAMATA

Lagani 1991 ai, lau bona Heinz be Austria ai holidei ai abia noho lalonai, Austria brens ofesi ese ai idia hadibaia, emai asainmen matamata be Bulgaria. Eastern Europe ai komiunis gavamani idia moru murinai, Bulgaria ai Iehova ena Witnes taudia be gwaumaoro idia abia idia gaukara totona. Ai herevalaia bamona, guna iseda gaukara idia taravatua dainai, lau bona Heinz be hehuni dalanai unai tano ai pablikeisen ai abia lao. To hari haroro gaukara totona unai gabu dekenai ai idia siaia lao.

Ai idia hamaoroa Uganda dekenai do ai giroa lou lasi. Unai dainai Uganda dekenai ai giroa lasi emai kohu ai hegaegaelaia bona turadia bamahuta henia totona, to maoromaoro Germany Betele dekenai ai lao. Motuka ta ai abia bona Bulgaria dekenai ai lao. Bena Sofia siti dekenai pablisa 20 bamona grup ta ai bamoa matamaia.

Bulgaria ai koua gaudia haida ai davaria. Ginigunana be edia gado ai diba lasi. Danu, Bulgaria gado ena pablikeisen be Mauri Ia lao Henia Hereva Momokanina bona Lauegu Baibel Sivarai Bukana. Bona ai davaria, Baibel stadi ai hamatamaia be auka. Ena be koua gaudia idia noho, to emai grup maragina be mai ura bada ida ia gaukara goada. Orthodox Church taudia be unai idia itaia neganai, idia badu bona hekwakwanai idia havaraia matamaia.

Lagani 1994 ai, gavamani ese Witnes taudia edia ladana be rejista amo idia kokia, bona taunimanima idia laloa Witnes taudia be dagedage oreana ta. Tadikaka haida idia arest. Media ese koikoi herevadia idia halasia, idia gwau Iehova ena Witnes taudia be natudia idia hamasea sibona lasi, to Witnes taudia ma haida idia hamaoroa sibona idia hamasea totona. Unai dainai lau bona Heinz be ai hekwarahi haroro gaukara ai karaia totona. Nega momo taunimanima be ai dekenai idia boiboi badabada, pulisi idia boiria ai idia arest totona, bona ai dekenai nadi idia negea. Bulgaria lalonai pablikeisen ai abia vareai diba lasi, hebou totona gabu ta ai rentaia be ia auka. Pulisi taudia ese emai hebouhebou ta idia hadikaia. Lau bona Heinz be unai bamona karadia ai manadalaia lasi. Unai taudia edia kara be Uganda taudia amo ia idau, badina Uganda taudia be idia ura Baibel idia stadilaia! To dahaka ese ai ia durua emai asainmen matamata ai moalelaia totona?

Tadikaka bona taihu ida hebamo karana ai moalelaia. Idia be hereva momokani idia dibaia bona idia ai durua dainai idia moale. Idia ibounai be ta ta idia durua. Unai amo ai diba gauna be emai asainmen ai moalelaia diba, bema taunimanima ida ai noho bona idia ai durua.

To nega ia hanaia lalonai, haroro gaukara ai karaia namonamo diba. Lagani 1998 ai, unai tano ai iseda orea idia rejista, bona pablikeisen momo be Bulgaria gado ai idia halasia matamaia lou. Bena lagani 2004 ai, brens ofesi matamatana idia hahelagaia. Hari Bulgaria ai, kongrigeisen 57 idia noho, pablisa namba be 2,953. Hesiai laganina gunana ai, Memorial dekenai idia lao taudia ibounai be 6,475. Nega ta Sofia siti ai be taihu 5 sibona idia noho, to hari kongrigeisen ibounai be 9 idia noho! Ai itaia “bese maragina . . . be bese goadana ai do ia lao.”—Isa. 60:22.

HEKWAKWANAI AI HAHEAUKALAIA

Mauri lalonai gorere momo lau davaria. Lagani idia hanaia lalonai egu tauanina ai tiuma haida idia davaria. India ai medikol heduru bona hua 12 lalonai opereisen lau abia. India brens ofesi dekenai ai noho bona egu gorere ia ore murinai, Bulgaria dekenai ai giroa lou.

Gabeai, Heinz be gorere ladana Huntington ia davaria. Unai gorere dainai ia auka ia raka, ia hereva bona ena tauanina ia hamarerea totona. Gorere ia bada ia lao neganai, ia durua totona egu gaukara ia bada. Nega haida lau laloa momo ai dekenai dahaka do idia vara. To, matamata tadikaka Bobi be nega momo Heinz ida ia haroro. Ena be Heinz ena hereva dalana bona marere dalana dekenai taunimanima be dahaka idia laloa, to Bobi be unai ia laloa lasi. Hanaihanai Bobi ia noho Heinz ia durua totona. Ena be lau bona Heinz be natudia lasi, to Bobi be Iehova ese ia henia natuna mero ta bamona!—Mar. 10:29, 30.

Egu adavana Heinz be kansa gorere ia davaria danu. Madi, ia be lagani 2015 ai ia mase. Ia lau reaia momokani badina ia ese nega momo lau ia durua lau lalohekwarahi lasi totona. Nega momo ia lau laloa, toana be ia do mauri noho! (Luka 20:38) Nega momo ena hereva bona sisiba namodia lau laloatao. Lau tanikiu bada badina ai ruaosi be lagani momo lalonai hesiai gaukara ai karaia hebou.

IEHOVA ENA HEDURU DAINAI LAU TANIKIU

Iehova ese hahetoho ibounai lalonai lau ia durua. Danu lau ia durua dainai, hemarai karana lau hanaia bona misinari gaukara lau karaia. (2 Tim. 1:7) Iehova lau tanikiu henia badina lau bona egu taihuna be ful-taim hesiai gaukara ai karaia noho. Hari, ia bona ena adavana be Europe ai Serbia gado ena teritori ai hesiai gaukara idia karaia noho. Lagani momo gunana ai egu tamana ese ia gwauraia guriguri be Iehova ese ia haerelaia!

Baibel stadilaia karana ese lau ia durua lalomaino lau abia totona. Nega aukadia ai, ‘lalona ibounai ida lau guriguri,’ Iesu bamona. (Luka 22:44) Sofia siti ena taoni Nadezhda ai, egu guriguri ena haere lau abia, unai be kongrigeisen ai idia noho tadikaka taihu ese lau dekenai lalokau bona kara namodia idia hahedinaraia. Lau idia boiria idia lau bamoa totona, bona nega momo lau idia tanikiu henia, unai ese lau ia hamoalea bada.

Nega momo toreisi lou ena helaro lau laloa dobu. Egu lalona ai lau itaia egu tama sina be emai ruma badinai idia gini, edia toana be idia headava negana bamona. Bona egu taihuna be aniani ia hegaegaelaia. Danu Heinz be hosi badinai ia gini. Unai bamona lalohadai namodia ese lau ia durua lau abia hemami dikadia lau dadaraia bona Iehova lau tanikiu henia totona.

Egu mauri bona vaira negana lau laloa neganai, Davida ena hereva Salamo 27:13, 14 dekenai lau lalotamona, ia gwau: “Lau diba momokani, lau do mauri lalonai lau ese Iehova ena kara namodia do lau itaia. Iehova umui abidadama henia. Umui gari lasi bona umui goada. Oibe, Iehova umui abidadama henia.”