Gavamani be Lalotamona ai Weda ia Dika Noho Karana Idia Koua Diba, A?​—Baibel be Dahaka Ia Gwau?

Sunday, November 20, 2022 ai, COP27 United Nations Climate Change Conference ia ore. Unai hebou ai idia weda dikadia ese disasta ia havaraia tanodia dekenai moni amo heduru henia totona idia lalotamona, to momo idia itaia unai ese hekwakwanai do ia hamaoromaoroa lasi.

• November 19, 2022 ai, United Nations ena secretary-general António Guterres ia gwau “Lau moale badina moni amo dika bada idia davaria taudia ita durua diba.” Danu ia gwau; “To ita diba unai sibona be hegeregere lasi. . . Badina iseda tanobada be dika bada lalonai ia noho bona hanamoa be auka.”

• “Kahirakahira weda ia dika noho karana (climate change) ese tanobada ibounai do ia hadikaia. Unai ese taunimanima dekenai dika bada do ia havaraia.”​—Mary Robinson, guna ia be Ireland ena presiden bona UN High Commissioner for Human Rights, November 20, 2022.

Matamata taudia be iseda planeti totona idia wari. To, gavamani edia gaukara hebou karana bona weda hanamoa totona idia karaia gwauhamata be do ia guguru, a? Baibel be dahaka ia gwau?

Gavamani be lalotamona ai unai idia hagugurua diba, a?

Baibel ese ia hahedinaraia ena be tanobada besedia be edia gwauhamata hagugurua totona idia gaukara hebou, to weda ia dika noho karana do idia koua diba lasi. Badina rua be inai:

• “Idia gageva gaudia ita hamaoromaoroa diba lasi.”​—Hadibaia Tauna 1:15.

  Unai ena anina: Gavamani be hegeregere lasi gau ibounai idia hamaoromaoroa totona. (Ieremia 10:23) Ena be tanobada besedia idia lalotamona bona idia gaukara goada, to idia be hegeregere lasi tanobada ena problem idia hamaoromaoroa totona.

• “Badina taunimanima be sibona do idia laloa bada, moni do idia ura henia bada, . . . do idia lalotamona lasi.”​—2 Timoteo 3:2, 3.

  Unai ena anina: Baibel ena peroveta hereva ese ia hahedinaraia goevagoeva, iseda nega ai momo be do idia mataganigani bona idia ura lasi gaukara hebou taunimanima edia mauri hanamoa totona.

Helaro ia noho ena badina

Taunimanima edia gavamani ese idia karaia gwauhamata be iseda tanobada ia hanamoa lasi. Dirava ese Iesu Keriso ia henia, ia be hegeregere tanobada ia lohiaia totona. Baibel ia gwau:

• “Ia ese lohia siahuna do ia abia. Ena ladana do idia hatoa Sisiba Henia Tauna Hereadaena, Siahu Bada Diravana, Noho Hanaihanai Tamana, Maino Lohiana.”​—Isaia 9:6.

Iesu be Dirava ena Basileia o guba gavamani ena King. (Mataio 6:10) Ia be mai ena siahu, aonega, bona ia ura iseda planeti bona taunimanima ia naridia. (Salamo 72:12, 16) Iena lohia henunai, inai guba gavamani ese “tanobada idia hadikaia” taudia do ia koua bona tanobada ena envairomen do ia hanamoa lou.​—Apokalupo 11:18; Isaia 35:1, 7.

Weda dikadia ena ore dalana oi diba totona, inai atikol “Climate Change and Our Future—What the Bible Says” oi duahia.