Ia Vara Haraga Gorere Haheaukalaia Dalana

Emu helt be karaharaga ia dika ia lao, a? Unai ese lalohadai bona hemami dalanai emu goada ia haorea diba, bona moni bada do oi negea. Dahaka ese oi ia durua diba oi haheauka totona? Edena dala ai famili memba ta o emu turana ta, mai ena gorere oi durua diba? Ena be Baibel be medikol bukana lasi, to oi ia durua sisiba namodia idia noho unai hekwakwanai oi haheaukalaia totona.

Heduru hereva haida emu gorere haheaukalaia totona

• Medikol heduru oi tahua

  Baibel ena hereva: “Gorere lasi taudia be doketa idia tahua lasi, to gorere taudia sibona ese idia tahua.”​—Mataio 9:12.

  Badinaia dalana: Doketa edia heduru oi tahua.

  Inai oi tohoa: Emu gabu ai, medikol heduru namona oi abia. Nega haida, doketa ma ta ena lalohadai oi tahua be namo. (Aonega Herevadia 14:15) Doketa dekenai emu gorere oi herevalaia namonamo, namona be edia hereva oi lalopararalaia bona idia ese emu gorere do idia diba namonamo. (Aonega Herevadia 15:22) Emu gorere bona hanamoa dalana ibounai oi dibaia. Dahaka gaudia do idia vara oi lalopararalaia neganai, hemami dalanai do oi hegaegae namonamo bona abia hidi namodia oi karaia diba.

• Emu helt durua daladia badinaia noho

  Baibel ena hereva: “Eksasais be mai ena namo.”​—1 Timoteo 4:8, Contemporary English Version.

  Badinaia dalana: Emu helt durua daladia oi badinaia hegeregere eksasais karana.

  Inai oi tohoa: Hanaihanai oi eksasais, aniani namona oi ania, bona oi mahuta namonamo. Ena be emu gorere dainai gau haida oi haidaua noho, to diba bada taudia idia gwau helt durua daladia oi badinaia neganai namo do oi davaria. Namona be oi karaia gaudia oi abia hidi neganai, emu gorere oi laloa, bona emu muramura idia durua lasi gaudia oi dadaraia.

• Ma haida amo heduru oi tahua

  Baibel ena hereva: “Tura korikori be nega ibounai lalokau ia hahedinaraia, bona hekwakwanai negadia ai ia be tadikaka korikori ta bamona oi ia durua.”​—Aonega Herevadia 17:17.

  Badinaia dalana: Emu turadia ese nega aukadia ai oi idia durua diba.

  Inai oi tohoa: Tura namona ta dekenai emu hemami ibounai oi gwauraia hedinarai diba. Unai ese oi ia durua diba emu lalohekwarahi bona lalohisihisi oi haheaukalaia totona. Emu turadia bona famili idia ura dala ma haida ai oi idia durua, to reana idia diba lasi dahaka do idia karaia. Unai dainai idia oi hamaoroa dahaka heduru oi ura. Namona be idia amo gau momo oi noia lasi, bona hanaihanai edia heduru totona idia oi tanikiu henia. Namona be taravatu haida oi atoa hegeregere, nega hida oi do idia vadivadi bona idia noho ena daudau oi gwauraia, unai amo edia heduru oi lalohekwarahilaia momo lasi.

• Lalohadai maorona dogoatao

  Baibel ena hereva: “Ia moale kudouna be muramura namona, to lalohisihisi kudouna ese ta ena goada ia haorea.”​—Aonega Herevadia 17:22.

  Badinaia dalana: Lalohadai maorona dogoatao karana ese hemami dalanai oi ia durua emu gorere oi haheaukalaia totona.

  Inai oi tohoa: Noho dalana ia idau dainai, oi karaia diba gaudia oi laloa, to oi karaia diba lasi gaudia oi laloa lasi. Ma haida ida oi sibona oi hahegeregerea lasi eiava guna oi gorere lasi negana be hari ida oi hahegeregerea lasi. (Galatia 6:4) Oi hagugurua diba tahua gaudia oi atoa, unai ese oi ia durua diba mai lalohadai maorona ida vaira negana oi laloa. (Aonega Herevadia 24:10) Emu noho dalana hegeregerena, ma haida totona gau haida oi karaia. Henia karana amo oi abia moalena ese oi ia durua emu hekwakwanai oi laloa momo lasi totona.​—Kara 20:35.

Dirava ese oi do ia durua emu gorere oi haheaukalaia totona, a?

Baibel ia hahedinaraia Iehovaa Dirava ese ta ia durua diba ena gorere ia haheaukalaia totona. Ena be Dirava ese hoa dalanai iseda gorere ia hanamoa lasi, to Dirava tomadiho henia taudia ese inai daladia ai heduru idia abia diba:

Maino. Dirava ese “ena maino, laloparara ibounai ia hereaia gauna” ia henia. (Filipi 4:6, 7) Inai lalomaino ese ta ia durua diba ia lalohekwarahi momo lasi totona. Guriguri amo edia lalohekwarahi idia gwauraia taudia dekenai Dirava ese unai maino ia henia.​—1 Petero 5:7.

Aonega. Iehova ese aonega ia henia diba abia hidi maorodia ita karaia totona. (Iamesi 1:5) Ta ese Baibel ena hakaua herevadia ia dibaia bona badinaia neganai, unai aonega ia abia.

Vaira nega ena helaro namona. Iehova ia gwauhamata vaira nega ai “tano tauna ta do ia gwau lasi: ‘Lau gorere.’” (Isaia 33:24) Unai helaro ese momo ia durua lalohadai maorona idia dogoatao totona, herevana idia gorere bada.​—Ieremia 29:11, 12.