Idaunegai Aigupito Ena Haba ese Baibel Ena Sivarai Ia Hamomokania

Inai idaunegai Aigupito ena haba be Amun diravana ena dubu kahirakahira ia noho, haba ena lata be 8 mita, unai be Karnak dekenai. Diba bada taudia idia gwau, unai haba ai idia noho toretore be Farao Sisaka ese Aigupito ena notist kahana ai ia abia tanodia, bona Iuda bona Israela ena not basileia ia halusia karana ia laulaulaia.

Unai haba ena toretore ia hahedinaraia Amun ese ia abia mauri taudia 150 be Sisaka, o Sheshonk dekenai ia henia.a Unai taunimanima ta ta be idia halusia taoni o gabudia dekenai idia abia. Unai haba ai, idia koroa taudia edia tauanina ai taoni ena ladana ta ta idia torea. Unai ladadia haida be idia duahia namonamo diba bona Baibel duahia taudia ese idia dibaia namonamo. Hegeregere Bete-seana, Gibeona, Megido, bona Suneme.

Aigupito taudia ese Iuda taudia idia tuari henia karana be Baibel ese ia sivarailaia. (1 King Taudia 14:25, 26) Oibe, Sisaka ia karaia gaudia ta ta be Baibel ese ia gwauraia hedinarai. Hegeregere Baibel ia gwau: “King Rehoboama ena lohia lagani namba 5 ai, Aigupito ena king, Sisaka be Ierusalema ia tuari henia, . . . Sisaka ena kariota be 1,200, hosi guia taudia be 60,000, bona ia ia ida idia lao tuari taudia momo herea be Aigupito tanodia, . . . Ia ese Iuda ena siti mai edia magu aukadia ia hadikaia ela bona Ierusalema dekenai ia ginidae.”​—2 Sivarai 12:2-4.

Akioleji taudia ese Karnak ena haba ai idia davaria gaudia idia hamomokania Sisaka ese Israela teritori haida ia abia. To unai sibona lasi, Baibel ese ia herevalaia taoni Megido ai idia davaria nadi haida dekenai, “Sheshonk” ena ladana ia noho danu.

Baibel ai Sisaka be Iuda ia halusia ena sivarai be momokani, unai ese ia hahedinaraia Baibel torea taudia be mai momokani ida Baibel idia torea. Edia bese ena kwalimu karana bona bese haida ese idia halusidia karana ena sivarai be mai momokani ida idia torea. Idaunegai toretore taudia ma haida be unai bamona idia karaia lasi.