Tuari Totona Moni Trilioni Idia Negea—Dahaka Dika Ia Havaraia?

Tuari ese ia havaraia dika be bada herea.

• “Tanobada ai gavamani idauidau ese idia vara tuari haida totona moni $2.2 trilioni idia gaukaralaia, unai be guna lagani ta lalonai tuari totona idia gaukaralaia moni ena bada ia hanaia.”​—The Washington Post, February 13, 2024.

To moni sibona idia halusia lasi. Haheitalai ta mani ita laloa: Ukraine ai ia vara tuari.

• Soldia taudia. Ripoti haida idia gwau, tuari ia vara negana amo ia mai hari, kahirakahira soldia taudia 500,000 idia mase o bero idia abia vadaeni.

• Idia tuari lasi taudia. United Nations ia gwau, taunimanima 28,000 mai kahana idia mase o bero idia davaria. To, UN ofesa tauna ta ia gwau: “Unai tuari dikana lalonai idia mase taudia edia namba ibounai ita diba lasi.”a

Tanobada ai idia vara tuari dainai taunimanima ese idia davaria hisihisi bona dika ena davana be bada herea.

• 114 milioni. September 2023 ena ripoti ai, unai namba be tanobada ibounai ai tuari bona dagedage karadia dainai edia noho gabudia idia rakatania taudia.

• 783 milioni. Hitolo taudia edia namba. “Taunimanima dekenai hitolo bada ia vara ena badina badana be tuari, bona tanobada ena hitolo taudia 70 pesen be tuari bona dagedage gabudia ai idia noho.”​—World Food Programme.

Tuari be do ia ore, a? Maino totona dahaka helaro ia noho? Tanobada ese ia havaraia aniani momo amo taunimanima edia hitolo bona ogogami idia haorea diba, a? Baibel be dahaka ia gwau?

Tuari negana

Baibel ese hosi guia tauna ena laulau herevana amo tanobada ibounai ai tuari do idia vara ia perovetalaia.

• “Hosi ma ta ia mai, ia be kakakaka, bona ia latanai ia helai tauna ese siahu ia abia, tanobada amo maino ia kokia totona, vadaeni taunimanima be ta ta do idia alaia. Bona ia ese tuari kaia badana ta ia abia.”​—Apokalupo 6:4.

Unai hosi murinai idia mai hosi rua be hitolo bona gorere o gau ma haida dainai idia vara mase idia laulaulaia. (Apokalupo 6:5-8) Unai peroveta hereva ena anina bona iseda nega ai ia guguru noho ena badina oi diba totona, inai atikol “Hosi Guia Taudia Foa—Idia be Daidia?” duahia.

Nega Vaira ai Maino Do Ia Vara

Kahirakahira tanobada ena kohu be tuari totona do idia gaukaralaia lou lasi. To, unai be taunimanima ese do idia havaraia lasi. Baibel ia gwau:

• Dirava ese “tanobada ibounai lalonai tuari ia haorea.”​—Salamo 46:9.

• Dirava ese tuari dainai idia vara dika ibounai do ia haorea. “Ia ese mata ranu ibounai be edia matana amo do ia dahua ore, bona mase, lalohisihisi, taitai, bona hisihisi be do idia ore. Gau gunadia be idia ore vadaeni.”​—Apokalupo 21:4.

• Dirava ese taunimanima ibounai totona maino do ia mailaia. “Egu taunimanima be maino gabuna ta dekenai do idia noho, bona dika do idia davaria lasi bona gabu namona ai do idia noho.”​—Isaia 32:18.

Baibel ia peroveta, hari ita itaia tuari bona idia vara noho gaudia ese idia hahedinaraia maino do ia vara negana be kahirakahira.

Dirava ese edena dala ai unai maino negana do ia havaraia? Ia ese ena guba gavamani o Basileia amo do ia karaia. (Mataio 6:10) Unai Basileia bona ena anina oi dekenai oi dibaia totona, inai vidio Dirava Ena Basileia be Dahaka? itaia.