Vaira Neganai Dahaka Do Ia Vara?

Dahaka dainai ita ura dikadika taunimanima bona animal edia huanai maino ia noho? Badina be Dirava ese taunimanima ia havaraia neganai, ia ura taunimanima be animal ida, dagedage gaudia ida danu, maino dalana ai idia noho hebou.

Dirava ese tau bona hahine ginigunadia ia karaia neganai, tanobada ena paradaiso gabuna ta lalonai ia atodia, mauri do idia moalelaia totona. Ia ura natudia do idia havaraia bona unai Paradaiso gabuna ginigunana do idia habadaia ela bona tanobada ibounai ia abia. Ia ura tanobada ibounai lalonai mai maino danu taunimanima ese animal do idia biagua namonamo.

Genese sivaraina ia gwau: “Davara gwarume bona atai manudia bona boromakau, bona tano dekenai idia rau gaudia ibounai, ia ese do ia biagua. . . . Bona Dirava ese ia karaia vadaeni gaudia ibounai ia itaia bona momokani idia be namo herea.”​—⁠Genese 1:​26-31; 2:⁠9.

Taunimanima be unai bamona animal idia biagua neganai, do idia kara dika henidia lasi. Dirava ena ura be taunimanima bona animal be mai maino danu do idia noho hebou. Unai ita diba, badina Adam ese animal idauidau edia ladana ia hatoa totona idia be iena vairanai idia raka neganai, idia ia alaia totona gauna ta ia huaia lasi. Danu, taunimanima idia gari lasi bona animal idia gari lasi.​—⁠Genese 2:​19, 20.

Dirava ese Iena Ura Ginigunana Do Ia Hagugurua

Gau namona be, kahirakahira Dirava ena Basileia ese taunimanima edia gavamani iboudiai do ia kokia murinai, iena ura ginigunana do ia hagugurua; unai Basileia be guba dekena amo tanobada do ia lohiaia. (Daniel 2:44; Mataio 6:​9, 10) Dirava ese tanobada ibounai ia lohiaia neganai, iena ura ginigunana tanobada totona, bona tanobada idia noholaia taudia bona animal totona, do ia hagugurua matamaia.

Bible ena peroveta herevadia momo idia hahedinaraia Dirava ena lohia dalana maoromaorona ese gau momo do ia haidaua. Haheitalai ta be Dirava ena lauma helaga ena siahu amo Isaia ia torea herevana, ia gwau: “Uda sisia be mamoe natuna danu do idia noho, bona lepadi be nani natuna danu do idia hekure, boromakau natuna bona leona bona idia ubua namonamo gauna do idia noho hebou; bona mero maragina ta ese do ia hakaudia. Bona dohore boromakau bona bea idia aniani hebou; edia natudia idia hekure hebou. Bona leona ese rei kakoro do ia ania, boromakau bamona. Idia ese tau ta do idia hahisia lasi eiava gau ta do idia hadikaia lasi egu ororo helagana lalonai; badina be tanobada ibounai be Iehova diba maorona amo dohore ia honudae, davara ia honudae hegeregerena.”​—⁠Isaia 11:​6, 7, 9.

Ma peroveta herevadia haida danu ese idia hahedinaraia Dirava ena tanobada matamatana lalonai maino badana do ia noho. Unai hegeregerena, Mika ia peroveta, ia gwau: “Edia tuari kaia be tano geia auridia ai do idia halaoa, bona edia io do idia hodoa au rigidia utua pakosidia ai do idia halaoa. Edia tuari kaia do idia abia isi lou lasi, bese ta bese ta tuari henia totona, bona tuari daladia do idia hadibaia lou lasi. Bona momokani, ta ta ena vine au bona fig au henunai do idia helai, bona tau ta ese idia do ia hagaria lasi.”​—⁠Mika 4:​3, 4.

Unai negai dagedage animal ese taunimanima edia maino do idia hadikaia lasi. Unai hegeregerena, Dirava ena peroveta herevana ia gwau: “Idia dekenai lau ese maino gwauhamata ta do lau karaia, bona lau ese dagedage boroma tano dekenai lau haorea, bona taunimanima lasi gabuna dekenai do idia noho namonamo bona uda dekenai do idia mahuta. . . . Bona edia tano ai do idia noho namonamo.”​—⁠Esekiel 34:​25, 27.

Unai dainai unai paradaiso lalonai maino bona hetura karana namona do idia goevadae. Unai badina dainai Bible ena buka ginigabena ese taunimanima edia noho dalana unai nega lalonai be inai bamona ia gwauraia: “ ‘[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.’ Vadaeni helai gabuna badana latanai ia helai Diravana ia hereva, ia gwau, ‘Harihari be gau ibounai lau karaia matamata inai.’ Ma lau dekenai ia hereva, ia gwau, ‘Harihari inai hereva do oi torea, badina ia be maoromaoro bona momokani vadaeni, bona inai hereva do umui abidadama henia diba.’ ”​—⁠Apokalupo 21:​4, 5.

Oibe, unai hereva ia maoromaoro bona momokani, bona ita abidadama henia diba. Anina be, Dirava ena gwauhamata hereva dekenai ita tabekau diba, badina Dirava be goevadae lasi taudia bamona lasi, to iena siahu, iena aonega, bona iena lalo-goada idia hegeregere iena ura do ia karaia guguru totona. Idau negai, Dirava ena kamonai hesiai tauna ta ia gwau: “Iehova emui Dirava ese umui dekenai ia gwauraia hereva namodia iboudiai amo ta ia reaia lasi. Iboudiai idia guguru. Hereva ta ia reaia lasi.”​—⁠Iosua 23:14; Isaia 55:⁠11 itaia danu.

Unai hegeregerena, ita diba namonamo, kahirakahira, Dirava ena tanobada matamatana lalonai, Dirava ese iena ura ginigunana inai tanobada totona, tanobada taudia totona, bona animal totona do ia hagugurua. Dirava ese ia henia mainona be tanobada ibounai lalonai do ia noho. Bona unai bamona maino be taunimanima edia huanai sibona do ia vara lasi, to animal edia huanai danu do ia vara.