Tanobada Gavamanidia Hahemaoro Henia

Tanobada Gavamanidia Hahemaoro Henia—Dahaka Dainai?

“Noga!” ese hereva haida, ladana “Tanobada Gavamanidia Hahemaoro Henia” ia gwauraia

POLITIKOL karadia ita kikilaia hari. Tau ta lasi ia gwau diba gavamani be anina lasi tanobada ena sivarai dekenai bona ita ta ta iboudiai dekenai. Oiemu gado, oiemu mauri dalana, oiemu gaukara, oiemu bese taudia edia orea, bona reana oiemu tomadiho danu be politikol karadia dainai idia vara.

Gavamani be mai anina bada dainai, ita ibounai ita ura gavamani namona henunai, dala namo hereana amo iseda ura ibounai do ia henia gavamanina henunai, ita noho, ani? To, edena bamona gavamani be namo herea? Bona momokani ita be mai iseda siahu lohia karana ta ita abia hidi, a?

“Noga!” idia torea taudia be mai edia moale danu hereva haida, ladana “Tanobada Gavamanidia Hahemaoro Henia” idia gwauraia hedinarai. Gabeai, Noga! magasin lalonai unai hereva do idia torea. Lagani 1991 ena orena lalonai, monarchy, aristocracy, oligarchy bona plutocracy gavamanidia idia vara sivaraidia do idia torea. Democracy gavamanidia idauidau, bona republic gavamanidia idauidau edia kara do idia tahua. Autocracy, dictatorship, bona totalitarian gavamanidia, hegeregere Fascist bona Nazi gavamanidia, Tanobada Ibounai Tuarina Iharuana lalonai idia vara gaudia, do idia herevalaia. Socialism bona Komiunis gavamanidia danu do idia kikilaia.

Taunimanima edia lohia karadia idauidau momo idia noho dainai, edia sivarai iboudiai ai torea diba lasi. Unai hereva ese politikol karadia iboudiai ia gwauraia diba lasi. Unai hereva lalonai taunimanima edia gavamanidia karadia amo ta do ai gwauraia bada lasi, bona gavamani idauidau amo ta do ai gwauraia maoro lasi. Unai gavamani ai hahegeregeredia neganai, unai be gavamani tamona gwauraia bada totona lasi. Noga! be rau 5 dekenai ia torea herevadia do ia badinaia. Unai hereva ia gwau: “Idia vara gaudia edia anina ia hahedinaraia danu, to politikol karana o bese abia isi karana dekenai ia vareai lasi.”

“Tanobada Gavamanidia Hahemaoro Henia” herevadia ai torea, “idia vara gaudia edia anina” do ai tahua namonamo totona, unai gaudia idia hahedinaraia taunimanima edia lohia karana be hekwakwanai negana ai ia vareai.

The Columbia History of the World bukana lalonai unai hekwakwanai be inai bamona ia gwauraia: “Gavamani, tomadiho, mauri ena kara, taunimanima idia kara heheni dalana, gado, miusik bona laulau peini karadia, bona taunimanima edia orea badadia edia badina, edia helaro, edia toana dainai, reana hari ita noholaia nega badana ena anina ita laloa diba. Gavamani ita herevalaia guna, bona iena anina be bada. . . . Taunimanima ese taravatu bona taravatu ia abia isi gavamanidia idia matauraia lasi; bona taunimanima ese taravatu idia do abia dae lohia taudia idia matauraia lasi. . . . Hari nega ena toana be idau bona lagani 100 gunanai nega ena toana be idau . . . Tanobada gabudia momo dekenai haida idia noho hegaegae taoni ena ruma badana idia heau vareai totona, pablik hebou idia hadikaia, iuniveseti idia hadikaia, eiava embassy rumana idia hapoua totona. . . . Taunimanima momo idia ura dikadika idia ura kwalimu momokani bona idia ura lasi gau ta ese edia ura do ia koua. . . . Anina be, politikol taudia bona taunimanima edia ura badana be Separatism, herevana dahaka lalohadai gunadia edia ladana idia gwauraia. Gau iboudiai idia do hadikaia ore lasi, to gau iboudiai idia dika idia lao.”

Kahirakahira, gau iboudiai do idia dika idia lao ela bona idia dika momokani, a? Bona bema unai ia vara, unai ena anina be dahaka inai tanobada, iseda noho gabuna, dekenai? Momokani, taunimanima edia lohia karadia idia hahemaoro henia, to hahemaoro taudia be taunimanima sibona lasi. Lagani daha daha lalonai, taunimanima ese edia gavamani idia hahemaoro henia bona idia davaria edia gavamani idia hegeregere lasi. To hari, guba bona tanobada ibounai ia havaraia Tauna ese gavamani ia hahemaoro henia. Lagani handred handred lalonai taunimanima idia lohia neganai, idia hahedinaraia idia lohia noho be maoro, a? Eiava Dirava ese ia hahemaoro henia neganai, do ia hahedinaraia taunimanima edia lohia karadia ia haorea be namo, a? Bona bema unai bamona, dahaka ese edia gabu do ia abia?

Hari herevadia, “Tanobada Gavamanidia Hahemaoro Henia,” ese emu diba gavamani dekenai do ia habadaia. Bona helaro namona do ia henia oi dekenai, badina gau momo dainai oi moale diba. Kahirakahira gavamani namona do ia mai. Bona gau namona be inai: Oi roho mauri diba unai gavamani do oi moalelaia totona!

[Pictures on page 9]

Dirava ese tanobada gavamanidia ia hahemaoro henia neganai, do ia hanamoa, a?

[Credit Line]

WHO photo/PAHO by J. Vizcarra