Mero ta be Kingdom Hall dekenai idia vareai taudia ia raraia noho

MATAMATA TAUDIA EDIA HENANADAI

Dahaka Dainai Kingdom Hall ai Hebou Lau Lao be Namo?

Wiki ta ta ai, nega rua Iehova ena Witnes taudia be edia tomadiho gabudia, Kingdom Hall ai hebou idia karaia. Unai hebou ai dahaka idia karaia, bona oi lao neganai dahaka heduru oi abia diba?

Kingdom Hall ai dahaka idia karaia?

Kingdom Hall be Baibel ena hakaua bona heduru hereva namodia oi dibaia gabuna. Unai hebou ese oi idia durua:

Dirava ena sivarai momokanina do oi dibaia.
hari idia vara noho gaudia edia anina do oi dibaia.
mero o kekeni namona ai do oi lao.
tura namodia do oi davaria.

Inai oi diba, a? Iehova ena Witnes taudia edia hebou gabudia idia gwauraia Kingdom Hall, badina unuseniai Dirava ena Basileia idia herevalaia momo.—Mataio 6:9, 10; 24:14; Luka 4:43.

Dahaka dainai oi lao be namo?

Unuseniai idia herevalaia gaudia ese oi do idia durua. Iehova ena Witnes taudia edia hebou ai idia herevalaia Baibel ena hakaua herevadia amo ‘aonega do oi abia.’ (Aonega Herevadia 4:5) Anina be Baibel ese oi ia durua diba emu mauri ai disisen namodia oi karaia totona. Danu, mauri ena henanadai badadia ia haerelaia diba, hegeregere:

Wiken ai idia karaia hebou dekenai idia henia tok haida edia sinado be:

Dahaka Dainai Baibel ese Ita ia Hakaua be Namo?
Nega Dikadia Lalonai Heduru be Edeseni Oi Abia Diba?
Dirava Ena Basileia be Ita Totona Hari Dahaka ia Karaia Noho?

“Egu sikuli turana ta be hebou ta dekenai ia mai. Egu famili ida ia helai, bona emai buka be ia dekenai ai hahedinaraia. Unai murinai, ia gwau henanadai bona haere kahana dekenai helai taudia edia haere ia moalelaidia. Ma ia gwau iena dubu dekenai unai bamona stadi gaudia be lasi.”—Brenda.

Inai oi diba, a? Kingdom Hall ai helai gaudia be davana lasi, bona moni idia gogoa lasi.

Idia oi bamoa karana ese oi do ia durua. Baibel ia gwau, Keristani taudia idia hebou ena badina ta be idia “hagoadaia heheni” totona. (Heberu 10:24, 25) Inai tanobada ai taunimanima be sibona idia laloa bada, to Dirava bona ma haida edia namo idia atoa guna taudia ita bamoa neganai, moale bada do ita davaria.

“Hora momo lau gaukara murinai, adorahi ai lau hesiku bona lalohisihisi, to nega momo Kingdom Hall ai lau hedavari henia taudia ese lau idia hagoadaia. Hebou murinai ruma dekenai lau giroa neganai, lau moale bona kerukeru totona lau hegeregere.”—Elisa.

Inai oi diba, a? Tanobada hegegemadai Iehova ena Witnes taudia edia kongrigeisen ibounai be 120,000 mai kahana, bona Kingdom Hall 60,000 mai kahana ai idia hebou. Lagani ta ta ai, Kingdom Hall ibounai 1,500 bamona idia haginia, badina hebou taudia edia namba be ia bada daekau noho.a

Emu turadia edia hereva

“Haisikuli ai egu sikuli turana ta be hebou haida dekenai ia mai, bona ia hoa gauna be mauri lagani idauidau taudia be nega tamona Baibel ena diba idia abia. Vanegai egu gaukara bosi ia mai, bona ia be Baibel ita gaukaralaia loulou karana dekenai ia hoa. Lau itaia hebou ia moalelaia neganai, unai ese lau ia hagoadaia hebou lau laloa bada totona!”—Jesica.

“Lau mamia hebou lao henia karana ese lau ia durua, dina ta ta ena hekwarahi bona lalohisihisi lau laloa boio totona. Ita dibaia gaudia ese ita idia durua mauri namona ita moalelaia, taunimanima namodia ai ita lao, bona hahenamo ma haidadanu. Nega ibounai Kingdom Hall lau rakatania neganai, egu lalona ia goada bona lau moale.”—Timothy.

“Hebou dekenai lau boiria mai tauna ta ia gwau: ‘Lau mai ena badina be lau ura emui hahediba herevadia lau hakoikoia. To lau laloparara lau abia dae gaudia be kerere!’ Danu, Iehova ena Witnes taudia be mai moale ida ia idia hereva henia dainai ia hoa. Ia gwau: ‘Ena be hari sibona umui lau hedavari henia, to lau umui kara henia dalana be hegeregere lagani momo lalonai lau umui diba vadaeni!’ ”—Jacob.

“Nega haida lau laloa, ‘Hebou ia ore neganai, ruma dekenai do lau giroa haraga.’ To hebou lalonai, unai hemami ia boio. Hebou murinai, tadikaka taihu lau hereva henia noho bona lau laloatao lasi dahaka dainai guna lau laloa Kingdom Hall do lau rakatania haraga. Bema hebou be lasi, egu tura namodia lau davaria lasi.”—Madison.

a Hebou gabuna ta oi davaria totona, oi lao “Iehova Ena Witnes Taudia Edia Kongrigeisen Heboudia” ena kahana bona “Kahirakahira Gabuna ta Tahua” oi klik.